AKP កំពង់ធំ ថ្ងៃទី២ ខែកញ្ញា ឆ្នាំ២០២៦--លោក ជិន ស៊ីថា នាយខណ្ឌរដ្ឋបាលជលផលកំពង់ធំ កាលពីថ្ងៃទី១ ខែកញ្ញា ឆ្នាំ២០២៦ បានដឹកនាំមន្ត្រីខណ្ឌ ផ្នែក និងសង្កាត់ សហការជាមួយអធិការដ្ឋានរដ្ឋបាលជលផលខាងជើងបឹងទន្លេសាប និងកម្លាំងទីបញ្ជាការស្រាលប្រចាំឃុំផាត់សណ្ដាយ អមដំណើរឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ចុះប្រតិបត្តិការត្រួតពិនិត្យនិងបង្ក្រាបបទល្មើសនេសាទនៅចំណុចចាប់ពីបាឡតតូច ដល់អាស៊ឹម ឃុំពាមបាង ស្រុកស្ទោងខេត្តកំពង់ធំ។

ជាលទ្ធផលកម្លាំងជំនាញបានអនុវត្តន៍ចំនួន២ករណី ដោយបានរុះរើ កាប់ និងបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន៖ ១.របាំងសាច់អួនលើសប្រវែងកំណត់ចំនួន៥របាំង ប្រវែងសរុប១៣៥០ម៉ែត្រ ឡុកសាច់អួនចំនួន១០គ្រឿង និងលូ ឬលបចំនួន ២០មាត់។ ២.របាំងសាច់អួនក្រឡាញឹកចំនួន ៣របាំង ប្រវែងសរុប ៦០០ម៉ែត្រ ឡុកសាច់អួនចំនួន ៦ឡុក លូ ឬលបចំនួន ១២មាត់និងបង្គោលឈើចំនួន៩០០ដើម។

នៅថ្ងៃជាមួយគ្នានេះដែរ លោក កែវ សុឃឿន មន្ត្រីរដ្ឋបាលជលផលបារាយណ៍ ប្រចាំស្រុកតាំងគោក បានចូលរួមជាមួយកម្លាំងទីបញ្ជាការស្រាលកោះរះ ចុះប្រតិបត្តិការបង្ក្រាបបទល្មើសជលផល នៅចំណុចព្រែកទាល់ ក្រពើសាហាវ ស្ទឹងរោធ និងទំនប់តាធី ស្ថិតក្នុងភូមិសាស្ត្រឃុំស្រឡៅ ស្រុកតាំងគោក ខេត្តកំពង់ធំ។ ជាលទ្ធផល កម្លាំងជំនាញបានអនុវត្តន៍ចំនួន៣ករណី ដោយបានរុះរើ និងបំផ្លាញចោលឧបករណ៍នេសាទខុសច្បាប់នៅនឹងកន្លែង រួមមាន៖ ១.របាំងស្បៃមុងចំនួន ៦របាំង ប្រវែងសរុប៣១៥ម៉ែត្រ ឡុកចំនួន ៦គ្រឿង លូចំនួន៦មាត់ និងបង្គោលចំនួន៧២ដើម និងបានចាក់លែងត្រីស្រស់ចម្រុះទម្ងន់ប្រមាណ៧៥គីឡូក្រាមចូលបឹងធម្មជាតិវិញ។ ២.របាំងសាច់អួនក្រឡាញឹកចំនួន១របាំង ប្រវែង ១១៥ម៉ែត្រ ឡុកចំនួន១គ្រឿង និងលប/លូចំនួន ១មាត់ និង៣.លបប្រើស១០០ចំនួន ១ខ្សែ ប្រវែង១០ម៉ែត្រ៕

ដោយ ស៊ុម វណ្ណា