AKP កំពង់ធំ ថ្ងៃទី៣០ ខែសីហា  ឆ្នាំ២០២៦ -- លោកហាន កុសល អភិបាលរង នៃគណៈអភិបាលខេត្ត តំណាងឯកឧត្តម នួន ផារ័ត្ន អភិបាលខេត្តកំពង់ធំ បានអញ្ជើញចូលរួមក្នុងពិធីបើកគម្រោងដាំដើមឈើ «តោះដាំ ២០២៦» ឬ «Let's Plant 2026» ក្រោមប្រធានបទ «ទេសចរណ៍ម្នាក់ ដើមឈើមួយដើម» នៅតំបន់ទេសចរណ៍ប្រវត្តិសាស្ត្រសំបូរព្រៃគុក ខេត្តកំពង់ធំស្ថិតនៅសហគមន៍ទេសចរណ៍សំបូរព្រៃគុក ឃុំសំបូរ ស្រុកប្រាសាទសំបូរ ខេត្តកំពង់ធំ នាព្រឹកថ្ងៃអាទិត្យទី៣០ ខែសីហា ឆ្នាំ២០២៦ ដោយមានការអញ្ជើញចូលរួមពី ម្ចាស់ក្រុមហ៊ុនតូយូតា ប្រធានមន្ទីរជុំវិញខេត្ត លោក ឃីម សុខឃាង អភិបាលស្រុកប្រាសាទសំបូរ កងកម្លាំងទាំងបី និងក្រុមសិស្ស-និស្សិត ប្រមាណជាង៣០០នាក់។

គម្រោងដាំដើមឈើនេះ មានគោលបំណងចូលរួមបង្កើនភាពបៃតងនិងសោភ័ណភាពនៅតំបន់ទេសចរណ៍ប្រវត្តិសាស្ត្រសំបូរព្រៃគុក ជាពិសេសការដាំដើមឈើអមសងខាងផ្លូវដែលត្រូវធ្វើដំណើរទៅកាន់រមណីយដ្ឋានប្រាសាទសំបូរព្រៃគុក ដើម្បីធ្វើឱ្យបរិស្ថានតំបន់ទេសចរណ៍កាន់តែមានភាពស្រស់បំព្រង និងមានបរិយាកាសបៃតងសម្រាប់ភ្ញៀវទេសចរណ៍។

លោកហាន កុសល បានលើកឡើងពីសារៈសំខាន់នៃការដាំដើមឈើឡើងវិញ ដោយសង្កត់ធ្ងន់ថាការដាំដើមឈើមិនត្រឹមតែជួយលើកកម្ពស់សោភ័ណភាពតំបន់ទេសចរណ៍ប៉ុណ្ណោះទេ ប៉ុន្តែថែមទាំងជាការចូលរួមថែរក្សាបរិស្ថាន និងធនធានធម្មជាតិផងដែរ។ ការដាំដើមឈើអមសងខាងផ្លូវទៅកាន់រមណីយដ្ឋានប្រាសាទសំបូរព្រៃគុក ដោយលើកទឹកចិត្តឱ្យអនុវត្តគោលការណ៍ «មួយនាក់ ដាំដើមឈើមួយដើម»។ ជាមួយគ្នានេះ អ្នកដែលបានដាំដើមឈើរួចត្រូវមានការទទួលខុសត្រូវក្នុងការថែរក្សា និងការពារដើមឈើទាំងនោះឱ្យបានគង់វង្សដើម្បីឱ្យដើមឈើអាចលូតលាស់បានល្អ និងផ្តល់ប្រយោជន៍រយៈពេលវែង។

លោក ហាន កុសល អភិបាលរងខេត្តកំពង់ធំ បានលើកឡើងបន្ថែមទៀតថា តាមគម្រោង «តោះដាំ២០២៦» ដើមឈើដែលត្រូវដាំមានចំនួនសរុប២.០២៦ដើមក្នុងនោះដើមឈើហូបផ្លែចំនួន ១.៨២៦ដើមនិងដើមចាចំនួន២០០ដើម។ ការដាំដើមឈើទាំងនេះ នឹងរួមចំណែកបង្កើនផ្ទៃបៃតង សោភ័ណភាពតាមដងផ្លូវនិងបរិវេណតំបន់ទេសចរណ៍ប្រវត្តិសាស្ត្រសំបូរព្រៃគុក។ 

គម្រោងនេះក៏ជាសកម្មភាពមួយដែលបង្ហាញពីការយកចិត្តទុកដាក់លើការរួមបញ្ចូលការអភិវឌ្ឍវិស័យទេសចរណ៍ជាមួយការថែរក្សាបរិស្ថាន ដោយផ្តោតលើការចូលរួមរបស់ប្រជាពលរដ្ឋ និងអ្នកពាក់ព័ន្ធ ក្នុងការដាំ និងថែរក្សាដើមឈើឱ្យបានយូរអង្វែង៕

ដោយ ស៊ុម វណ្ណា