AKP បន្ទាយមានជ័យ ថ្ងៃទី១៤ ខែតុលា ឆ្នាំ២០២៦– រដ្ឋបាលខេត្តបន្ទាយមានជ័យ បានប្រារព្ធពិធីគោរពព្រះវិញ្ញាណក្ខន្ធ ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» ក្នុងខួប ១៤ឆ្នាំ នៃការយាងចូលព្រះទិវង្គត ដើម្បីរំលឹកដល់ព្រះរាជគុណូបការៈដ៏ឧត្តុង្គឧត្តម និងបង្ហាញនូវកតញ្ញូតាធម៌ដ៏ជ្រាលជ្រៅចំពោះព្រះមហាវីរក្សត្រ ដែលបានបូជាព្រះកាយពល និងព្រះបញ្ញាញាណ ដើម្បីឯករាជ្យភាព បូរណភាពទឹកដី និងឯកភាពជាតិខ្មែរ។

ពិធីនេះបានប្រព្រឹត្តទៅនៅព្រឹកថ្ងៃពុធ ៣កើត ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៤ ខែតុលា ឆ្នាំ២០២៦ ក្រោមអធិបតីភាពឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ដោយមានការអញ្ជើញចូលរួមពីថ្នាក់ដឹកនាំក្រុមប្រឹក្សាខេត្ត មន្ត្រីរាជការ កងកម្លាំងប្រដាប់អាវុធទាំងបីប្រភេទ ប្រជាពលរដ្ឋ និងសិស្សានុសិស្សជាច្រើនរូប ក្នុងបរិយាកាសពោរពេញដោយសេចក្តីគោរពបូជា ការសោកសង្រេង និងការដឹងគុណចំពោះព្រះមហាករុណាទិគុណរបស់ព្រះអង្គ។

ក្នុងពិធីដ៏មានអត្ថន័យជាប្រវត្តិសាស្ត្រនេះ ថ្នាក់ដឹកនាំ និងអ្នកចូលរួមបាននាំគ្នាថ្វាយគ្រឿងសក្ការៈបូជាចំពោះព្រះឆាយាលក្ខណ៍ និងសម្តែងនូវការគោរពព្រះវិញ្ញាណក្ខន្ធព្រះបរមរតនកោដ្ឋ ព្រមទាំងសម្រួងកាយ វាចា ចិត្ត ឧទ្ទិសថ្វាយព្រះរាជមហាកុសលដល់ព្រះវិញ្ញាណក្ខន្ធព្រះអង្គ សូមទ្រង់បានយាងទៅកាន់ព្រះបរមសុគតិភព។ បន្ទាប់មក ព្រះសង្ឃបាននិមន្តចម្រើនសត្តប្បករណាភិធម្ម និងបង្សុកូល ដើម្បីឧទ្ទិសព្រះរាជមហាកុសលថ្វាយព្រះវិញ្ញាណក្ខន្ធព្រះមហាវីរក្សត្រ។

ក្នុងឱកាសនោះ ឯកឧត្តម អ៊ុំ រាត្រី បានបង្ហាញនូវមនោសញ្ចេតនាគោរពស្រឡាញ់ និងកតញ្ញូតាធម៌ចំពោះព្រះករុណា ព្រះបរមរតនកោដ្ឋ ដែលបានបន្សល់ទុកនូវព្រះរាជស្នាព្រះហស្ត និងព្រះគុណូបការៈដ៏ធំធេងចំពោះជាតិមាតុភូមិ និងប្រជារាស្ត្រខ្មែរ ជាពិសេសព្រះរាជបេសកកម្មដ៏ឧត្តុង្គឧត្តមក្នុងការតស៊ូទាមទារឯករាជ្យជាតិពីអាណានិគមនិយមបារាំង ការការពារបូរណភាពទឹកដី និងការលើកកម្ពស់សាមគ្គីភាព ឯកភាពជាតិ។

ព្រះរាជបេសកកម្មរបស់ព្រះបរមរតនកោដ្ឋ បានក្លាយជាផ្នែកមួយដ៏សំខាន់ក្នុងប្រវត្តិសាស្ត្រកម្ពុជា និងជាមូលដ្ឋានគ្រឹះនៃមោទនភាពជាតិ។ ព្រះអង្គបានបង្ហាញពីព្រះរាជឆន្ទៈដ៏មោះមុតក្នុងការបម្រើប្រទេសជាតិ ដោយផ្តោតលើការទាមទារសិទ្ធិសម្រេចវាសនាខ្លួនឯង ការរក្សាអធិបតេយ្យភាពជាតិ និងការបង្រួបបង្រួមប្រជាជនខ្មែរឱ្យមានស្មារតីរួមក្នុងការកសាងមាតុភូមិ។

ការប្រារព្ធពិធីគោរពព្រះវិញ្ញាណក្ខន្ធនៅខេត្តបន្ទាយមានជ័យ នាឱកាសនេះ មិនមែនត្រឹមតែជាការរំលឹកខួបនៃការយាងចូលព្រះទិវង្គតរបស់ព្រះមហាវីរក្សត្រប៉ុណ្ណោះទេ ប៉ុន្តែថែមទាំងជាការរំលឹកដល់ប្រជាជនខ្មែរគ្រប់ជំនាន់ឱ្យចងចាំពីតម្លៃនៃឯករាជ្យភាព សន្តិភាព និងឯកភាពជាតិ ដែលបុព្វបុរសខ្មែរបានខិតខំតស៊ូ និងបូជាដើម្បីទទួលបានមក។

ជាមួយគ្នានេះ ការចូលរួមរបស់មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ និងសិស្សានុសិស្ស ក៏បានបង្ហាញពីស្មារតីចងចាំរួម និងការបន្តវប្បធម៌នៃការគោរពដឹងគុណចំពោះព្រះមហាក្សត្រ ដែលបានបំពេញព្រះរាជកិច្ចបម្រើជាតិមាតុភូមិ។ ជាពិសេស សម្រាប់យុវជនជំនាន់ក្រោយ ពិធីនេះជាឱកាសមួយក្នុងការស្វែងយល់ពីប្រវត្តិសាស្ត្រជាតិ ស្គាល់ពីព្រះរាជគុណូបការៈរបស់ព្រះអង្គ និងយល់កាន់តែច្បាស់ពីតួនាទីរបស់ខ្លួនក្នុងការថែរក្សាមរតកជាតិ។

ស្មារតីដឹងគុណចំពោះព្រះបរមរតនកោដ្ឋ ក៏ជាការរំឭកឱ្យប្រជាជនខ្មែរបន្តរួបរួមគ្នា ថែរក្សាសន្តិភាព ស្ថិរភាពសង្គម និងសាមគ្គីភាពជាតិ ព្រមទាំងចូលរួមអភិវឌ្ឍប្រទេសជាតិឱ្យកាន់តែរីកចម្រើន។ ការចងចាំព្រះរាជបេសកកម្មរបស់ព្រះអង្គ គឺជាការថែរក្សាតម្លៃប្រវត្តិសាស្ត្រ និងជាការបណ្តុះស្មារតីស្នេហាជាតិដល់កូនខ្មែរគ្រប់រូប ឱ្យចេះស្រឡាញ់ និងការពារអ្វីៗដែលជាមរតកដ៏មានតម្លៃរបស់ជាតិ។

គួររំលឹកថា ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» បានប្រសូតនៅថ្ងៃទី៣១ ខែតុលា ឆ្នាំ១៩២២ និងបានយាងចូលព្រះទិវង្គតនៅថ្ងៃទី១៥ ខែតុលា ឆ្នាំ២០១២ ក្នុងព្រះជន្មាយុ ៩០ព្រះវស្សា នៅទីក្រុងប៉េកាំង សាធារណរដ្ឋប្រជាមានិតចិន។ ព្រះរាជគុណូបការៈរបស់ព្រះអង្គចំពោះជាតិមាតុភូមិ និងប្រជារាស្ត្រខ្មែរ នឹងបន្តស្ថិតក្នុងការចងចាំ និងការគោរពដឹងគុណរបស់ប្រជាជនខ្មែរជានិច្ច៕

ដោយ៖ ឈុន សារ៉ាត