AKP សៀមរាប ថ្ងៃទី២ ខែកញ្ញា ឆ្នាំ ២០២៦– រដ្ឋបាលខេត្តសៀមរាបកំពុងត្រៀមអនុវត្តគម្រោងសាកល្បង «ការធ្វើឱ្យមានភាពបៃតងនៅតាមមាត់ស្ទឹងសៀមរាប (Riverside Greenery)» ដោយសហការរវាងរដ្ឋបាលខេត្តសៀមរាប ទីភ្នាក់ងារ JICA និងអង្គភាពពាក់ព័ន្ធ ក្នុងគោលបំណងលើកកម្ពស់សោភ័ណភាពបរិស្ថានទីក្រុង និងបង្កើនភាពទាក់ទាញសម្រាប់ប្រជាពលរដ្ឋ និងភ្ញៀវទេសចរ។

យោងតាមរូបភាព 3D ដែលរដ្ឋបាលខេត្តសៀមរាបបានបង្ហាញនៅព្រឹកថ្ងៃទី២ ខែកញ្ញា ឆ្នាំ២០២៦នេះ គម្រោងនេះនឹងផ្តោតលើការកែលម្អតំបន់មាត់ស្ទឹងឱ្យក្លាយជាលំហបៃតងសាធារណៈប្រកបដោយភាពទំនើប និងមានបរិយាកាសស្រស់ស្អាត តាមរយៈការរៀបចំសួនច្បារ ដាំរុក្ខជាតិបន្ថែម បំពាក់ប្រព័ន្ធភ្លើងលម្អ និងបច្ចេកវិទ្យាឌីជីថលសម្រាប់បង្កើនបទពិសោធន៍ដល់អ្នកទស្សនា។

បន្ថែមពីនេះ គម្រោងក៏នឹងបង្កើតទីតាំងសម្រាប់ថតរូបកម្សាន្ត និងកន្លែងអង្គុយលំហែកាយតាមមាត់ស្ទឹង ដែលអាចក្លាយជាចំណុចទាក់ទាញថ្មីមួយនៅក្នុងក្រុងសៀមរាប ជាពិសេសសម្រាប់ភ្ញៀវទេសចរជាតិ និងអន្តរជាតិ។

គម្រោងសាកល្បង «Riverside Greenery» នេះ នឹងអនុវត្តចាប់ពីគល់ស្ពានព្រះរាជដំណាក់ ឆ្ពោះទៅផ្នែកខាងត្បូង ប្រវែងប្រមាណ ១០០ម៉ែត្រ ហើយត្រូវបានរំពឹងថានឹងរួមចំណែកលើកកម្ពស់សោភ័ណភាពទីក្រុង បង្កើនបរិស្ថានបៃតង និងជំរុញវិស័យទេសចរណ៍ឱ្យកាន់តែមានភាពទាក់ទាញស្របតាមការអភិវឌ្ឍរបស់ខេត្តសៀមរាបនាពេលអនាគត៕

ដោយ៖ ឃុត សៅ