AKP ព្រះសីហនុ ថ្ងៃទី២ ខែកញ្ញា ឆ្នាំ២០២៦--នៅព្រឹកថ្ងៃពុធទី២ ខែកញ្ញា ឆ្នាំ២០២៦នេះឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុបានអញ្ជើញបើកលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៥-២០២៦ នៅសាលប្រជុំសាលាខេត្តព្រះសីហនុ ដោយមានការ ចូលរួមពីអភិបាលក្រុង ស្រុក មន្ទីរ អង្គភាពពាក់ព័ន្ធជុំវិញខេត្ត។

លោកស្រី អ៊ុច សោភា ប្រធានមន្ទីរអប់រំយុវជន និងកីឡាខេត្តព្រះសីហនុ បានឱ្យដឹងថា ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៥ -២០២៦ នៅខេត្តព្រះសីហនុ បេក្ខជនដាក់ពាក្យប្រឡងមានចំនួន២ ៤០១នាក់ ស្រី ១ ២៦៧នាក់ ក្នុងនោះថ្នាក់វិទ្យាសាស្ត្រមាន ២មណ្ឌល និងថ្នាក់វិទ្យាសាស្រ្តសង្គម ៣មណ្ឌល គឺមាន ៥មណ្ឌល ស្មើនឹង ៩៩បន្ទប់។ ចំពោះលទ្ធផល ប្រឡងជាប់និទ្ទេស A មានចំនួន ២៦នាក់ ស្រី ២៤នាក់,និទ្ទេសB សរុប ១៤៨នាក់ ស្រី ៨២នាក់, និទ្ទេសC ៤១៤នាក់ ស្រី ២៥២នាក់,និទ្ទេសD ៧៤១នាក់ ស្រី ៤១៦នាក់ និងនិទ្ទេសE ៧៣៦នាក់ ស្រី ៣៧៩នាក់ ។

ឯកឧត្តម ម៉ាង ស៊ីណេត អភិបាលខេត្តព្រះសីហនុបានលើកឡើងថា ទោះបីជាការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៥-២០២៦ និទ្ទេសA មានចំនួន ២៦នាក់ មានការថយចុះជាងឆ្នាំ២០២៥ ក៏ដោយ ដែលខុសពីអ្វីដែលយើងចង់បាន និងការរំពឹងទុក នោះ ជាង ៥០ភាគរយ ក៏ប៉ុន្តែនិទ្ទេស B.C.D មានការកើនឡើងជាងឆ្នាំ២០២៥ ។

ឯកឧត្តម អភិបាលខេត្តព្រះសីហនុ ក៏បានធ្វើការណែនាំដល់មន្ទីរអប់រំ ត្រូវ តែពង្រឹងដុសខាត់វិស័យអប់រំនៅខេត្តព្រះសីហនុបន្ថែមទៀត ឈានទៅយកនិទ្ទេសA ឱ្យបានច្រើនសម្រាប់ឆ្នាំ២០២៦- ២០២៧ខាងមុខ ។

សូមរម្លឹកផងដែរថា សម័យប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០២៤-២០២៥ នៅខេត្តព្រះសីហនុ សិស្សប្រឡងជាប់និទ្ទេសA មានចំនួន ៥៦នាក់ ៕

ដោយ ងូ សុមុនី