AKPបន្ទាយមានជ័យថ្ងៃទី២  ខែកញ្ញាឆ្នាំ២០២៦--«ជីវជាតិគ្រប់គ្រាន់ អាហារគ្រប់គ្រាន់ ចាប់ផ្តើមពីផ្ទះរបស់អ្នក» គឺជាសារសំខាន់ដែលត្រូវបន្តផ្សព្វផ្សាយឱ្យបានទូលំទូលាយ ដើម្បីឱ្យប្រជាពលរដ្ឋយល់ដឹងពីសារៈសំខាន់នៃការជ្រើសរើស ការរៀបចំ និងការចម្អិនម្ហូបអាហារដែលមានសុវត្ថិភាព និងសារធាតុចិញ្ចឹមគ្រប់គ្រាន់ សម្រាប់លើកកម្ពស់សុខភាព និងសុខុមាលភាពរបស់សមាជិកគ្រួសារ។ 

នេះជាការលើកឡើងរបស់លោក ហ៊ឹល រ៉ាយ៉ា អភិបាលរងខេត្ត តំណាងដ៏ខ្ពង់ខ្ពស់ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ក្នុងពិធីយុទ្ធនាការ «ជីវជាតិគ្រប់គ្រាន់ អាហារគ្រប់គ្រាន់» និងការបង្ហាញអំពីការចម្អិនម្ហូបអាហារក្នុងសហគមន៍ កាលពីថ្ងៃទី១ ខែកញ្ញា ឆ្នាំ២០២៦ នៅទីស្នាក់ការភូមិផ្លូវបំបែក (ភូមិរង់ចាំទី៤) តំបន់ពលរដ្ឋភៀសឹករស់នៅឃុំស្លក្រាម ស្រុកស្វាយចេក ខេត្តបន្ទាយមានជ័យ។

ក្នុងពិធីដែលមានប្រជាពលរដ្ឋក្នុងសហគមន៍ចូលរួមយ៉ាងកុះករ លោក ហ៊ឹល រ៉ាយ៉ា បានបញ្ជាក់ពីសារៈសំខាន់នៃការយកចិត្តទុកដាក់លើអាហារូបត្ថម្ភនៅក្នុងគ្រួសារ ដោយសារអាហារដែលមានគុណភាព និងសារធាតុចិញ្ចឹមគ្រប់គ្រាន់ មិនត្រឹមតែជួយឱ្យមនុស្សមានសុខភាពល្អប៉ុណ្ណោះទេ ប៉ុន្តែថែមទាំងជួយពង្រឹងភាពរឹងមាំរបស់កុមារ ស្ត្រី មនុស្សចាស់ និងសមាជិកគ្រួសារទាំងមូលផងដែរ។

លោកអភិបាលរងខេត្ត បានលើកឡើងថា ការយល់ដឹងអំពីអាហារូបត្ថម្ភត្រូវចាប់ផ្តើមពីកម្រិតគ្រួសារ ព្រោះគ្រួសារជាកន្លែងដែលសមាជិកទទួលទានអាហារជាប្រចាំ។ ដូច្នេះ ការរៀបចំម្ហូបអាហារដោយគិតគូរពីភាពចម្រុះ គុណភាព អនាម័យ និងសុវត្ថិភាព គឺជាកត្តាសំខាន់ក្នុងការកាត់បន្ថយបញ្ហាកង្វះអាហារូបត្ថម្ភ និងការពារសុខភាពរបស់ប្រជាពលរដ្ឋ។

ជាមួយគ្នានេះ លោក ហ៊ឹល រ៉ាយ៉ា បានថ្លែងអំណរគុណដល់ អង្គការទស្សនៈពិភពលោកអន្តរជាតិកម្ពុជា (World Vision International Cambodia) ដែលបានចូលរួមចំណែក និងសហការជាមួយរាជរដ្ឋាភិបាល និងអាជ្ញាធរមូលដ្ឋាន ក្នុងការរៀបចំយុទ្ធនាការ «ជីវជាតិគ្រប់គ្រាន់ អាហារគ្រប់គ្រាន់» និងការបង្ហាញជាក់ស្តែងអំពីការចម្អិនម្ហូបអាហារក្នុងសហគមន៍។

លោកបានចាត់ទុកកិច្ចសហការរបស់អង្គការដៃគូនេះថា ជាការចូលរួមដ៏មានតម្លៃក្នុងការផ្សព្វផ្សាយចំណេះដឹង និងបង្កើនការយល់ដឹងរបស់ប្រជាពលរដ្ឋ ពិសេសប្រជាពលរដ្ឋដែលកំពុងស្ថិតក្នុងស្ថានភាពភៀសសឹក ឱ្យមានចំណេះដឹងកាន់តែប្រសើរអំពីការថែទាំសុខភាព តាមរយៈការទទួលទានអាហារដែលមានជីវជាតិគ្រប់គ្រាន់។

លោកអភិបាលរងខេត្តបានគូសបញ្ជាក់ថា ក្នុងស្ថានភាពដែលប្រជាពលរដ្ឋមួយចំនួនត្រូវផ្លាស់ទីលំនៅ ឬភៀសសឹក ការធានាឱ្យមានអាហារបរិភោគគ្រប់គ្រាន់ និងមានគុណភាព គឺជាបញ្ហាដែលត្រូវការការយកចិត្តទុកដាក់ជាពិសេស។ ក្រៅពីការផ្គត់ផ្គង់ស្បៀង ការផ្តល់ចំណេះដឹងអំពីវិធីប្រើប្រាស់ស្បៀងឱ្យមានប្រសិទ្ធភាព ការរក្សាអនាម័យ និងការចម្អិនអាហារឱ្យបានត្រឹមត្រូវ ក៏ជាផ្នែកមួយដែលមិនអាចមើលរំលងបានដែរ។

តាមរយៈសកម្មភាពបង្ហាញការចម្អិនម្ហូបអាហារនៅក្នុងសហគមន៍ ប្រជាពលរដ្ឋមានឱកាសទទួលបានចំណេះដឹងជាក់ស្តែង មិនត្រឹមតែស្តាប់ការណែនាំតាមទ្រឹស្តីប៉ុណ្ណោះទេ។ សកម្មភាពនេះក៏ជួយឱ្យពួកគាត់អាចយកចំណេះដឹងដែលទទួលបានទៅអនុវត្តនៅក្នុងជីវភាពប្រចាំថ្ងៃ និងចែករំលែកបន្តទៅកាន់សមាជិកគ្រួសារ និងអ្នកនៅក្នុងសហគមន៍។

ពិធីនេះក៏បានបង្ហាញពីការយកចិត្តទុកដាក់របស់អាជ្ញាធរខេត្ត និងដៃគូអភិវឌ្ឍន៍ចំពោះសុខុមាលភាពរបស់ប្រជាពលរដ្ឋ ដោយផ្តោតលើគោលការណ៍ថា ការមានអាហារគ្រប់គ្រាន់ត្រូវដើរទន្ទឹមនឹងការមានអាហារដែលមានជីវជាតិ និងសុវត្ថិភាព។ ពោលគឺ ការដោះស្រាយបញ្ហាអាហារូបត្ថម្ភ មិនគួរផ្តោតតែលើបរិមាណអាហារប៉ុណ្ណោះទេ ប៉ុន្តែត្រូវគិតដល់គុណភាព និងភាពចម្រុះនៃអាហារផងដែរ។

ដោយឡែក ការដាក់ចេញសារថា «ជីវជាតិគ្រប់គ្រាន់ អាហារគ្រប់គ្រាន់ ចាប់ផ្តើមពីផ្ទះរបស់អ្នក» ក៏ជាការជំរុញឱ្យគ្រួសារនីមួយៗមើលឃើញថា ការថែរក្សាសុខភាពមិនមែនជាកាតព្វកិច្ចរបស់ស្ថាប័នសុខាភិបាល ឬអាជ្ញាធរតែមួយមុខនោះឡើយ ប៉ុន្តែជាការចូលរួមរបស់សមាជិកគ្រួសារគ្រប់រូប តាមរយៈការជ្រើសរើស និងរៀបចំអាហារឱ្យបានត្រឹមត្រូវ និងមានអនាម័យ។

ការចូលរួមយ៉ាងកុះកររបស់ប្រជាពលរដ្ឋក្នុងយុទ្ធនាការនេះ បានឆ្លុះបញ្ចាំងថា ការផ្សព្វផ្សាយចំណេះដឹងផ្នែកអាហារូបត្ថម្ភតាមរយៈសកម្មភាពជាក់ស្តែងនៅមូលដ្ឋាន គឺជាមធ្យោបាយដ៏មានប្រសិទ្ធភាពមួយក្នុងការនាំចំណេះដឹងទៅដល់ប្រជាពលរដ្ឋ និងបង្កើតការផ្លាស់ប្តូរទម្លាប់រស់នៅប្រកបដោយសុខភាពល្អ។

ជារួម យុទ្ធនាការ «ជីវជាតិគ្រប់គ្រាន់ អាហារគ្រប់គ្រាន់» មិនមែនគ្រាន់តែជាសកម្មភាពបង្ហាញការចម្អិនម្ហូបអាហារមួយពេលនោះទេ ប៉ុន្តែជាការបញ្ជូនសារដ៏មានអត្ថន័យទៅកាន់គ្រួសារ និងសហគមន៍ថា ការកសាងសុខភាពល្អចាប់ផ្តើមពីអាហារដែលយើងជ្រើសរើស និងរៀបចំជារៀងរាល់ថ្ងៃ។ ជាពិសេស សម្រាប់ប្រជាពលរដ្ឋដែលកំពុងជួបប្រឈមនឹងការលំបាក ការរួមបញ្ចូលគ្នារវាងការគាំទ្រផ្នែកស្បៀង និងចំណេះដឹងអាហារូបត្ថម្ភ នឹងកាន់តែមានសារៈសំខាន់ក្នុងការជួយធានាសុខុមាលភាពរបស់ពួកគាត់ និងក្រុមគ្រួសារ៕

ដោយ៖ ឈុន សារ៉ាត