AKP ភ្នំពេញ ថ្ងៃទី២៦ ខែឧសភា ឆ្នាំ២០២៦---
ឯកអគ្គរាជទូតកម្ពុជាប្រចាំនៅសាធា រណរដ្ឋកូរ៉េបានជួបពិភាក្សការងារជាមួយទូតអេត្យូពីប្រចាំកម្ពុជាដើម្បីផ្លាស់ប្ដូរយោបល់គ្នាលើការពង្រឹងកិច្ចសហប្រតិបត្តិការ វាងស្ថានតំណាងនៃប្រទេសទាំងពីរ។
នៅព្រឹកថ្ងៃទី២៦ ខែឧសភា ឆ្នាំ២០២៦ ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានទទួលជួបពិភាក្សាការងារជាមួយឯកឧត្តមបណ្ឌិត Dessie Dalkie Dukamo ឯកអគ្គរដ្ឋទូតអេត្យូពីប្រចាំកម្ពុជាដែលមាននិវេសនដ្ឋាននៅសាធារណរដ្ឋកូរ៉េ នៅស្ថានទូតកម្ពុជាក្នុងទីក្រុងសេអ៊ូល។

ឯកឧត្តមបណ្ឌិត Dessie Dalkie Dukamo បានថ្លែងអំណរគុណដល់រាជរដ្ឋាភិបាលកម្ពុជា​ ដែលបានជួយសម្រួលដល់ការធ្វើដំណើររបស់ប្រជាជនអេត្យូពី ដែលមានបំណងធ្វើមាតុភូមិនិវត្តន៍ពីប្រទេសកម្ពុជាទៅប្រទេសអេត្យូពីវិញ​ នាពេលកន្លងមកថ្មីៗនេះ។  

ក្នុងឱកាសនៃជំនួប ភាគីទាំងពីរ​ក៏បានពិភាក្សាផ្លាស់ប្ដូរយោបល់គ្នាលើការពង្រឹងកិច្ចសហប្រតិបត្តិការ វាងស្ថានតំណាងនៃប្រទេសទាំងពីរ នៅសាធារណរដ្ឋកូរ៉េ ដើម្បីលើកកម្ពស់ប្រសិទ្ធភាពការងារ និងការគាំទ្រគ្នាទៅវិញទៅមកក្នុងបេសកកម្មការទូត។ ភាគីទាំងពីរ​ ក៏បានពិភាក្សាអំពីបញ្ហាតំបន់​ និងអន្តរជាតិ​ ដែលជាកង្វល់រួមផងដែរ៕

ដោយ៖ ប៊ុនរិទ្ធ