AKP ភ្នំពេញ ថ្ងៃទី២៧ ខែកុម្ភៈ ឆ្នាំ២០២៦ -- អ្នកនាំពាក្យក្រសួងពាណិជ្ជកម្មចិនបាននិយាយកាលពីថ្ងៃព្រហស្បតិ៍ថា ប្រទេសចិនមានឆន្ទៈក្នុងការធ្វើការជាមួយសហរដ្ឋអាមេរិក ដើម្បីរក្សាការអភិវឌ្ឍដែលមានសុខភាពល្អ ស្ថិរភាព និងប្រកបដោយចីរភាពនៃទំនាក់ទំនងសេដ្ឋកិច្ច និងពាណិជ្ជកម្មទ្វេភាគី។

ការកត់សម្គាល់នេះត្រូវបានធ្វើឡើងដោយអ្នកនាំពាក្យ លោក ហេ យ៉ុងគាន (He Yongqian) នៅក្នុងសន្និសីទសារព័ត៌មានជាប្រចាំ ដើម្បីឆ្លើយតបទៅនឹងសំណួរទាក់ទងនឹងការពិគ្រោះយោបល់សេដ្ឋកិច្ច និងពាណិជ្ជកម្មចិន-សហរដ្ឋអាមេរិក លើកទី៦ នាពេលខាងមុខ។

អ្នកនាំពាក្យរូបនេះបាននិយាយថា ភាគីទាំងពីរបានរក្សាការទំនាក់ទំនងគ្រប់កម្រិតតាមរយៈយន្តការពិគ្រោះយោបល់សេដ្ឋកិច្ច និងពាណិជ្ជកម្មចិន-សហរដ្ឋអាមេរិក។

លោក ហេ បាននិយាយថា ប្រទេសចិនមានឆន្ទៈក្នុងការសម្របសម្រួលជាមួយភាគីសហរដ្ឋអាមេរិក ដើម្បីគាំទ្រការឯកភាពគ្នាដែលប្រមុខរដ្ឋទាំងពីរបានឈានដល់ទាំងនៅក្នុងកិច្ចប្រជុំឆ្នាំ២០២៥ របស់ពួកគេនៅទីក្រុងប៊ូសាន និងក្នុងអំឡុងពេលនៃការសន្ទនាតាមទូរស័ព្ទថ្មីៗនេះរបស់ពួកគេនៅថ្ងៃទី៤ ខែកុម្ភៈ។

អ្នកនាំពាក្យរូបនេះបានបន្ថែមថា ប្រទេសចិនត្រៀមខ្លួនរួចជាស្រេចដើម្បីធ្វើការជាមួយភាគីសហរដ្ឋអាមេរិកតាមរយៈការពិគ្រោះយោបល់ដោយស្មើភាពគ្នាដើម្បីគ្រប់គ្រងភាពខុសគ្នាឱ្យបានត្រឹមត្រូវ ពង្រីកកិច្ចសហប្រតិបត្តិការជាក់ស្តែង និងរក្សាការអភិវឌ្ឍដែលមានសុខភាពល្អស្ថិរភាព និងប្រកបដោយចីរភាពនៃទំនាក់ទំនងសេដ្ឋកិច្ច និងពាណិជ្ជកម្មទ្វេភាគី ដើម្បីផ្តល់ផលប្រយោជន៍កាន់តែប្រសើរដល់ប្រទេសទាំងពីរ និងពិភពលោកទាំងមូល៕

ដោយ៖ មូល មិនា (ប្រភព៖ ភីបផលដេលី)