AKP បន្ទាយមានជ័យ ថ្ងៃទី១ ខែកញ្ញា ឆ្នាំ២០២៦ -- ការភ្ជាប់រវាងស្ថាប័នបណ្តុះបណ្តាលជំនាញ និងវិស័យឯកជន ត្រូវបានចាត់ទុកជាកត្តាសំខាន់មួយ ដើម្បីធានាថា សិក្ខាកាមដែលបញ្ចប់ការសិក្សា មិនត្រឹមតែទទួលបានចំណេះដឹងទ្រឹស្តីប៉ុណ្ណោះទេ ប៉ុន្តែអាចយកជំនាញដែលទទួលបានទៅប្រើប្រាស់ប្រកបមុខរបរ បង្កើតអាជីព និងឆ្លើយតបតម្រូវការទីផ្សារការងារបានជាក់ស្តែង។ នេះជាទិសដៅដែលឧកញ៉ា អ៊ឹង វណ្ណម៉ៅ ប្រធានក្រុមប្រឹក្សាផ្តល់យោបល់ និងជាប្រធានសភាពាណិជ្ជកម្មខេត្តបន្ទាយមានជ័យ បានលើកឡើងក្នុងកិច្ចប្រជុំលើកទី១ របស់ក្រុមប្រឹក្សាផ្តល់យោបល់ នៃវិទ្យាស្ថានពហុបច្ចេកទេសខេត្តបន្ទាយមានជ័យ។

កិច្ចប្រជុំនេះធ្វើឡើងកាលពីថ្ងៃចន្ទ ទី៣១ ខែសីហា ឆ្នាំ២០២៦ នៅសាលប្រជុំវិទ្យាស្ថានពហុបច្ចេកទេសខេត្តបន្ទាយមានជ័យ ស្ថិតនៅភូមិគាប សង្កាត់ទឹកថ្លា ក្រុងសិរីសោភ័ណ ដោយមានការអញ្ជើញចូលរួមពីលោក នួន ស៊ីណា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត និងលោកស្រី សំរិទ្ធ សូរ្យជាតិ នាយិកាវិទ្យាស្ថានពហុបច្ចេកទេសខេត្ត ព្រមទាំងសមាជិកក្រុមប្រឹក្សាផ្តល់យោបល់ពាក់ព័ន្ធ។

 ថ្លែងនៅក្នុងកិច្ចប្រជុំ ឧកញ៉ា អ៊ឹង វណ្ណម៉ៅ បានបញ្ជាក់ថា នេះជាលើកទី១ ដែលលោកបានចូលរួមធ្វើការងារជាមួយវិស័យសាធារណៈ តាមរយៈក្រុមប្រឹក្សាផ្តល់យោបល់ ហើយលោកសង្ឃឹមយ៉ាងមុតមាំថា សមាជិកទាំងអស់នឹងសហការគ្នាដោយឈរលើទិសដៅតែមួយ ដើម្បីលើកកម្ពស់ និងជំរុញការងារបច្ចេកទេស សំដៅឱ្យសិក្ខាកាមដែលមកទទួលចំណេះដឹងនៅវិទ្យាស្ថានអាចយកជំនាញទាំងនោះទៅប្រកបមុខរបរ និងអាជីពស្របតាមតម្រូវការរបស់ខ្លួន។

ឧកញ៉ា អ៊ឹង វណ្ណម៉ៅ បានគូសបញ្ជាក់ថា ក្នុងនាមជាប្រធានក្រុមប្រឹក្សាផ្តល់យោបល់ លោកនឹងជំរុញ និងលើកកម្ពស់វិស័យការងារអាទិភាពផ្នែកបច្ចេកទេសគ្រប់ប្រភេទ ដើម្បីផ្តល់ប្រយោជន៍ជាក់ស្តែងដល់សិក្ខាកាមដែលបានចូលរួមវគ្គបណ្តុះបណ្តាល។ ការបណ្តុះបណ្តាលត្រូវផ្តោតលើប្រសិទ្ធភាព និងសមត្ថភាពអនុវត្តជាក់ស្តែង ដើម្បីឱ្យអ្នកសិក្សាអាចយកជំនាញទៅប្រើប្រាស់ក្នុងការប្រកបអាជីវកម្មផ្ទាល់ខ្លួន ឬស្វែងរកឱកាសការងារបាននៅថ្ងៃអនាគត។

ការលើកឡើងនេះបានបង្ហាញពីសារៈសំខាន់នៃការធ្វើឱ្យការបណ្តុះបណ្តាលជំនាញបច្ចេកទេស មានភាពស៊ីសង្វាក់ជាមួយនឹងតម្រូវការជាក់ស្តែងរបស់សង្គម និងវិស័យធុរកិច្ច។ នៅពេលដែលសិក្ខាកាមទទួលបានជំនាញដែលទីផ្សារត្រូវការ ពួកគេនឹងមានសមត្ថភាពកាន់តែប្រសើរក្នុងការចូលទៅក្នុងទីផ្សារការងារ ខណៈអ្នកដែលមានបំណងប្រកបអាជីវកម្មផ្ទាល់ខ្លួន ក៏អាចប្រើប្រាស់ជំនាញទាំងនោះជាមូលដ្ឋានសម្រាប់បង្កើតមុខរបររបស់ខ្លួនផងដែរ។

ជាមួយគ្នានេះ ឧកញ៉ា អ៊ឹង វណ្ណម៉ៅ ក៏បានសង្កត់ធ្ងន់ទៅលើការអភិវឌ្ឍវិទ្យាស្ថានពហុបច្ចេកទេសខេត្តបន្ទាយមានជ័យឱ្យកាន់តែមានសមត្ថភាព និងឆ្លើយតបបានល្អប្រសើរទៅនឹងតម្រូវការរបស់សិក្ខាកាម។ លោកបានចាត់ទុកការអភិវឌ្ឍស្ថាប័នបណ្តុះបណ្តាលជំនាញថា ជាកិច្ចការចាំបាច់មួយ ដើម្បីបង្កើតបរិយាកាសសិក្សាដែលមានគុណភាព និងជួយឱ្យសិក្ខាកាមទទួលបានជំនាញដែលមានតម្លៃក្នុងការប្រកបអាជីព។ ប្រធានក្រុមប្រឹក្សាផ្តល់យោបល់រូបនេះ បានអំពាវនាវឱ្យសមាជិក និងភាគីពាក់ព័ន្ធទាំងអស់ បន្តសហការគ្នាយ៉ាងជិតស្និទ្ធ ដោយផ្តោតលើគោលដៅរួម គឺការលើកកម្ពស់គុណភាពបណ្តុះបណ្តាលជំនាញ ការអភិវឌ្ឍវិទ្យាស្ថាន និងការបង្កើតឱកាសឱ្យសិក្ខាកាមអាចយកចំណេះដឹងទៅប្រើប្រាស់បានពិតប្រាកដ។

តាមរយៈកិច្ចប្រជុំលើកទី១ នេះ ក្រុមប្រឹក្សាផ្តល់យោបល់ នៃវិទ្យាស្ថានពហុបច្ចេកទេសខេត្តបន្ទាយមានជ័យ ត្រូវបានមើលឃើញថា អាចក្លាយជាយន្តការសំខាន់មួយក្នុងការបង្កើនការចូលរួមពីវិស័យឯកជន និងភាគីពាក់ព័ន្ធ ដើម្បីផ្តល់យោបល់លើការអភិវឌ្ឍការបណ្តុះបណ្តាលជំនាញឱ្យកាន់តែមានភាពជាក់ស្តែង និងឆ្លើយតបនឹងតម្រូវការរបស់សង្គម។

ជារួម ការដាក់ចេញទិសដៅឱ្យការបណ្តុះបណ្តាលជំនាញបច្ចេកទេស ផ្តោតលើសមត្ថភាពអនុវត្ត និងតម្រូវការអាជីព គឺជាការផ្តល់មូលដ្ឋានដ៏សំខាន់សម្រាប់យុវជន និងសិក្ខាកាមនៅខេត្តបន្ទាយមានជ័យ ក្នុងការពង្រឹងសមត្ថភាពវិជ្ជាជីវៈ បង្កើតមុខរបរ និងចូលរួមក្នុងការអភិវឌ្ឍសេដ្ឋកិច្ចមូលដ្ឋាននាពេលអនាគត៕

ដោយ៖ ឈុន សារ៉ាត