AKP តាកែវ ថ្ងៃទី២២ខែសីហាឆ្នាំ២០២៦---

លោកឧត្តមសេនីយ៍ទោ ម៉ែន លី ស្នងការនគរបាលខេត្តតាកែវ អញ្ជើញជាអធិបតី ក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការរយៈពេល៩ខែឆ្នាំ២០២៦ និងលើកទិសដៅអនុវត្តបន្ត។

ក្នុងកិច្ចប្រជុំនោះដែរ ក៏មានការអញ្ជើញចូលរួមពីលោក លោកស្រីស្នងការរងនគរបាលខេត្តតាកែវ នាយ នាយរងការិយាល័យទាំង៣៣ អធិការ អធិការរងក្រុង-ស្រុកទាំង១០ មេបញ្ជាការ មេបញ្ជាការរងវរសេនាតូចការពារព្រំដែនគោកលេខ៦០៣ នាយ នាយរងប៉ុស្តិ៍ការពារព្រំដែន នាយប៉ុស្ដិ៍នគរបាលរដ្ឋបាលឃុំ-សង្កាត់ទាំង១០០ និងមន្ត្រីពាក់ព័ន្ទ ចូលរួមជាច្រើនរូបផងដែរ។

ពិធីនេះរៀបចំឡើងនៅសាលប្រជុំស្នងការដ្ឋាននគរបាលខេត្តតាកែវ កាលពីព្រឹកថ្ងៃសុក្រ៨កើតខែស្រាពណ៍ឆ្នាំមមីអដ្ឋស័កព.ស២៥៧០ ត្រូវនឹងថ្ងៃទី២១ខែសីហាឆ្នាំ២០២៦។

មានប្រសាសន៍សំណេះសំណាលក្នុងពិធីនោះ លោកឧត្តមសេនីយ៍ទោ ម៉ែន លី ស្នងការនគរបាលខេត្តតាកែវ បានជម្រុញឱ្យការិយាល័យជំនាញ និងអធិការនគរបាលក្រុង-ស្រុកទាំង១០ ត្រូវគ្រប់គ្រងកម្លាំងរបស់ខ្លួនឱ្យបានល្អ និងជំរុញឱ្យមានភាពសកម្មការងារ ក្នុងការទទួលខុសត្រូវចំពោះតួនាទី ភារកិច្ចរបស់ខ្លួន។ជាពីសេសត្រូវបន្តពង្រឹង ការល្បាតពួនស្ទាក់នៅកន្លែងដែលស្មុគស្មាញ ដើម្បីបង្ក្រាបបទល្មើសគ្រប់ប្រភេទដូចជា ក្មេងទំនើង គ្រឿងញៀន ល្បែងស៊ីសង។ជាពិសេសការបង្ក្រាបបទល្មើស ឆបោកតាមប្រព័ន្ធបច្ចេកវិទ្យា(Online Scams) និងត្រួតពិនិត្យ បង្ក្រាបការលួចលាក់ចូលមកស្នាក់នៅ របស់ជនបរទេសដោយខុសច្បាប់ ផងដែរ។

លោក ឧត្តមសេនីយ៍ទោ ម៉ែន លី ក៏បានធ្វើការកោតសរសើរនិងវាយតម្លៃខ្ពស់ ដល់កងកម្លាំងទាំងអស់ នៃស្នងការដ្ឋាននគរបាលខេត្តតាកែវ ដែលកន្លងមកបានបំពេញតួនាទីភារកិច្ចរបស់ខ្លួន ប្រកបដោយការទទួលខុសត្រូវខ្ពស់។ក្នុងការរក្សាសន្តិសុខ សណ្តាប់ធ្នាប់ និងសុវត្ថិភាពបានល្អ ជូនប្រជាពលរដ្ឋក្នុងមូលដ្ឋាន ក៏ដូចសង្គមជាតិ។

លោកឧត្តមសេនីយ៍ទោ ស្នងការនគរបាលខេត្ត ក៏បានក្រើនរំលឹកដល់កងកម្លាំងទាំងអស់ ត្រូវបង្កើនការងារផ្សព្វផ្សាយ គោលនយោបាយ ភូមិ-ឃុំ-សង្កាត់ មានសុវត្ថិភាព តាមរយៈការធ្វើវេទិការសាធារណៈ ដល់មហាជនគ្រប់ស្រទាប់វណ្ណៈ។ដើម្បីលើកកម្ពស់ការយល់ដឹង និងចូលរួមអនុវត្តឱ្យមានលទ្ធផលល្អប្រសើរ ក្នុងការចូលរួមសហការ បង្ការទប់ស្កាត់បទល្មើសគ្រប់ប្រភេទ តាមផែនការយុទ្ធសាស្រ្ត របស់រាជរដ្ឋាភិបាលនីតិកាលទី៧បានកំណត់៕

ដោយ៖ អ៊ុច សៀង