AKP ភ្នំពេញ ថ្ងៃទី២៧ ខែកុម្ភៈ ឆ្នាំ២០២៦ -- អ៊ីរ៉ង់ និងសហរដ្ឋអាមេរិក បានធ្វើកិច្ចចរចាដោយប្រយោលអស់រយៈពេលជាច្រើនម៉ោងកាលពីថ្ងៃព្រហស្បតិ៍ នៅទីក្រុងហ្សឺណែវ ស្តីពីកិច្ចចរចានុយក្លេអ៊ែររបស់ទីក្រុងតេអេរ៉ង់ ដែលត្រូវបានចាត់ទុកថាជាឱកាសចុងក្រោយសម្រាប់ការទូត ខណៈដែលសហរដ្ឋអាមេរិកបានប្រមូលផ្តុំកងនាវាយន្តហោះ និងនាវាចម្បាំងទៅកាន់តំបន់មជ្ឈិមបូព៌ា ដើម្បីដាក់សម្ពាធលើទីក្រុងតេអេរ៉ង់ឱ្យចូលទៅក្នុងកិច្ចព្រមព្រៀងមួយ។

ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ចង់បានកិច្ចព្រមព្រៀងមួយដើម្បីទប់ស្កាត់កម្មវិធីនុយក្លេអ៊ែររបស់អ៊ីរ៉ង់ ហើយលោកមើលឃើញឱកាសមួយ ខណៈដែលប្រទេសនេះកំពុងតស៊ូនៅក្នុងប្រទេសជាមួយនឹងការប្រឆាំងកាន់តែខ្លាំងឡើង បន្ទាប់ពីមានការតវ៉ាទូទាំងប្រទេសកាលពីខែមុន។ ទន្ទឹមនឹងនេះ អ៊ីរ៉ង់បានអះអាងថា ខ្លួនចង់បន្តបង្កើនសារធាតុអ៊ុយរ៉ាញ៉ូម បើទោះបីជាកម្មវិធីរបស់ខ្លួនស្ថិតក្នុងស្ថានភាពខូចខាតក៏ដោយ បន្ទាប់ពីលោក ត្រាំ បានបញ្ជាឱ្យមានការវាយប្រហារកាលពីខែមិថុនា ទៅលើទីតាំងនុយក្លេអ៊ែរចំនួនបីរបស់សាធារណរដ្ឋអ៊ីស្លាមមួយនេះ ដែលជាផ្នែកមួយនៃសង្គ្រាមរយៈពេល ១២ថ្ងៃកាលពីឆ្នាំមុន។

ប្រសិនបើការវាយប្រហាររបស់សហរដ្ឋអាមេរិកកើតឡើង អ៊ីរ៉ង់បាននិយាយថា មូលដ្ឋានយោធាអាម៉េរិកទាំងអស់នៅមជ្ឈិមបូព៌ា នឹងត្រូវបានចាត់ទុកថាជាគោលដៅស្របច្បាប់ ដែលធ្វើឱ្យសមាជិកយោធាអាម៉េរិករាប់ម៉ឺននាក់ប្រឈមនឹងហានិភ័យ។ អ៊ីរ៉ង់ក៏បានគំរាមកំហែងវាយប្រហារអ៊ីស្រាអែលផងដែរ ដែលនេះមានន័យថា សង្គ្រាមក្នុងតំបន់អាចនឹងផ្ទុះឡើងម្តងទៀតនៅទូទាំងតំបន់មជ្ឈិមបូព៌ា៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)