AKP បន្ទាយមានជ័យ ថ្ងៃទី២៦ ខែឧសភា ឆ្នាំ២០២៦--ក្នុងស្មារតី «រួមសុខរួមទុក្ខ និងមិនទុកពលរដ្ឋណាម្នាក់ចោល» ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងនាមជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានដឹកនាំក្រុមការងារចុះជួបសំណេះសំណាលដោយផ្ទាល់ជាមួយប្រជាពលរដ្ឋភៀសសឹក ដែលកំពុងស្នាក់នៅបណ្ដោះអាសន្ននៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ កាលពីរសៀលថ្ងៃទី២៥ ខែឧសភា ឆ្នាំ២០២៦នេះ។

អមដំណើរដោយឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ឯកឧត្តមរដ្ឋមន្ត្រីបានសង្កត់ធ្ងន់ពីការយកចិត្តទុកដាក់ខ្ពស់បំផុតរបស់ប្រមុខរាជរដ្ឋាភិបាលកម្ពុជា ចំពោះសុខទុក្ខរបស់ប្រជាពលរដ្ឋគ្រប់រូប ជាពិសេសក្រុមជនងាយរងគ្រោះ និងជនភៀសសឹកដែលកំពុងស្ថិតក្នុងស្ថានភាពលំបាក។

ក្នុងសកម្មភាពចុះសួរសុខទុក្ខនេះ ឯកឧត្តម ឌិត ទីណា បាននាំយកកូនឈើហូបផ្លែ និងកូនស្អំ សរុបជាង ៣,០០០ កូនព្រមទាំងពូជបន្លែចម្រុះចំនួន ២,៨០៥ ថង់ មកចែកជូនពុកម៉ែបងប្អូនជនភៀសសឹក។ ការផ្ដល់ជូននេះ មិនមែនគ្រាន់តែជាការឧបត្ថម្ភសម្ភារៈប៉ុណ្ណោះទេ ប៉ុន្តែគឺជាយុទ្ធសាស្ត្រគាំទ្រជីវភាពដោយផ្ទាល់ ដើម្បីឱ្យពួកគាត់អាចដាំដុះបន្លែ និងកូនឈើនៅតាមជម្រកបណ្ដោះអាសន្ន ដែលនឹងផ្ដល់ជាម្លប់ ការកែលម្អបរិស្ថានជុំវិញ និងរួមចំណែកកែលម្អសុខុមាលភាពជីវភាពរស់នៅប្រចាំថ្ងៃ។

ក្រៅពីការចែកពូជដំណាំ ឯកឧត្តមរដ្ឋមន្ត្រី និងក្រុមការងារ បានចុះពិនិត្យដោយផ្ទាល់នូវវឌ្ឍនភាពនៃគម្រោងគាំទ្រជីវភាពតាមរយៈការដាំបន្លែ និងការចិញ្ចឹមមាន់ស្រែ។ នេះគឺជាគំរូនៃការដោះស្រាយបញ្ហាជាក់ស្ដែង ដែលរាជរដ្ឋាភិបាលចង់ឱ្យពលរដ្ឋមានសមត្ថភាពផលិតស្បៀងដោយខ្លួនឯង សូម្បីតែនៅក្នុងស្ថានភាពស្នាក់នៅបណ្ដោះអាសន្ន។

ទន្ទឹមនឹងនេះ ឯកឧត្តម ឌិត ទីណា បានបង្ហាញពីទឹកចិត្តអាណិតអាសូរយ៉ាងជ្រាលជ្រៅ ដោយបានចុះសួរសុខទុក្ខផ្ទាល់ដល់បងប្អូនជនពិការ និងបានផ្តល់ជូននូវ រទេះរុញ ជាអំណោយដើម្បីសម្រួលដល់ការធ្វើដំណើរ និងការរស់នៅប្រចាំថ្ងៃផងដែរ។

ដំណើរចុះមូលដ្ឋានរបស់ឯកឧត្តមរដ្ឋមន្ត្រីនៅថ្ងៃនេះ បានឆ្លុះបញ្ចាំងយ៉ាងច្បាស់ថា ការយកចិត្តទុកដាក់ជាប្រព័ន្ធ រាជរដ្ឋាភិបាលតែងតែតាមដាន និងរកដំណោះស្រាយជូនពលរដ្ឋក្នុងគ្រប់កាលៈទេសៈ។

ភាពជិតស្និទ្ធ មន្ត្រីថ្នាក់ដឹកនាំមិននៅឆ្ងាយពីប្រជាជន ដោយបានចុះផ្ទាល់ដើម្បីស្តាប់ និងដោះស្រាយទុក្ខលំបាក។សាមគ្គីភាព ការមិនបោះបង់ចោលជនភៀសសឹក គឺជាគោលការណ៍ដ៏សំខាន់ក្នុងការរក្សាសុខុមាលភាពសង្គមជាតិ។

ទង្វើនេះបានបង្កើតឱ្យមានបរិយាកាសកក់ក្តៅ និងផ្តល់ក្តីសង្ឃឹមយ៉ាងធំធេងដល់បងប្អូនជនភៀសសឹកនៅឃុំស្លក្រាម ដែលកំពុងខិតខំតស៊ូក្នុងជីវិត ដោយមានការជួយជ្រោមជ្រែងយ៉ាងពេញទំហឹងពីថ្នាក់ដឹកនាំរាជរដ្ឋាភិបាល និងអាជ្ញាធរមូលដ្ឋាន៕

ដោយ ឈុន សារ៉ាត