AKP ភ្នំពេញ ថ្ងៃទី២១ ខែមេសា ឆ្នាំ២០២៦
ឯកឧត្តម លុយ ដាវីត ឯកអគ្គរាជទូតព្រះរាជាណាចក្រកម្ពុជា ប្រចាំសាធារណរដ្ឋបារាំង និងលោកជំទាវ ព្រមទាំងមន្រ្តីការទូតទាំងអស់ បានចូលរួមអបអរសាទរបុណ្យចូលឆ្នាំប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ នៅវត្តមុនីសិក្ខារាម ស្ថិតនៅ Couilly Pont-Aux-Dames ប្រទេសបារាំង កាលពីថ្ងៃទី១៩ ខែមេសា ឆ្នាំ២០២៦ ។ ក្នុងពិធីបុណ្យចូលឆ្នាំនេះ ក៏មានការអញ្ជើញចូលរួមពីអភិបាលក្រុង Couilly និងបងប្អូនប្រជាពលរដ្ឋមកពីគ្រប់តំបន់នៃប្រទេសបារាំងចូលរួមយ៉ាងច្រើនកុះករ អធិកអធម ប្រមណជាង ១ពាន់នាក់។

ក្នុងឱកាសនោះ ឯកឧត្តម លុយ ដាវីត បានពាំនាំនូវការសួរសុខទុក្ខ និងសារជូនពររបស់ថ្នាក់ដឹកនាំ ប្រគេនព្រះសង្ឃ និងជូនដល់បងប្អូនប្រជាពលរដ្ឋទាំងអស់ដែលកំពុងរស់នៅប្រទេសបារាំងក្នុងឱកាសបុណ្យចូលឆ្នាំថ្មីនេះ និងបានសម្តែងនូវអំណរគុណយ៉ាងជ្រាលជ្រៅចំពោះលោកស្រីអភិបាលក្រុង Couilly ដែលបានចូលរួមបុណ្យចូលឆ្នាំប្រពៃណីជាតិខ្មែរជាមួយប្រជាជនកម្ពុជា ដែលនេះ ជាការបង្ហាញពីស្មារតីនៃការបើកចំហ និងគាំទ្រដល់សកម្មភាពសាសនា និងវប្បធម៌ក្នុងដែនសមត្ថកិច្ចរបស់លោកស្រី។ ឯកឧត្តម ឯកអគ្គរាជទូត បានជម្រាបជូនបងប្អូនប្រជាពលរដ្ឋអំពីទំនាក់ទំនងពិសេស ប្រទេសកម្ពុជា និងបារាំង ដែលឆ្នាំនេះ កម្ពុជា នឹងធ្វើជាម្ចាស់ផ្ទះរៀបចំកិច្ចប្រជុំហ្វ្រង់កូហ្វូនីលើកទី២០ ដែលមានប្រមុខរដ្ឋ/រដ្ឋាភិបាល ប្រទេសនិយាយភាសាបារាំងចូលរួមប្រមាណជាង៩០ប្រទេស/ស្ថាប័ន។ ជាមួយគ្នានេះផងដែរ ភាពជាដៃគូរជាមួយបារាំងកាន់តែមានភាពលេចធ្លោថែមទៀត តាមរយៈនៃដំណើរទស្សនកិច្ចផ្លូវរដ្ឋ របស់ ឯកឧត្តមប្រធានាធិបតី Emmanuel Macron មកប្រទេសកម្ពុជា ក្នុងឱកាសនៃកិច្ចប្រជុំហ្វ្រង់កូហ្វូនី ដែលនេះជាដំណើរទស្សនកិច្ចជាប្រវត្តិតិសាស្ត្ររបស់ប្រធានាធិបតីបារាំងលើកទី២ ក្នងរយៈពេល៦០ឆ្នាំ ចុងក្រោយបន្ទាប់ពីទស្សកិច្ចរបស់ឧត្តមសេនីយ៍ Charles De Gualle កាលពីឆ្នាំ១៩៦៦។

ជាមួយគ្នានេះដែរ ឯកឧត្ដមឯកអគ្គរាជទូតបានបញ្ជាក់បន្ថែមថា ទំនាក់ទំនងរវាងបារាំង និងកម្ពុជា បានឈានចូលដល់បរិបទថ្មីមួយ តាមរយៈការពិគ្រោះយោបល់ផ្នែកនយោបាយ ការផ្លាស់ប្តូរទស្សនកិច្ចកម្រិតខ្ពស់។ ទន្ទឹមនេះ បារាំង គាំទ្រដំណោះស្រាយដោយសន្តិវិធីនូវបញ្ហាព្រំដែន រវាងកម្ពុជា-ថៃ ដែលឈរលើច្បាប់អន្តរជាតិ និងត្រៀមផ្តល់ឯកសារចាំបាច់នានា ដើម្បីប្រើប្រាស់ផ្លូវច្បាប់សម្រាប់ភាគីជម្លោះទាំងពីរ។
សូមជម្រាបជូនថា ពិធីបុណ្យចូលឆ្នាំថ្មីនេះ ដែលបានរៀបចំនៅប្រទេសបារាំង បានប្រារព្ធក្នុងបរិយាកាសជាគ្រួសារសហគមន៍ខ្មែរតែមួយ ប្រកបដោយទឹកមុខរីរាយ និងស្និទស្នាល៕

ដោយ៖ រិទ្ធី, ប្រភព៖ ស្ថានឯកអគ្គរាជទូតកម្ពុជាប្រចាំប្រទេសបារាំង