AKP ភ្នំពេញ ថ្ងៃទី១៥ ខែតុលា ឆ្នាំ២០២៥--គណៈប្រតិភូជាន់ខ្ពស់ក្រសួងអប់រំ យុវជន និងកីឡា នៃព្រះរាជាណាចក្រកម្ពុជា និងថ្នាក់ដឹកនាំមន្ទីរអប់រំខេត្តជុងឆុងណាមដូ នៃសាធារណរដ្ឋកូរ៉េបានផ្លាស់ប្ដូរបទពិសោធន៍ និងបញ្ជាក់ពីការពង្រឹងកិច្ចសហប្រតិបត្តិការទ្វេភាគីជាមួ យគ្នាក្នុងវិស័យអប់រំ ជាពិសេសលើការលើកកម្ពស់សុខភាពសិក្សា ការកសាងសមត្ថភាពមន្ត្រីអប់រំ និងការប្រើប្រាស់បច្ចេកវិទ្យាឌីជីថល ដើម្បីគាំទ្រដល់ការអភិវឌ្ឍវិស័យអប់រំនៅកម្ពុជា។ 

ក្នុងអំឡុងពេលនៃការបំពេញទស្សនកិច្ចនៅសាធារណរដ្ឋកូរ៉េ ថ្ងៃទី១៤ ខែតុលា ឆ្នាំ២០២៦ លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា បានអញ្ជើញជួបសម្ដែងការគួរសម និងពិភាក្សាការងារជាមួយលោក Lee Byong-do ប្រធានមន្ទីរអប់រំខេត្តជុងឆុងណាមដូ នៃសាធារណរដ្ឋកូរ៉េ ដោយភាគីទាំងពីរបានផ្លាស់ប្ដូរបទពិសោធន៍ និងបញ្ជាក់ពីការពង្រឹងកិច្ចសហប្រតិបត្តិការទ្វេភាគីជា មួយគ្នាក្នុងវិស័យអប់រំ ជាពិសេសលើការលើកកម្ពស់សុខភាពសិក្សា ការកសាងសមត្ថភាពមន្ត្រីអប់រំ និងការប្រើប្រាស់បច្ចេកវិទ្យាឌីជីថល ដើម្បីគាំទ្រដល់ការអភិវឌ្ឍវិស័យអប់រំនៅកម្ពុជា ដែលនឹងផ្ដោតលើកិច្ចសហប្រតិបត្តិការសំខាន់ៗមួយចំនួន រួមមាន៖ ១.ការជំរុញកិច្ចសហប្រតិបត្តិការរវាងសាលារៀន៖ សម្របសម្រួលតាមរយៈមន្ទីរអប់រំខេត្តជុងឆុងណាមដូ ដើម្បីបង្កើតទំនាក់ទំនង និងកិច្ចសហការដោយផ្ទាល់រវាងសាលារៀននៃភាគីទាំងពីរ ក្នុងការលើកកម្ពស់សុខភាពសិក្សានៅកម្ពុជា។

២.ការកសាងសមត្ថភាពធនធានមនុ ស្ស៖ ជំរុញការបណ្ដុះបណ្ដាលមន្ត្រីជំនាញផ្នែកសុខភាពសិក្សា នាយកសាលា និងគ្រូបង្រៀន តាមរយៈកម្មវិធីទស្សនកិច្ចសិក្សា ការផ្លាស់ប្ដូរបទពិសោធ និងការចែករំលែកជំនាញក្នុងការអប់រំសុខភាព។

៣.ការប្រើប្រាស់បច្ចេកវិទ្យាឌីជីថល៖ ពង្រឹងកិច្ចសហប្រតិបត្តិការក្នុងការប្រើប្រាស់បច្ចេកវិទ្យាឌីជីថល ដើម្បីផ្សព្វផ្សាយចំណេះដឹងអំពីសុខភាព និងអនាម័យដល់សិស្សានុសិស្ស ស្របតាមកិច្ចសហប្រតិបត្តិការដែលសាធារណរដ្ឋកូរ៉េ បាន និងកំពុងគាំទ្រកម្ពុជាលើវិស័យបច្ចេកវិទ្យាព័ត៌មាន និងសារគមនាគមន៍ (ICT) និងបច្ចេកវិទ្យាអប់រំ (EdTech)។

ក្នុងឱកាសនោះ លោកជំទាវបណ្ឌិតរដ្ឋលេខាធិការប្រចាំការ បានថ្លែងអំណរគុណយ៉ាងជ្រាលជ្រៅចំពោះការទទួលបដិសណ្ឋារកិច្ចយ៉ាងកក់ក្ដៅ និងបានវាយតម្លៃខ្ពស់ចំពោះសមិទ្ធផល និងបទពិសោធន៍ល្អៗក្នុងវិស័យអប់រំរបស់ខេត្តជុងឆុងណាមដូ ដែលជាមេរៀន និងជាបទពិសោធដ៏មានតម្លៃសម្រាប់កម្ពុជាក្នុងការសិក្សា និងអនុវត្តឱ្យសមស្របតាមបរិបទជាក់ស្ដែង។ តាងនាមក្រសួងអប់រំ យុវជន និងកីឡា លោកជំទាវបណ្ឌិតរដ្ឋលេខាធិការប្រចាំការបានថ្លែងអំណរគុណចំពោះរដ្ឋាភិបាល និងប្រជាជននៃសាធារណរដ្ឋកូរ៉េ តាមរយៈក្រសួងអប់រំ និងទីភ្នាក់ងារសហប្រតិបត្តិការអន្តរជាតិកូរ៉េ (KOICA) ដែលបាន និងកំពុងផ្ដល់ការគាំទ្រយ៉ាងសកម្មដល់ការអភិវឌ្ឍធន ធានមនុស្ស និងការលើកកម្ពស់គុណ ភាពអប់រំនៅកម្ពុជា៕

ដោយ៖ ចាន់ សុភឿន ,ប្រភព៖ ក្រសួងអប់រំ