AKP បន្ទាយមានជ័យ ថ្ងៃទី៣០ ខែសីហា ឆ្នាំ២០២៦ -- ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានជំរុញឱ្យអនុសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ស្រុកភ្នំស្រុក បន្តពង្រឹងសាមគ្គីភាព ផ្ទៃក្នុង បង្កើនប្រសិទ្ធភាពការងារ និងចូលរួមដោះស្រាយបញ្ហាប្រឈមរបស់ស្ត្រី និងគ្រួសារនៅមូលដ្ឋាន ឱ្យកាន់តែមានប្រសិទ្ធភាព ដើម្បីរួមចំណែកជំរុញការអភិវឌ្ឍសង្គមប្រកបដោយបរិយាបន្ន។

ការជំរុញនេះធ្វើឡើងក្នុងឱកាសដែលឯកឧត្តម អ៊ុំ រាត្រី អញ្ជើញជាអធិបតីក្នុង ពិធីប្រកាសទទួលស្គាល់ការបំពេញបន្ថែមសមាសភាពជាផ្លូវការ គណៈកម្មការអនុសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ស្រុកភ្នំស្រុក ខេត្តបន្ទាយមានជ័យ នាថ្ងៃអាទិត្យ ទី៣០ ខែសីហា ឆ្នាំ២០២៦ នៅសាលប្រជុំសាលាស្រុកភ្នំស្រុក។

ពិធីនេះមានការអញ្ជើញចូលរួមពីលោកជំទាវ ជ័យ ណារី អ៊ុំ រាត្រី អនុប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត លោកជំទាវ នួន សុភ័ណ អ្នកតំណាងរាស្ត្រមណ្ឌលខេត្តបន្ទាយមានជ័យ លោក លោកស្រី អភិបាលរងខេត្ត ក្រុមការងារសាខាសមាគមនារីខេត្ត ថ្នាក់ដឹកនាំរដ្ឋបាលស្រុក ក្រុមប្រឹក្សាស្រុក-ឃុំ ព្រមទាំងសមាជិក សមាជិកា អនុសាខាសមាគមនារីស្រុកភ្នំស្រុកជាច្រើនរូប។

ថ្លែងក្នុងឱកាសនេះ ឯកឧត្តម អ៊ុំ រាត្រី បានគូសបញ្ជាក់ថា ការបំពេញបន្ថែមសមាសភាពគណៈកម្មការអនុសាខាសមាគមនារីស្រុកភ្នំស្រុក មិនមែនជាការផ្លាស់ប្តូរ ឬបន្ថែមសមាសភាពតាមទម្រង់រដ្ឋបាលតែប៉ុណ្ណោះទេ ប៉ុន្តែជាការពង្រឹងកម្លាំងស្នូលរបស់សមាគម ដើម្បីឱ្យការងាររបស់សមាគមនៅមូលដ្ឋានមានភាពរឹងមាំ សកម្ម និងអាចឆ្លើយតបទៅនឹងតម្រូវការជាក់ស្តែងរបស់ស្ត្រី និងប្រជាពលរដ្ឋ។

ឯកឧត្តមបានជំរុញឱ្យគណៈកម្មការអនុសាខាដែលទទួលបានការទទួលស្គាល់ជាផ្លូវការ ត្រូវបំពេញតួនាទីដោយស្មារតីទទួលខុសត្រូវ សាមគ្គីភាព និងសហការជិតស្និទ្ធជាមួយរដ្ឋបាលស្រុក ឃុំ និងស្ថាប័នពាក់ព័ន្ធ ដើម្បីឱ្យការអនុវត្តការងាររបស់សមាគមអាចឈានដល់ស្ត្រីគ្រប់មូលដ្ឋាន ជាពិសេសស្ត្រីដែលមានជីវភាពខ្វះខាត និងក្រុមងាយរងគ្រោះ។

ជាមួយគ្នានេះ ឯកឧត្តមអភិបាលខេត្តបានលើកឡើងពីសារៈសំខាន់នៃការចូលរួមរបស់ស្ត្រីក្នុងការអភិវឌ្ឍសង្គម ដោយស្ត្រីមិនត្រឹមតែជាអ្នកទទួលផលពីការអភិវឌ្ឍនោះទេ ប៉ុន្តែជាកម្លាំងសកម្មក្នុងការចូលរួមកសាងគ្រួសារ សហគមន៍ និងសង្គមជាតិ។ ដូច្នេះ ការលើកកម្ពស់សមត្ថភាពស្ត្រី ការការពារសិទ្ធិ និងផលប្រយោជន៍ស្ត្រី និងការបង្កើនឱកាសឱ្យស្ត្រីចូលរួមក្នុងកិច្ចការសង្គម គឺជាកត្តាចាំបាច់សម្រាប់ការអភិវឌ្ឍប្រកបដោយចីរភាព។

ឯកឧត្តម អ៊ុំ រាត្រី ក៏បានណែនាំឱ្យអនុសាខាសមាគមនារីស្រុកភ្នំស្រុក យកចិត្តទុកដាក់លើការងារអប់រំ ផ្សព្វផ្សាយចំណេះដឹង និងលើកកម្ពស់ការយល់ដឹងរបស់ស្ត្រី និងប្រជាពលរដ្ឋអំពីសុខភាព អនាម័យ ការអប់រំ ការការពារកុមារ ការទប់ស្កាត់អំពើហិង្សាក្នុងគ្រួសារ និងបញ្ហាសង្គមផ្សេងៗដែលអាចប៉ះពាល់ដល់សុវត្ថិភាព និងសេចក្តីថ្លៃថ្នូររបស់ស្ត្រី។

លើសពីនេះ ត្រូវបន្តជំរុញសកម្មភាពដែលអាចជួយស្ត្រីបង្កើនសមត្ថភាពរកប្រាក់ចំណូល និងកែលម្អជីវភាពគ្រួសារ តាមរយៈការបណ្តុះបណ្តាលជំនាញវិជ្ជាជីវៈ ការលើកកម្ពស់សហគ្រិនភាព និងការភ្ជាប់ស្ត្រីទៅនឹងឱកាសសេដ្ឋកិច្ចនៅក្នុងមូលដ្ឋាន។

ឯកឧត្តមបានសង្កត់ធ្ងន់ថា ការងាររបស់សមាគមនារីត្រូវធ្វើឡើងដោយឈរលើស្មារតីបម្រើប្រជាពលរដ្ឋ និងមិនទុកឱ្យស្ត្រី ឬគ្រួសារណាមួយដែលកំពុងប្រឈមនឹងការលំបាក ត្រូវបានមើលរំលងឡើយ។ ការចុះជួបផ្ទាល់ជាមួយប្រជាពលរដ្ឋ ការស្តាប់បញ្ហា និងការស្វែងរកដំណោះស្រាយសមស្រប គឺជាវិធីសំខាន់ក្នុងការធ្វើឱ្យសមាគមកាន់តែមានប្រសិទ្ធភាព និងទទួលបានទំនុកចិត្តពីប្រជាពលរដ្ឋ។

ជាមួយនឹងការពង្រឹងសមាសភាពថ្មី ឯកឧត្តម អ៊ុំ រាត្រី បានជំរុញឱ្យគណៈកម្មការអនុសាខាសមាគមនារីស្រុកភ្នំស្រុក រួមគ្នាធ្វើការដោយសាមគ្គីភាព ចែករំលែកបទពិសោធន៍ និងប្រើប្រាស់សមត្ថភាពរបស់សមាជិកម្នាក់ៗឱ្យបានពេញលេញ ដើម្បីឱ្យសមាគមក្លាយជាដៃគូដ៏មានប្រសិទ្ធភាពរបស់រដ្ឋបាលមូលដ្ឋានក្នុងការលើកកម្ពស់សុខុមាលភាពប្រជាពលរដ្ឋ។

ពិធីប្រកាសទទួលស្គាល់ការបំពេញបន្ថែមសមាសភាពជាផ្លូវការនាពេលនេះ មិនត្រឹមតែមានន័យក្នុងការរៀបចំរចនាសម្ព័ន្ធការងាររបស់អនុសាខាសមាគមនារីស្រុកភ្នំស្រុកឱ្យមានភាពច្បាស់លាស់ប៉ុណ្ណោះទេ ប៉ុន្តែថែមទាំងជាការបើកទំព័រថ្មីសម្រាប់ការរួមគ្នាពង្រឹងសកម្មភាពការងារស្ត្រីនៅមូលដ្ឋាន ឱ្យកាន់តែសកម្ម ជិតស្និទ្ធជាមួយប្រជាពលរដ្ឋ និងឆ្លើយតបបានល្អប្រសើរទៅនឹងតម្រូវការរបស់សង្គម៕

ដោយ ឈុន សារ៉ាត