AKP ព្រះសីហនុ ថ្ងៃទី១ ខែកញ្ញា ឆ្នាំ២០២៦-- លោក ឧត្តមសេនីយ៍ទោ មៀច សាមុត មេបញ្ជាការកងពលតូចអន្តរាគមន៍លេខ១២៨ ទិសប្រាសាទព្រះវិហារ បានថ្លែងអំណរគុណឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ និងប្រតិភូខេត្ត បានយកចិត្តទុកដាក់ និងសួរសុខទុក្ខដល់កងពលអន្តរាគមន៍លេខ១២៨ ព្រមទាំងបានដឹកនាំប្រតិភូខេត្ត ក៏ដូចជាបានបញ្ជូនប្រតិភូខេត្តព្រះសីហនុ នាំយកអំណោយមានគ្រឿងឧបភោគបរិភោគ សម្ភារៈ ថ្នាំពេទ្យ និងថវិកាជួយឧបត្ថម្ភដល់កងពលតូចអន្តរាគមន៍លេខ១២៨នាពេលកន្លងមក ជាពិសេសក្នុងឱកាសដែលឯកឧត្តមអភិបាលខេត្តព្រះសីហនុដឹកនាំប្រតិភូខេត្ត និងក្រសួងការងារបណ្តុះបណ្តាលវិជ្ជាជីវ: នាំយកអំណោយរបស់ចៅៗអ្នកឧកញ៉ា ព្រឹទ្ធឧបាសិកាធម្មញ្ញាណវិវឌ្ឍនា ប៊ុន ស៊ាងលី និងមហាឧបាសក លីន គ្រី ឧបត្ថម្ភជូនវីរកងទ័ពកងពលតូចអន្តរាគមន៍លេខ១២៨ ទិសប្រាសាទព្រះវិហារ កាលពីថ្ងៃទី៣១ ខែសីហា ឆ្នាំ២០២៦។

ជាមួយគ្នានេះ លោក ឧត្តមសេនីយ៍ទោ មៀច សាមុត មេបញ្ជាការកងពលតូចអន្តរាគមន៍លេខ១២៨ ទិសប្រាសាទព្រះវិហារ បានឱ្យដឹងថា ក្នុងរយៈពេលជិតមួយឆ្នាំកន្លងមកនេះ ឯកឧត្តមអភិបាលខេត្តបានដឹកនាំគណៈប្រតិភូ ក៏ដូចជាបញ្ជូនគណៈប្រតិភូខេត្តព្រះសីហនុយកអំណោយជូនដល់វីរកងទ័ពកងពលអន្តរាគមន៍លេខ១២៨ ចំនួន៧លើក ក្នុងនោះ លើកទី១ កាលពីថ្ងៃទី៥ ខែវិច្ឆិកា ឆ្នាំ២០២៥ ថវិកា១០លានរៀល។ លើកទី២ ថ្ងៃទី២០ ខែធ្នូ ឆ្នាំ២០២៦ មានគ្រឿងឧបភោគបរិភោគ២២មុខ និងថវិកា។ លើកទី៣ ថ្ងៃទី២៨ ខែមេសា ឆ្នាំ២០២៦ មានសម្ភារៈមួយចំនួន ថ្នាំពេទ្យ គ្រឿងឧបភោគបរិភោគចំនួន២៤មុខ និងថវិកា។ លើកទី៤ ថ្ងៃទី២ ខែមិថុនា ឆ្នាំ២០២៦ មានគ្រឿងឧបភោគបរិភោគ។ លើកទី៥ ថ្ងៃទី១៨ ខែកក្កដា ឆ្នាំ២០២៦ មានដូចជាគ្រឿងឧបភោគបរិភោគ។ លើកទី៦ ថ្ងៃទី១៦ ខែសីហា ឆ្នាំ២០២៦ មានគ្រឿងឧបភោគបរិភោគ និងលើកទី៧ ថ្ងៃទី៣១ ខែសីហា ឆ្នាំ២០២៦ បាននាំយកអំណោយរបស់ចៅៗអ្នកឧកញ៉ា ព្រឹទ្ធឧបាសិកាធម្មញ្ញាណវិវឌ្ឍនា ប៊ុន ស៊ាងលី និងមហាឧបា សក លីន គ្រី មានដូចជាគ្រឿង ឧបភោគបរិភោគ១៥មុខ និងថវិកា។

តាងនាមឱ្យមេបញ្ជាការ មេបញ្ជាការរង នាយទាហាន និងពលទាហាន លោកឧត្តមសេនីយ៍ទោបានថ្លែងអំណរគុណចំពោះឯកឧត្តម ម៉ាង ស៊ីណេត អភិបាលខេត្តព្រះសីហនុ រួមទាំងប្រតិភូ មន្ត្រីរាជការ កងកម្លាំងប្រដាប់អាវុធ ព្រះសង្ឃ និងបងប្អូនប្រជាពលរដ្ឋខេត្តព្រះសីហនុ ដែលបានរួមគ្នាប្រមូលនាំយក ស្បៀងអាហា ថ្នាំពេទ្យ សម្ភារៈប្រើប្រាស់មួយចំនួន និងថវិកាយកមកចែកជូនដល់កងពលតូចអន្តរាគមន៍លេខ១២៨ នាពេលកន្លងមក ក៏ដូចជាពេលនេះផងដែរ និងជូនពរឱ្យឯកឧត្តម មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋខេត្តមានសេចក្តីសុខ កម្លាំងខ្លាំងក្លា គ្រប់ក្រុមគ្រួសារ ដើម្បីជាតិ មាតុភូមិកម្ពុជា៕

ដោយ ងូ សុមុនី