AKP ភ្នំពេញ ថ្ងៃទី១៦ ខែកញ្ញា ឆ្នាំ២០២៦ -- សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានលើកឡើងថា គិតរហូតមកដល់ពេលបច្ចុប្បន្ននេះ ប្រជាពលរដ្ឋដែលបានមកទទួលសេវាសុខភាពនៅតាមមណ្ឌលសុខភាព និងមន្ទីរពេទ្យបង្អែកស្រុក មានការកើនឡើងប្រមាណជា៨០% ។ ការលើកឡើងរបស់សម្ដេចធិបតីនាយករដ្ឋមន្រ្ដីបែបនេះ ក្នុងពិធីសម្ពោធដាក់ឱ្យប្រើប្រាស់ជាផ្លូវការ «មន្ទីរពេទ្យ ហ្លួងម៉ែ» ស្ថិតក្នុងសង្កាត់ព្រៃស ខណ្ឌដង្កោ រាជធានីភ្នំពេញ នាព្រឹកថ្ងៃទី១៦ ខែកញ្ញា ឆ្នាំ២០២៦។

ក្នុងឱកាសនោះ សម្ដេចធិបតី ហ៊ុន ម៉ាណែត បានមានប្រសាសន៍ដាក់ចេញទិសដៅបម្រើសេវាសុខភាពនៅមូលដ្ឋានទាំង២៤ម៉ោងលើ២៤ម៉ោង ដើម្បីបម្រើសេវាសុខភាពជូនពលរដ្ឋប្រកបដោយវិជ្ជាជីវៈ និងបំពេញតម្រូវជូនពួកគាត់។ សម្តេចធិបតីបានបញ្ជាក់ថា ការពង្រីកសេវាបម្រើសុខភាពគឺមានសារៈសំខាន់ ជាពិសេសដាក់គ្រូពេទ្យប្រចាំការជាប់ទាំង២៤ម៉ោង។ សម្តេចធិបតីនាយករដ្ឋមន្រ្តីបានសង្កត់ធ្ងន់ថា៖ «ខ្ញុំបានឆែកមើលនៅតាមមូលដ្ឋានគឺមានការសប្បាយចិត្ត ។ ឥឡូវកំណើននៃការប្រើប្រាស់មណ្ឌលសុខភាពនិងមន្ទីរពេទ្យបង្អែកស្រុកដូចកើនឡើង៨០% ប្រជាពលរដ្ឋដែលប្រើសេវាមានកំណើន ដោយសារមានពេទ្យគ្រប់ បើក២៤ម៉ោង គុណភាពសេវា ថ្នាំសម្ភារៈ ក៏យើងបង្កើន»។

សម្តេចធិបតី ហ៊ុន ម៉ាណែត បានបន្ថែមថា មណ្ឌលសុខភាពដែលមានលទ្ធភាពបើក២៤លើ២៤ម៉ោង នៅទូទាំងប្រទេសមានកំណើនរហូតទៅជាង៩៩% ឯណោះ ដែលនេះ បានសបញ្ជាក់ពីវិស័យសុខាភិបាលកម្ពុជា មានលក្ខណៈល្អប្រសើរ។ សម្តេចធិបតីនាយករដ្ឋមន្រ្ដីបានបន្ថែមថា តាមរយៈការសាកសួរ ពលរដ្ឋស្ទើរតែទាំងអស់បានលើកដៃចំពោះការចូលប្រើប្រាស់សេវាសុខាភិបាលសាធារណៈ ជាពិសេសពួកគាត់សប្បាយចិត្តចំពោះមណ្ឌលសុខភាព និងមន្ទីរពេទ្យបង្អែកស្រុក ដែលបានបើកទ្វាស្វាគមន៍ប្រជាពលរដ្ឋទាំង២៤ម៉ោង។

សម្ដេចធិបតីនាយករដ្ឋមន្រ្ដីក៏បានមានប្រសាសន៍សង្កត់ធ្ងន់ថា៖ «ក្រុមគ្រូពេទ្យ ត្រូវតែបន្តបំពេញតួនាទីរបស់ខ្លួនដោយក្រមសីលធម៌ វិជ្ជាជីវៈ និងតម្កល់អាយុជីវិតអ្នកជំងឺជាធំ»៕

ដោយ៖ ប៊ុនរិទ្ធ