AKP កំពង់ធំ ថ្ងៃទី១ ខែកញ្ញា ឆ្នាំ២០២៦-- នៅទីបញ្ជាការតំបន់ប្រតិបត្តិការសឹករងកំពង់ធំយោធភូមិភាគទី៤ កាលពីថ្ងៃទី៣១ ខែសីហា ឆ្នាំ២០២៦ បានប្រារព្ធពិធីផ្សព្វផ្សាយសភាពការណ៍ថ្មីៗ ពង្រឹងតួនាទីភារកិច្ចរបស់កងយោធពលខេមរភូមិន្ទនិងដាក់ចេញនូវបទបញ្ជាសំខាន់ៗមួយចំនួនជូនដល់យោធិនចំណុះទីបញ្ជាការតំបន់ប្រតិបត្តិការសឹករង ក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ។

ឧត្តមសេនីយ៍ទោ សោម ស៊ុន ផ្សព្វផ្សាយសភាពការណ៍ថ្មីៗនៅតាមព្រំដែនកម្ពុជា-ថៃដែលបច្ចុប្បន្ននេះភាគីយោធាថៃនៅតែរំលោភលើសេចក្ដីប្រកាសរួមស្តីពីបទឈប់បាញ់ជាបន្តបន្ទាប់ដោយបានសាងសង់ហេដ្ឋារចនាសម្ព័ន្ធ ផ្លូវថ្នល់ លេណដ្ឋាន រាយបន្លាលួស នៅចំណុចមួយចំនួនរំលោភលើដែនអធិបតេយ្យភាពបូរណភាពទឹកដីកម្ពុជាក្រោយពេលបទឈប់បាញ់ចូលជាធរមានរួចហើយ។ ជាមួយគ្នានេះដែរ ប្រមុខរាជរដ្ឋាភិបាលនៃព្រះរាជាណាចក្រកម្ពុជា បានខិតខំប្រឹងប្រែងក្នុងការបង្ហាញដល់ពិភពលោកឱ្យឃើញកាន់តែច្បាស់អំពីសភាពការពិតនៃការឈ្លានពាន និងកាន់កាប់ ទឹកដីកម្ពុជាដោយខុសច្បាប់នៅតំបន់មួយចំនួននៅតាមខ្សែបន្ទាត់ព្រំដែនកម្ពុជា-ថៃ ដែលជាការរំលោភយ៉ាងធ្ងន់ធ្ងរមកលើដែនអធិបតេយ្យភាព សិទ្ធិមនុស្ស និងសិទ្ធិរស់នៅរបស់ប្រជាពលរដ្ឋកម្ពុជា ដែលផ្ទះសម្បែងនិងដីធ្លីមួយចំនួនត្រូវបានទាហានថៃចូលកាន់កាប់ដោយខុសច្បាប់។

ទន្ទឹមនឹងនេះ ឧត្តមសេនីយ៍ទោ សោម ស៊ុន បានសរសើរដល់កងកម្លាំងនាយទាហាន នាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំទាំងអស់ ដែលបានខិតខំប្រឹងបំពេញភារកិច្ចទាំងកិច្ចការការពារបូរណភាពទឹកដី ការងារបង្ក្រាបបទល្មើសធនធានធម្មជាតិ និងបានចូលរួមអនុវត្តយ៉ាងសកម្មក្នុងកិច្ចប្រតិបត្តិការអនុវត្តន៍តាមគោលនយោបាយភូមិ ឃុំ សង្កាត់មានសុវត្ថិភាពរបស់រាជរដ្ឋាភិបាល ប្រកបដោយស្មារតីទទួលខុសត្រូវខ្ពស់ ដើម្បីបុព្វហេតុជាតិ និងប្រជាជនកម្ពុជា។

ឧត្តមសេនីយ៍ទោ សោម ស៊ុន បានពង្រឹងតួនាទីភារកិច្ចរបស់កងយោធពលខេមរភូមិន្ទនឹងបានដាក់ចេញនូវបទបញ្ជាមួយចំនួនដល់យោធិនគ្រប់រូបត្រូវអនុវត្តឱ្យបានម៉ឺងម៉ាត់ជាអាទិ៍៖ ទី១. យោធិនគ្រប់រូបត្រូវតែស្មោះត្រង់ដាច់ខាតចំពោះជាតិ សាសនា និងព្រះមហាក្សត្រត្រូវហ៊ានធ្វើពលិកម្មគ្រប់បែបយ៉ាងដើម្បីជាតិការពារបូរណភាពទឹកដី និងប្រជាជនកម្ពុជា។ ទី២. ត្រូវបន្តសកម្មភាពយ៉ាងសកម្មប្រកបដោយស្មារតីទទួលខុសត្រូវខ្ពស់តាមបទបញ្ជារបស់សម្តេចប្រមុខរាជរដ្ឋាភិបាលកម្ពុជានិងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ព្រមទាំងបទបញ្ជារបស់ឯកឧត្តមប្រធានគណៈបញ្ជាការឯកភាពរដ្ឋបាលខេត្តកំពង់ធំក្នុងការការពារ ទប់ស្កាត់ និងបង្ក្រាបបទល្មើសធនធានធម្មជាតិឱ្យមានប្រសិទ្ធភាព និងទី៣. ត្រូវបន្តសហការជាមួយកងកម្លាំងប្រដាប់អាវុធទាំងបី អាជ្ញាធរដែនដីគ្រប់លំដាប់ថ្នាក់ ក្នុងការអនុវត្តន៍នូវគោលនយោបាយភូមិ ឃុំ សង្កាត់មានសុវត្ថិភាព របស់រាជរដ្ឋាភិបាលឱ្យទទួលបានជោគជ័យ ដើម្បីធានាសេចក្ដីសុខសុវត្ថិភាព និងសណ្ដាប់ធ្នាប់ល្អនៅក្នុងមូលដ្ឋាននីមួយៗ។

នាយទាហាន នាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានប្តេជ្ញាចិត្តដាច់ខាត គោរពប្រតិបត្តិយ៉ាងម៉ឺងម៉ាត់ និងអនុវត្តតាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ និងមេបញ្ជាការតំបន់ប្រតិបត្តិការសឹករងកំពង់ធំមានប្រសិទ្ធភាពនិងឱ្យទទួលបានជោគជ័យតាមភារកិច្ចដែលថ្នាក់ដឹកនាំបានប្រគល់ជូន៕

ដោយ ស៊ុម វណ្ណា