AKP ភ្នំពេញ ថ្ងៃទី១៤ ខែតុលា ឆ្នាំ២០២៦--ក្នុងដំណើរបំពេញទស្សនកិច្ចនៅសាធារណរដ្ឋកូរ៉េ នាថ្ងៃទី១៣ ខែតុលា ឆ្នាំ២០២៦ លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា បានដឹកនាំក្រុមការងារធ្វើទស្សនកិច្ច និងជួបពិភាក្សាការងារជាមួយថ្នាក់ដឹកនាំសាកលវិទ្យាល័យជាតិគង់ជូ ដោយភាគីទាំងពីរបានផ្លាស់ប្តូរ យោបល់ និងបទពិសោធន៍ ដែលផ្តោតលើចំណុចសំខាន់ៗ រួមមាន៖

១.ការលើកកម្ពស់សុខភាពសិក្សា៖ ស្វែងយល់អំពីប្រព័ន្ធគ្រប់គ្រង និងយន្តការអនុវត្តការងារសុខភាពសិក្សាតាមបែបវិទ្យាសាស្ត្ររបស់សាកលវិទ្យាល័យជាតិគង់ជូ ដើម្បីប្រមូលធាតុចូល និងបទពិសោធន៍ល្អៗសម្រាប់ពិចារណាអនុវត្ត និងកែលម្អការងារសុខភាពសិក្សានៅកម្ពុជា។ ២.ការពង្រឹងកិច្ចសហប្រតិបត្តិការទ្វេភាគី៖ ជំរុញកិច្ចសហប្រតិបត្តិការក្នុងការអភិវឌ្ឍធនធានមនុស្ស ការផ្លាស់ប្តូរកម្មវិធីសិក្សា និងការចែករំលែកបទពិសោធន៍រវាងគ្រឹះស្ថានឧត្តមសិក្សានៃប្រទេសទាំងពីរ ដើម្បីរួមចំណែកលើកកម្ពស់គុណភាពអប់រំ និងការអភិវឌ្ឍសមត្ថភាពធនធានមនុស្ស។ ៣.ការលើកកម្ពស់ឱកាសអាហារូបករណ៍ និងការផ្លាស់ប្តូរបទពិសោធន៍៖ ជំរុញការបង្កើនឱកាសទទួលបានអាហារូបករណ៍ និងការរៀបចំកម្មវិធីផ្លាស់ប្តូរទស្សនកិច្ចសិក្សាសម្រាប់មន្ត្រីអប់រំ សាស្ត្រាចារ្យ និងនិស្សិតកម្ពុជា ដើម្បីសិក្សាស្វែងយល់ និងទទួលបានបទពិសោធន៍ថ្មីៗនៅសាធារណរដ្ឋកូរ៉េ។

ដំណើរទស្សនកិច្ចនេះបានបញ្ចប់ទៅប្រកបដោយផ្លែផ្កា និងស្មារតីសហប្រតិបត្តិការជិតស្និទ្ធ ដែលជាសក្ខីភាពថ្មីមួយទៀតក្នុងការពង្រឹងទំនាក់ទំនងភាពជាដៃគូរវាងក្រសួងអប់រំ យុវជន និងកីឡានៃកម្ពុជា ជាមួយស្ថាប័នឧត្តមសិក្សានៃសាធារណរដ្ឋកូរ៉េ សំដៅរួមចំណែកអភិវឌ្ឍគុណភាពអប់រំនៅកម្ពុជាឱ្យកាន់តែប្រសើរឡើង៕

ដោយ ចាន់ សុភឿន (ប្រភព៖ ក្រសួងអប់រំ)