​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​AKP ភ្នំពេញ ថ្ងៃទី៩ ខែកញ្ញា ឆ្នាំ២០២៦ --ប្រធានសមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា បានរំលឹក និងដាស់តឿនដល់អ្នកសារព័ត៌មានទាំងអស់ ឱ្យបន្តប្រកាន់ខ្ជាប់នូវក្រមសីលធម៌វិជ្ជាជីវៈជាចំណុចស្នូល ដោយលោកបានសង្កត់ធ្ងន់ថា ការគោរពក្រមសីលធម៌គឺជា «អាវក្រោះការពារខ្លួន» ដ៏មានប្រសិទ្ធភាពបំផុតសម្រាប់អ្នកសារព័ត៌មាននៅក្នុងការប្រកបវិជ្ជាជីវៈប្រចាំថ្ងៃ។

ការថ្លែងបែបនេះរបស់ លោកបណ្ឌិត ហោ គន្ធា ប្រធានសមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា បានធ្វើឡើងក្នុងឱកាសដែលលោកអញ្ជើញជាអធិបតីក្នុងពិធីជួបសំណេះសំណាល និងពិភាក្សាអំពីបញ្ហាប្រឈមក្នុងវិស័យព័ត៌មាននៅសៀលថ្ងៃទី៩ ខែកញ្ញា ឆ្នាំ២០២៦ ដោយមានការចូលរួមពីចាងហ្វាងការផ្សាយ និងអ្នកសារព័ត៌មានចំនួន ១២៥នាក់ មកពី ៥០អង្គភាពសារព័ត៌មាន។

លោកបណ្ឌិត ហោ គន្ធា បានលើកឡើងនូវប្រសាសន៍របស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ដោយបញ្ជាក់ថា ក្រមសីលធម៌វិជ្ជាជីវៈប្រៀបដូចជាអាវក្រោះ ប៉ុន្តែអាវក្រោះនោះរឹងមាំ ឬស្ដើង គឺអាស្រ័យលើបុគ្គលអ្នកសារព័ត៌មានខ្លួនឯងជាអ្នកអនុវត្ត។ លោកបានកត់សម្គាល់ថា ទោះបីជាសណ្តាប់ធ្នាប់ក្នុងវិស័យព័ត៌មានបច្ចុប្បន្នមានភាពល្អប្រសើរច្រើនក៏ដោយ ប៉ុន្តែនៅតែមានអ្នកសារព័ត៌មានមួយចំនួនតូច បានយកតួនាទីទៅប្រព្រឹត្តផ្ទុយពីក្រមសីលធម៌វិជ្ជាជីវៈ ដែលធ្វើឱ្យប៉ះពាល់ដល់តម្លៃ និងកិត្តិយសរបស់អ្នកសារព័ត៌មានទូទៅដែលខិតខំព្យាយាមរក្សាក្រមសីលធម៌។

លោកបណ្ឌិតបានចង្អុលបង្ហាញពីកំហុសឆ្គងមួយចំនួន ដូចជាការចុះទៅសម្ភាសន៍ជនរងគ្រោះ ឬជនល្មើសមុនពេលសមត្ថកិច្ចអនុវត្តច្បាប់ធ្វើការសាកសួរ ដែលអាចនាំឱ្យមានការយល់ច្រឡំពីមហាជន និងរំខានដល់ដំណើរការកាត់ក្តីរបស់តុលាការ។ លើសពីនេះ ការផ្សព្វផ្សាយព័ត៌មានពាក់ព័ន្ធនឹងរឿងរ៉ាវបុគ្គល ផ្លូវចិត្ត និងកិត្តិយសគ្រួសារ ដោយស្តាប់តែព័ត៌មានមួយជ្រុង ក៏ជាអំពើខុសឆ្គង និងអសីលធម៌ផងដែរ។

លោកបណ្ឌិត ហោ គន្ធា បានបញ្ជាក់បន្ថែមថា៖ «សិទ្ធិរបស់យើងមិនមែនគ្មានដែនកំណត់នោះទេ។ ការបំពេញភារកិច្ចដោយស្របតាមក្រមសីលធម៌វិជ្ជាជីវៈ មិនត្រឹមតែជួយឱ្យសង្គមទទួលបានព័ត៌មានពិត និងមានអត្ថប្រយោជន៍ប៉ុណ្ណោះទេ ប៉ុន្តែគឺជាវិធីតែមួយគត់ក្នុងការការពារកិត្តិយស សេចក្តីថ្លៃថ្នូរ និងសុវត្ថិភាពរបស់អ្នកសារព័ត៌មានខ្លួនឯង»។

សូមបញ្ជាក់ផងដែរថា នៅក្នុងជំនួបនេះ សមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា ក៏បានប្រមូលនូវបញ្ហាប្រឈម ទុក្ខលំបាក និងធាតុចូលសំខាន់ៗពីសំណាក់អ្នកសារព័ត៌មាន ដើម្បីរៀបចំជារបាយការណ៍ និងមតិយោបល់ យកទៅជម្រាបជូនក្រសួងព័ត៌មាន នៅក្នុងកិច្ចប្រជុំរៀងរាល់ ៣ខែម្តង រវាងក្រសួង និងតំណាងសមាគមសារព័ត៌មាននានាផងដែរ៕

ដោយ៖ ទូច វលក័្ខណ