AKP បន្ទាយមានជ័យ ថ្ងៃទី១៥ ខែកញ្ញា ឆ្នាំ២០២៦ -- ការពង្រឹង និងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់នៅតាមជនបទ ត្រូវបានចាត់ទុកជាកត្តាសំខាន់មួយក្នុងការលើកកម្ពស់ជីវភាពប្រជាពលរដ្ឋ ជាពិសេសប្រជាកសិករ តាមរយៈការសម្រួលការធ្វើដំណើរ កាត់បន្ថយការលំបាក និងចំណាយក្នុងការដឹកជញ្ជូនកសិផលទៅកាន់ទីផ្សារ។ ក្នុងទិសដៅនេះ រាជរដ្ឋាភិបាលបានបន្តយកចិត្តទុកដាក់ជំរុញការស្ថាបនា និងជួសជុលផ្លូវលំជនបទឱ្យកាន់តែមានគុណភាព និងប្រើប្រាស់បានយូរអង្វែង។

ឯកឧត្តម ឌូ ដាលីតូ អនុរដ្ឋលេខាធិការក្រសួងអភិវឌ្ឍន៍ជនបទ តំណាងឯកឧត្តម កែ គឹមយ៉ាន អ្នកតំណាងរាស្ត្រមណ្ឌលខេត្តបន្ទាយមានជ័យ និងជាប្រធានក្រុមការងារគណបក្សចុះមូលដ្ឋានខេត្តបន្ទាយមានជ័យ បានលើកឡើងថា ការស្ថាបនា និងជួសជុលផ្លូវនៅតាមមូលដ្ឋាន គឺជាការឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ និងបង្ហាញពីការយកចិត្តទុកដាក់របស់រាជរដ្ឋាភិបាលចំពោះការអភិវឌ្ឍជនបទ។

ឯកឧត្តមបានបញ្ជាក់ថា ផ្លូវល្អមិនត្រឹមតែផ្តល់ភាពងាយស្រួលដល់ប្រជាពលរដ្ឋក្នុងការធ្វើដំណើរប៉ុណ្ណោះទេ ប៉ុន្តែថែមទាំងជួយបើកច្រកសេដ្ឋកិច្ចនៅមូលដ្ឋាន ដោយអាចឱ្យកសិករដឹកជញ្ជូនស្រូវ និងកសិផលផ្សេងៗបានកាន់តែងាយស្រួល រហ័ស និងកាត់បន្ថយការខូចខាត ព្រមទាំងជួយកាត់បន្ថយថ្លៃដើមដឹកជញ្ជូន ដែលជាកត្តាសំខាន់សម្រាប់បង្កើនប្រាក់ចំណូល និងលើកកម្ពស់ជីវភាពគ្រួសារកសិករ។

ឯកឧត្តម ឌូ ដាលីតូ បានសង្កត់ធ្ងន់ថា ការអភិវឌ្ឍផ្លូវជនបទ គឺជាផ្នែកមួយនៃការជំរុញវិស័យកសិកម្ម ព្រោះនៅពេលផ្លូវមានភាពប្រសើរ កសិករអាចចេញចូលតំបន់ផលិតកម្មបានងាយស្រួល ហើយកសិផលក៏អាចដឹកទៅកាន់ទីផ្សារបានទាន់ពេលវេលា។ ដូច្នេះ ការវិនិយោគលើផ្លូវជនបទ គឺជាការវិនិយោគលើសេដ្ឋកិច្ចមូលដ្ឋាន និងជីវភាពប្រជាពលរដ្ឋផងដែរ។

ការលើកឡើងនេះធ្វើឡើងក្នុងឱកាសដែលឯកឧត្តម ឌូ ដាលីតូ ដឹកនាំក្រុមការងារចុះពិនិត្យការជួសជុល និងស្ថាបនាផ្លូវក្រាលដីល្បាយថ្មប្រវែង ២៦,៣គីឡូម៉ែត្រ ទទឹង៧ម៉ែត្រ និងកម្រាស់០,២ម៉ែត្រ ព្រមទាំងសាងសង់លូមូលមុខ២ ចំនួន១កន្លែង និងលូប្រអប់១កន្លែង ស្ថិតលើផ្លូវសាយសាម៉ន ចាប់ពីភូមិចំណោមកើត ឃុំចំណោម ស្រុកមង្គលបូរី ឆ្ពោះទៅភូមិបល្លង្គ័ ឃុំតាគង់ ស្រុកម៉ាឡៃ ខេត្តបន្ទាយមានជ័យ កាលពីថ្ងៃទី១៤ ខែកញ្ញា ឆ្នាំ២០២៦។ គិតមកដល់ពេលចុះពិនិត្យ ការងារស្ថាបនា និងជួសជុលផ្លូវខាងលើសម្រេចបានប្រមាណ ៤៥ភាគរយ ដែលនឹងក្លាយជាផ្លូវសរសៃសេដ្ឋកិច្ចដ៏សំខាន់មួយសម្រាប់ប្រជាពលរដ្ឋនៅតាមមូលដ្ឋាន ពិសេសសម្រាប់ការដឹកជញ្ជូនកសិផលពីតំបន់ផលិតកម្មទៅកាន់ទីប្រជុំជន និងទីផ្សារ។

ក្នុងឱកាសនោះ ឯកឧត្តម ឌូ ដាលីតូ ក៏បានសួរសុខទុក្ខ និងសំណេះសំណាលជាមួយបងប្អូនប្រជាកសិករ ដែលកំពុងមមាញឹកប្រមូលផលកសិកម្ម ដោយបានលើកទឹកចិត្តឱ្យប្រជាកសិករបន្តខិតខំប្រឹងប្រែងក្នុងការផលិត និងយកចិត្តទុកដាក់លើគុណភាពកសិផល ដើម្បីឱ្យផលិតផលកសិកម្មមានទីផ្សារ និងតម្លៃសមរម្យ។

ជាមួយគ្នានេះ ការជួសជុលផ្លូវប្រវែងជាង២៦គីឡូម៉ែត្រនេះ ត្រូវបានរំពឹងថា នឹងផ្តល់ផលប្រយោជន៍ដោយផ្ទាល់ដល់ប្រជាពលរដ្ឋនៅតាមបណ្តាភូមិ និងឃុំដែលផ្លូវឆ្លងកាត់ ពិសេសនៅរដូវប្រមូលផល ដែលតម្រូវការដឹកជញ្ជូនមានការកើនឡើង។ ផ្លូវដែលមានស្ថានភាពល្អ នឹងជួយឱ្យយានយន្តដឹកកសិផលអាចធ្វើដំណើរបានកាន់តែងាយស្រួល ទាំងក្នុងរដូវប្រាំង និងរដូវវស្សា។
លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ និងសហការី ក៏បានអញ្ជើញចូលរួមក្នុងការចុះពិនិត្យការងារនេះផងដែរ ដើម្បីតាមដានវឌ្ឍនភាពការងារ និងធានាថាការស្ថាបនាផ្លូវប្រព្រឹត្តទៅតាមលក្ខណៈបច្ចេកទេស និងផែនការដែលបានកំណត់។

ជាក់ស្តែង សម្រាប់ខេត្តបន្ទាយមានជ័យ ដែលជាខេត្តមានសក្តានុពលខ្ពស់លើវិស័យកសិកម្ម ការមានបណ្តាញផ្លូវជនបទដែលមានគុណភាព គឺមានសារៈសំខាន់យ៉ាងខ្លាំងចំពោះការតភ្ជាប់តំបន់ផលិតកម្មជាមួយទីផ្សារ។ ការកែលម្អផ្លូវមិនត្រឹមជួយសម្រួលដល់ការដឹកជញ្ជូនកសិផលទេ ប៉ុន្តែថែមទាំងជួយសម្រួលដល់ការចេញចូលរបស់ប្រជាពលរដ្ឋ ការផ្តល់សេវាសាធារណៈ និងការតភ្ជាប់សហគមន៍នៅតាមតំបន់ជនបទផងដែរ។

ការជំរុញការស្ថាបនា និងជួសជុលផ្លូវជនបទនេះ បានបង្ហាញពីការបន្តផ្តោតការយកចិត្តទុកដាក់លើការអភិវឌ្ឍហេដ្ឋារចនាសម្ព័ន្ធមូលដ្ឋាន ដើម្បីឱ្យផលប្រយោជន៍នៃការអភិវឌ្ឍអាចចូលទៅដល់ប្រជាពលរដ្ឋនៅមូលដ្ឋាន និងរួមចំណែកធ្វើឱ្យសេដ្ឋកិច្ចជនបទមានភាពរស់រវើក តាមរយៈការផលិត ការដឹកជញ្ជូន និងការចូលដំណើរការទីផ្សារកាន់តែប្រសើរ៕

ដោយ ឈុន សារ៉ាត