AKP បាត់ដំបង ថ្ងៃទី០១ ខែកញ្ញា ឆ្នាំ២០២៦--ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញសំណេះសំណាល សាកសួរសុខទុក្ខកងកម្លាំងនគរបាលវីរៈសេនាតូចការពារព្រំដែន ចំណុះស្នងការដ្ឋាននគរបាលខេត្តបាត់ដំបង និងខេត្តប៉ៃលិន នារសៀលថ្ងៃទី៣១ ខែសីហា ឆ្នាំ២០២៦ នៅបរិវេណស្នងការដ្ឋាននគរបាលខេត្តបាត់ដំ បង។

ឯកឧត្តម អភិសន្តិបណ្ឌិត ស សុខា បានមានប្រសាសន៍កោតសរសើរចំពោះកងកម្លាំងជួរមុខរបស់យើង ដែលមានភាពអង់អាចក្លាហានការពារបូរណភាពទឹកដីពីការឈ្លានពានរបស់ប្រទេសជិតខាង ដែលនេះបានបង្ហាញឱ្យឃើញពីការរួបរួមសាមគ្គីគ្នាជាធ្លុងមួយ ដោយឈរជើងយ៉ាងរឹងមាំនៅតាមខ្សែបន្ទាត់ព្រំដែន។ កម្ពុជាយើងក៏បានត្រៀមលក្ខណៈរបស់ខ្លួន ដូច្នេះហើយ កងកម្លាំងជួរមុខត្រូវបន្តជឿទុកចិត្ត ក្នុងការដឹកនាំ របស់ប្រមុខរាជរដ្ឋាភិបាល ដែលតែងតែយកចិត្តទុកដាក់ខ្ពស់។

កន្លងទៅ ថ្វីត្បិតមានការងារមួយចំនួន នគរបាលព្រំដែនយើង មិនមែនតួអង្គ ស្នូល បានន័យថា នៅជួរមុខ តែជាបន្តបន្ទាប់យើងឃើញថា តួនាទីនេះត្រូវបានពង្រីក ពិសេសការទទួលខុសត្រូវរបស់យើងក្នុងការកៀកស្មាមួយនឹងកងយោធពលខេមរៈភូមិន្ទ ពិសេសអ្នកនៅជួរមុខនេះ ក្លាយជាតួអង្គមួយដ៏សំខាន់ដូចប្ដីប្រពន្ធ ពេលខ្លះយើងត្រូវការគាត់ ហើយពេលខ្លះទៀត គាត់ក៏ត្រូវការយើងដែរ។

ក្នុងឱកាសនោះដែរ ឯកឧត្តម អភិសន្តិបណ្ឌិត បាននាំយកថវិកា គ្រឿងឧបភោគ បរិភោគ និងសម្ភារប្រើប្រាស់ ប្រគល់ជូនវរសេនាតូចនគរបាលការពារព្រំដែនលេខ ៨១៧, ៨១៩, ៨២៣, ៣១០, ៨២១ ដោយក្នុងមួយវរសេនា ទទួលបានថវិកាចំនួន ១០លានរៀល អង្ករចំនួន ២តោន មីជាតិចំនួន ២០០កេស ត្រីខមាតុភូមិចំនួន ២០កេស ត្រីងៀតចំនួន ៣០គីឡូក្រាម សាច់ក្រកចំនួន ៣០គីឡូក្រាម ឆៃប៉ូវផ្អែមចំនួន ២០គីឡូក្រាម ទឹកត្រីចំនួន ៣០យួរ  ទឹកស៊ីអ៊ីវចំនួន ២០យួរ ទឹកបរិសុទ្ធចំនួន ១០០កេស និងតង់ចំនួន ៣០តង់។ ចំពោះវរសេនាតូចនគរបាលការពារព្រំដែនលេខ ៨២១ ទទួលបានអង្រឹង ចំនួន៥០ បន្ថែមលើសម្ភារខាងលើ។ ស្នងការដ្ឋាននគរបាលខេត្តបាត់ដំបង និងស្នងការដ្ឋាននគរបាលខេត្តប៉ៃលិន ក្នុងមួយស្នងការដ្ឋាន ទទួលបានថវិកា ចំនួន ១០លាន៕

ដោយ៖ ណយ នឿន (ប្រភព៖ មន្ទីរព័ត៌មានខេត្តបាត់ដំបង)