AKP ព្រះសីហនុ ថ្ងៃទី១៦ ខែកញ្ញា ឆ្នាំ២០២៦-- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ នាព្រឹកថ្ងៃពុធទី១៦ ខែកញ្ញា ឆ្នាំ២០២៦ អញ្ជើញចូលរួមពិធីសម្ពោធជាផ្លូវការការដឹកជញ្ជូនអង្ករ ១០ ០០០តោន តាមផ្លូវទឹក (នាវា) ជាផ្លូវការ រវាងក្រុមហ៊ុន ស៊ីធី រ៉ាយស៍ អ៊ីមផត អិចផត ខូអិលធីឌី នៅទីលានកំពង់ផែស្វយ័តក្រុងព្រះសីហនុ ក្រោមអធិបតីភាព ឯកឧត្តម ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ដែលមានទីតាំងស្ថិតនៅសង្កាត់លេខ៣ ក្រុងព្រះសីហនុ។
ឯកឧត្តម លូ គឹមឈន់ ប្រតិភូរាជរដ្ឋាភិបាលទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ បានធ្វើរបាយការណ៍ពិធីសម្ពោធជាផ្លូវការការដឹកជញ្ជូនអង្ករ ១០ ០០០តោន ជាផ្លូវការតាមផ្លូវទឹក (នាវា) រវាងក្រុមហ៊ុន ស៊ីធី រ៉ាយស៍ អ៉ីមផត អិចផត ខូអិលធីឌនាពេលនេះ តាងនាមថ្នាក់ដឹកនាំ និងបុគ្គលិកកំពង់ផែទាំងអស់ សូមថ្លែងអំណរគុណឯកឧត្តមរដ្ឋមន្ត្រី និងឯកឧត្តម អភិបាលខេត្តព្រះសីហនុ បានខិតខំកៀរគរទាក់ទាញវិនិយោគិន និងបើកទីផ្សារនាំចេញ ព្រមទាំងអ្នកប្រើប្រាស់ផែទាំងអស់ ជាពិសេសក្រុមហ៊ុននាវា ដែលជ្រើសរើសយក ក.ស.ស ក្នុងការតភ្ជាប់កម្ពុជាទៅកាន់ទីផ្សារពិភពលោក ដើម្បីចូលរួមជំរុញកំណើនសេដ្ឋកិច្ចជាតិ។ ព្រឹត្តិការណ៍ជាប្រវត្តិសាស្ត្រថ្ងៃនេះ គឺជាសក្ខីភាពមួយទៀតដែលឆ្លុះបញ្ចាំងអំពីសក្តានុពល និងការបោះជំហានរីកចម្រើនថ្មីមួយកម្រិតទៀតនៃវិស័យកសិ-ពាណិជ្ជកម្ម និងភស្តុភារកម្មដឹកជញ្ជូនតាមផ្លូវសមុទ្ររបស់កម្ពុជា។ ការនាំចេញអង្កររបស់កម្ពុជាចំនួន ១០,០០០តោន តាមនាវាទំនិញទូទៅនាពេលនេះ។

មិនត្រឹមតែជាជោគជ័យដ៏ត្រចះត្រចង់របស់ក្រុមហ៊ុន CITY RICE ក្នុងការចាប់ដៃគូពាណិជ្ជកម្មជាមួយក្រុមហ៊ុន DILAI TRADING និងស្ថាប័ន FOOD TERMINAL INCORPORATED នៃសាធារណរដ្ឋហ្វីលីពីនប៉ុណ្ណោះទេ ប៉ុន្តែគឺជាការបើកទំព័រថ្មីនៃជម្រើសក្នុងការដឹកជញ្ជូនជួយកាត់ បន្ថយថ្លៃដើមឡូជីស្លឹក ជំរុញល្បឿននៃការនាំ ចេញ និងលើកកម្ពស់ភាព ប្រកួតប្រជែងរបស់អង្ករកម្ពុជានៅលើទីផ្សារអន្តរជាតិ។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអបអរសាទរដែលក្រុមហ៊ុន CITY RICE ចាប់ដៃគូជាមួយប្រទេសហ្វីលីពីននាំអង្កររាយ ចូលទីផ្សារប្រទេសហ្វីលីពីន ដើម្បីពង្រឹងគុណភាពអង្ករកម្ពុជាដែលជាប់លេខ១ជាប្រចាំ។ ម្យ៉ាងទៀតការដឹកជញ្ជូនទំនិញរាយ (អង្ករ) ជាការប្រកួតប្រជែងតម្លៃនៃការដឹកជញ្ជូនតាមផ្លូវសមុទ្រ នូវទំនិញរាយនាពេលនេះ ដែលជាគន្លឹះមួយសំខាន់ក្នុងការប្រកួតប្រជែងក្នុងការដឹកជញ្ជូនសម្រាប់កំពង់ផែស្វយ័តក្រុងព្រះសីហនុ។

ឯកឧត្តមរដ្ឋមន្ត្រីក្រសួងកសិកម្មបានបន្តថា កំពង់ផែរបស់យើងជាកំពង់ផែសម្រាប់ដឹកជញ្ជូនទូរកុងតឺន័រ មិនមែនសម្រាប់ដឹកទំនិញរាយនោះទេ។ ការដឹកជញ្ជូនអង្កររាយនាពេលនេះវាមានតម្លៃថោក និងមានភាពងាយស្រួលជាងការដឹកជញ្ជូនតាមកុងតឺន័រ ព្រោះវាជួយកាត់បន្ថយថ្លៃដើម និងជាការប្រកួតប្រជែងលើទីផ្សារថែមទៀតផង។ ការដឹកជញ្ជូនទំនិញរាយនេះ មានការលំបាក សម្រាប់កំពង់ផែរបស់យើង ដែលជាការខិតខំប្រឹងប្រែងបន្ថែមទៀត ដើម្បីសម្រេចបានការដឹកជញ្ជូនទៅកាន់ប្រទេសហ្វីលីពីន ដែលជារបត់ថ្មីមួយទៀតលើទីផ្សារកសិផល គឺទីផ្សារអង្កររបស់កម្ពុជាឆ្នាំ២០២៦។ ចំពោះទិសដៅនៃការនាំ ចេញអង្កររបស់កម្ពុជា គឺ ឆ្ពោះទៅកាន់ទីផ្សារអន្តរជាតិមានដូចជា ចិន សហភាពអ៉ឺរ៉ុប និងហ្វីលីពីន ការនាំចេញនេះ វាផ្សារភ្ជាប់ស្ថាប័នរដ្ឋ និងឯកជន ព្រោះទំនិញកសិកម្មតម្រូវឱ្យមានការនាំចេញ នាំចូលទៅក្រៅប្រទេស។

ថ្ងៃនេះយើងសូមអបអរសាទរវិស័យឯកជន ដែលបាននាំអង្កររាយទៅកាន់ប្រទេសហ្វីលីពីន ហើយការដឹកជញ្ជូនប្រព្រឹត្តទៅបានល្អ សូមលើកទឹកចិត្តជ្រើស រើសផ្លូវដឹកជញ្ជូនអង្កររាយរបស់យើងទៅកាន់ទីផ្សារពិភពលោក ហើយនេះក៏ជាលើកទី១ដែរ ដែលអ្នកទិញបានមកដល់ខេត្តព្រះសីហនុ ហើយអ្វីដែលកើតឡើងនាពេលនេះ គឺកើតចេញពីសក្តានុពលប្រទេសនាំចេញ និងប្រទេសនាំចូល។ ហើយប្រទេសហ្វីលីពីនជាប្រទេសដែលមានកោះច្រើន មានកំពង់ផែច្រើនងាយស្រួលដល់ការនាំអង្ករកម្ពុជាទៅកាន់ប្រទេសហ្វីលីពីនកាន់តែច្រើនស្របតាមគោលនយោបាយរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដូច្នេះយើងត្រូវប្រើប្រាស់កំពង់ផែទឹកជ្រៅរបស់យើងឪ្យអស់លទ្ធភាព។ សូមអគុណរាជរដ្ឋាភិបាលដែលបានពង្រឹកកំពង់ផែរស្វយ័តក្រុងព្រះជាជំហាន ធ្វើឱ្យកំណើននៃការដឹកជញ្ជូនមានការកើនឡើងនៅខេត្តព្រះសីហនុ សូមឪ្យកំពង់ផែជំរុញការដឹកជញ្ជូន ក៏ដូចជាបង្កើនកំណើនសេដ្ឋកិច្ចជាតិ និងសេដ្ឋកិច្ចសង្គមបន្ថែមទៀតនៅពេលខាងមុខ៕

ដោយ ងូ សុមុនី