AKP ភ្នំពេញ ថ្ងៃទី១៦ ខែកញ្ញា ឆ្នាំ២០២៦ -- ឯកឧត្តមសាស្ត្រាចារ្យបណ្ឌិត អឿង ចន្ថា អនុរដ្ឋលេខាធិការ ក្រសួងធនធានទឹក និងឧតុនិយម បានអញ្ជើញចូលរួមជាវាគ្មិនកិត្តិយស ក្នុងកិច្ចពិភាក្សាទាក់ទងនឹងការចែករំលែកបទពិសោធន៍លើការគ្រប់គ្រងគម្រោង ក្រោមហិរញ្ញប្បទានធនាគារពិភពលោក (World Bank) ដែលបានរៀបចំឡើងនៅសណ្ឋាគារ ហៃយ៉ាត់ រីជិនស៊ី រាជធានីភ្នំពេញ។

កិច្ចពិភាក្សានេះ រៀបចំឡើងដោយធនាគារពិភពលោក (World Bank) ក្នុងគោលបំណងបង្កើតជាវេទិកាផ្លាស់ប្តូរ និងចែករំលែកបទពិសោធន៍ល្អៗ ព្រមទាំងមេរៀនដែលទទួលបានពីការគ្រប់គ្រង និងអនុវត្តគម្រោងនាពេលកន្លងមក រវាងតំណាងរាជរដ្ឋាភិបាល ដៃគូអភិវឌ្ឍន៍ និងអង្គភាពអនុវត្តគម្រោងនានា។

ឯកឧត្តមសាស្ត្រាចារ្យបណ្ឌិត បានចែករំលែកនូវបទពិសោធន៍គន្លឹះសំខាន់ៗចំនួន ២ចំណុច ក្នុងការគ្រប់គ្រង និងអនុវត្តគម្រោងឱ្យទទួលបានប្រសិទ្ធភាពខ្ពស់ រួមមាន៖ ទី១- ដំណាក់កាលចាប់ផ្តើមអនុវត្តគម្រោង៖ ផ្តោតលើការបង្កើនកិច្ចសហការពីគ្រប់ភាគីពាក់ព័ន្ធ ការសម្របសម្រួលរវាងស្ថាប័ន ព្រមទាំងការរៀបចំប្រព័ន្ធ និងនីតិវិធីការងារឱ្យបានរឹងមាំតាំងពីដំណាក់កាលដំបូង។ ទី២- ការកំណត់អាទិភាព និងការបង្កើតតុល្យភាពការងារ៖ ការគ្រប់គ្រងលើផ្នែកលទ្ធកម្ម ផ្នែកហិរញ្ញវត្ថុ និងផ្នែកគាំពារបរិស្ថាន និងសង្គម ក្នុងពេលដំណាលគ្នា ដើម្បីពង្រឹងសមត្ថភាពក្រុមការងារអនុវត្តគម្រោងឱ្យកាន់តែមានសក្តានុពល និងភាពប្រកបដោយប្រសិទ្ធភាព៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)