AKP ភ្នំពេញថ្ងៃទី១៤ ចែកញ្ញា ឆ្នាំ ២០២៦–

ឯកឧត្តម គី សុខគីម នាយកប្រតិបត្តិ មូលនិធិអភិវឌ្ឍន៍ជំនាញ SDF នៃក្រសួង សេដ្ឋកិច្ច និងហិរញ្ញវត្តុ បានអញ្ជើញចូលរួមជាវាគ្មិនកិត្តិយសក្នុង «សិក្ខាសាលាផលិតភាពការងារ ឆ្នាំ២០២៦» ដែលរៀបចំឡើងដោយក្រសួងការងារ និងបណ្តុះបណ្តាលវិជ្ជាជីវៈ ក្នុងពិព័រណ៍ជាតិការងារ និងផលិតភាពការងារ ឆ្នាំ២០២៦ នៅថ្ងៃទី១៣ ខែកញ្ញា ឆ្នាំ២០២៦ នៅមណ្ឌលសន្និបាត និងពិព័រណ៍កោះពេជ្រ ។

ក្នុងសិក្ខាសាលា បានលើកយកកិច្ចពិភាក្សាលើប្រធានបទ «ជំនាញ និងការងារ ផលិតភាពការងារដើម្បីកំណើនសេដ្ឋកិច្ចប្រកបដោយចីរភាព» ឯកឧត្តម គី សុខគីម បានគូសបញ្ជាក់ពីសារគន្លឹះថា «តម្លៃពិតប្រាកដនៃការបណ្តុះបណ្តាល មិនមែនស្ថិតតែលើចំនួនសិក្ខាកាម ឬវិញ្ញាបនបត្រនោះទេ ប៉ុន្តែស្ថិតនៅលើការទទួលបានការងារធ្វើ ប្រាក់ចំណូលដែលកើនឡើង និងផលិតភាពអាជីវកម្មដែលប្រសើរឡើងជាក់ស្តែង»។ SDF ដើរតួនាទីជាយន្តការសហហិរញ្ញប្បទានរវាងរដ្ឋ និងវិស័យឯកជន ដើម្បីបំប្លែងបញ្ហាអាជីវកម្មជាក់ស្តែងឱ្យទៅជាដំណោះស្រាយជំនាញ ការងារ និងផលិតភាព។

ឯកឧត្តម បានលើកឡើងពីយុទ្ធសាស្ត្រ និងលទ្ធផលគន្លឹះរបស់ SDF ក្នុងការលើកកម្ពស់ផលិតភាព និងការអភិវឌ្ឍជំនាញ រួមមានទី១ ការបណ្តុះបណ្តាលឆ្លើយតបចំតម្រូវការឧស្សាហកម្ម៖ SDF ចាប់ផ្តើមពី «បញ្ហាអាជីវកម្ម» ដោយវិស័យឯកជនជាអ្នកកំណត់តម្រូវការជំនាញពិតប្រាកដ។ គិតត្រឹមដើមខែកញ្ញា ឆ្នាំ២០២៦ SDF បានអនុម័តការបណ្តុះបណ្តាលសិក្ខាកាមជាង ១០១ ៥០០ នាក់ តាមរយៈថ្លៃបណ្តុះបណ្តាលសរុបប្រមាណ ៥០,៨ លានដុល្លារអាមេរិក ដែលក្នុងនោះ SDF រួមចំណែកជាមធ្យម ៥៤% និងវិស័យឯកជនរួមចំណែក ៤៦% ទាំងលើការបង្កើនជំនាញ ការអភិវឌ្ឍជំនាញថ្មី និងការបណ្តុះបណ្តាលមុនចូលបម្រើការងារ ទី២ ការវាស់វែងផលិតភាព និងលទ្ធផលការងារជាក់ស្តែង៖ SDF តាមដានលទ្ធផលតាំងពីបញ្ហារហូតដល់ផលជះអាជីវកម្មចុងក្រោយ។

លទ្ធផលបង្ហាញថា អត្រាមានការងារធ្វើសម្រេចបាន ៨៨ភាគរយ, អត្រាបញ្ចប់ការសិក្សា ៩៦ភាគរយ និងអត្រាពេញចិត្តពីនិយោជកមានរហូតដល់ ៨៩ភាគរយ។ សហគ្រាស ៨៩ភាគរយ បានរាយការណ៍ពីកំណើនផលិតភាព ឬលទ្ធផលអាជីវកម្ម និង ៨៣ភាគរយ ទទួលបានផលចំណេញត្រឡប់មកវិញវិជ្ជមាន ព្រមទាំងជួយឱ្យប្រាក់ចំណូលបុគ្គលិកកើនឡើងជាមធ្យម ២៧% ក្រោយបញ្ចប់ការបណ្តុះបណ្តាលដែលគាំទ្រដោយ SDF ទី៤ ការគាំទ្រជំនាញឌីជីថល និងបច្ចេកវិទ្យា៖ វិស័យឌីជីថលទទួលបានការគាំទ្រប្រមាណ ២១% នៃថវិកាបណ្តុះបណ្តាលដែលបានអនុម័ត ដោយគាំទ្រសិក្ខាកាម ១៧ ៨៥៩ នាក់ លើជំនាញបច្ចេកវិទ្យាទំនើបដូចជា AI, ការវិភាគទិន្នន័យ និងស្វ័យប្រវត្តិកម្មជាដើម។

ទន្ទឹមនេះ SDF បានសហការជាមួយដៃគូអន្តរជាតិ បញ្ជូនគ្រូបង្គោលកម្ពុជា ១៦៦ នាក់ទៅទទួលការបណ្តុះបណ្តាលបច្ចេកវិទ្យាកម្រិតខ្ពស់ដូចជា ការជួសជុល និងថែទាំរថយន្តអគ្គិសនី, Industrial Robotics, Digital Construction និង PLC នៅប្រទេសចិន ដើម្បីផ្ទេរចំណេះដឹងបន្តដល់សិស្ស និងកម្មករយ៉ាងតិច ២ ០០០ នាក់ត្រឹមឆ្នាំ២០២៩។
តម្លៃពិតប្រាកដនៃភាពជាដៃគូ គឺការប្រែក្លាយឱ្យទៅជាសកម្មភាពជាក់ស្តែង។ 

មូលនិធិអភិវឌ្ឍន៍ជំនាញ SDF ប្តេជ្ញាបន្តសហការយ៉ាងជិតស្និទ្ធជាមួយវិស័យឯកជន ដើម្បីបំពេញតម្រូវការជំនាញទាំងគុណភាព និងបរិមាណ ឱ្យឆ្លើយតបចំតម្រូវការឧស្សាហកម្មសំដៅកសាងកម្លាំងពលកម្មដែលមានផលិតភាពខ្ពស់ និងរួមចំណែកដល់កំណើនសេដ្ឋកិច្ចប្រកបដោយចីរភាព ៕

ដោយ៖ ណយ នឿន (ប្រភព៖SDF)