AKP បន្ទាយមានជ័យ ថ្ងៃទី១៥ ខែកញ្ញា ឆ្នាំ២០២៦--កីឡដ្ឋាន «កងវ៉ា» ដែលមានលក្ខណៈស្តង់ដា និងជាកីឡដ្ឋានមានតែមួយគត់ក្នុងខេត្តបន្ទាយមានជ័យ ព្រមទាំងផ្លូវកៅស៊ូប្រភេទ DBST ប្រវែងជិត ៨០០ម៉ែត្រ ត្រូវបានកាត់ខ្សែបូណ៌សម្ពោធដាក់ឱ្យប្រើប្រាស់ជាផ្លូវការហើយ ដើម្បីរួមចំណែកលើកកម្ពស់សកម្មភាពកីឡា និងផ្តល់ទីកន្លែងសមស្របសម្រាប់ការហ្វឹកហាត់ និងប្រកួតកីឡារបស់ប្រជាពលរដ្ឋ ជាពិសេសកុមារ និងយុវជនក្នុងខេត្ត។

ពិធីសម្ពោធនេះ បានប្រព្រឹត្តទៅនាព្រឹកថ្ងៃទី១៥ ខែកញ្ញា ឆ្នាំ២០២៦ នៅកីឡដ្ឋាន «កងវ៉ា» ស្ថិតក្នុងភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ក្រោមអធិបតីភាព ឯកឧត្តម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ ដោយមានការអញ្ជើញចូលរួមពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត ព្រមទាំងថ្នាក់ដឹកនាំ មន្ត្រីរាជការ ក្រុមកីឡាបាល់ទាត់មហាជន និងអ្នកពាក់ព័ន្ធជាច្រើនរូប។

ថ្លែងក្នុងឱកាសនេះ ឯកឧត្តម អ៊ុ រាត្រី បានគូសបញ្ជាក់ពីសារៈសំខាន់នៃវិស័យកីឡា ដែលមិនត្រឹមតែជាសកម្មភាពសម្រាប់ការកម្សាន្ត និងលំហាត់ប្រាណប៉ុណ្ណោះទេ ប៉ុន្តែក៏ជាកត្តាដ៏សំខាន់ក្នុងការលើកកម្ពស់សុខភាព សាមគ្គីភាព វិន័យ សីលធម៌ និងការអភិវឌ្ឍសមត្ថភាពរបស់យុវជនផងដែរ។

ឯកឧត្តមអភិបាលខេត្តបានបញ្ជាក់ថា រដ្ឋបាលខេត្តបន្ទាយមានជ័យ តែងយកចិត្តទុកដាក់ និងជំរុញការអភិវឌ្ឍវិស័យកីឡាតាមរយៈការបង្កើត និងកែលម្អហេដ្ឋារចនាសម្ព័ន្ធកីឡា ព្រមទាំងជំរុញឱ្យមានការចូលរួមលេងកីឡាកាន់តែទូលំទូលាយ ដោយចាត់ទុកកីឡាជាផ្នែកមួយនៃការអភិវឌ្ឍធនធានមនុស្ស និងការកសាងសង្គមប្រកបដោយសុខភាពល្អ។

ជាមួយគ្នានេះ ឯកឧត្តម អ៊ុ រាត្រី បានអំពាវនាវ និងជំរុញដល់កុមារ យុវជន និងប្រជាពលរដ្ឋទាំងអស់ឱ្យចូលរួមលេងកីឡាឱ្យបានគ្រប់គ្នាតាមលទ្ធភាព និងប្រភេទកីឡាដែលខ្លួនស្រឡាញ់ ដោយត្រូវប្រើប្រាស់កីឡដ្ឋាននេះឱ្យបានសកម្ម និងមានប្រសិទ្ធភាព។ «ការលេងកីឡា គឺជាការថែរក្សាសុខភាព កសាងសមត្ថភាព និងបង្កើតសាមគ្គីភាព»។ ឯកឧត្តមបានបញ្ជាក់ថា យុវជនដែលចូលរួមក្នុងសកម្មភាពកីឡា នឹងទទួលបានទាំងសុខភាពល្អ ចំណេះដឹងពីវិន័យ និងការងារជាក្រុម ព្រមទាំងជួយឱ្យពួកគេប្រើប្រាស់ពេលវេលាទំនេរប្រកបដោយប្រយោជន៍ ចៀសឆ្ងាយពីអំពើអបាយមុខ និងបញ្ហាសង្គមផ្សេងៗ។
កីឡដ្ឋាន «កងវ៉ា» នេះ ត្រូវបានចាត់ទុកថា ជាសមិទ្ធផលដ៏មានសារៈសំខាន់មួយសម្រាប់វិស័យកីឡានៅខេត្តបន្ទាយមានជ័យ ព្រោះការមានទីលានកីឡាដែលមានលក្ខណៈស្តង់ដា នឹងផ្តល់ឱកាសឱ្យកីឡាករ កីឡាការិនី និងយុវជនក្នុងខេត្ត អាចហ្វឹកហាត់ ពង្រឹងសមត្ថភាព និងរៀបចំការប្រកួតកីឡាប្រកបដោយលក្ខខណ្ឌកាន់តែល្អប្រសើរ។

មិនត្រឹមតែប៉ុណ្ណោះ ការសាងសង់ និងដាក់ឱ្យប្រើប្រាស់ផ្លូវកៅស៊ូប្រភេទ DBST ប្រវែងជិត ៨០០ម៉ែត្រ ដែលភ្ជាប់ទៅកាន់កីឡដ្ឋាន ក៏បានរួមចំណែកធ្វើឱ្យការធ្វើដំណើររបស់ប្រជាពលរដ្ឋ កីឡាករ កីឡាការិនី និងអ្នកចូលរួមសកម្មភាពកីឡាកាន់តែមានភាពងាយស្រួល និងមានសុវត្ថិភាព។ សមិទ្ធផលទាំងនេះ មិនត្រឹមជាការកែលម្អហេដ្ឋារចនាសម្ព័ន្ធប៉ុណ្ណោះទេ ប៉ុន្តែជាការវិនិយោគលើសុខភាព និងសមត្ថភាពរបស់ប្រជាពលរដ្ឋ ជាពិសេសយុវជន ដែលជាកម្លាំងស្នូលសម្រាប់ការអភិវឌ្ឍខេត្ត និងប្រទេសជាតិនាពេលអនាគត។

តាមរយៈការសម្ពោធដាក់ឱ្យប្រើប្រាស់កីឡដ្ឋាន «កងវ៉ា» ជាផ្លូវការខេត្តបន្ទាយមានជ័យ ក៏កំពុងបើកទំព័រថ្មីមួយសម្រាប់ការលើកកម្ពស់វប្បធម៌នៃការលេងកីឡា និងការចូលរួមរបស់មហាជន ដោយរំពឹងថា កីឡដ្ឋាននេះនឹងក្លាយជាកន្លែងប្រមូលផ្តុំកីឡាករ កីឡាការិនី និងយុវជន សម្រាប់ការហ្វឹកហាត់ ការប្រកួត និងការផ្លាស់ប្តូរបទពិសោធន៍ ដែលនឹងរួមចំណែករកឃើញ និងបណ្តុះបណ្តាលធនធានកីឡាឆ្នើមៗរបស់ខេត្ត ឱ្យកាន់តែមានសមត្ថភាព៕

ដោយ ឈុន សារ៉ាត