AKP ឧត្តរមានជ័យ ថ្ងៃទី២៦ ខែឧសភា ឆ្នាំ២០២៦--លោក ផុន ចាន់និល អភិបាល នៃគណៈអភិបាលក្រុងសំរោងបានដឹកនាំកិច្ចប្រជុំស្តីពីការដាក់ឱ្យប្រើប្រាស់ «លេខកូដសេវាថ្មី» និងយន្តការបែងចែកចំណូលពីការផ្តល់សេវារដ្ឋបាល ដើម្បីពង្រឹងតម្លាភាព និងប្រសិទ្ធភាពការងារនៅថ្ងៃចន្ទទី២៥ ខែឧសភា ឆ្នាំ២០២៦ ដោយមានការចូលរួមពី លោកនាយករដ្ឋបាល និងមន្ត្រីជំនាញរដ្ឋបាលក្រុងផងដែរ ។

លោក ផុន ចាន់និល បានលើកឡើងថា ការធ្វើកំណែទម្រង់ប្រព័ន្ធផ្តល់សេវារដ្ឋបាលគឺជាយន្តការដ៏សំខាន់របស់រាជរដ្ឋាភិបាល ក្នុងការតម្រង់ទិសការផ្តល់សេវាជូនប្រជាពលរដ្ឋឱ្យកាន់តែមានភាពងាយស្រួល ឆាប់រហ័ស និងមានតម្លាភាព ។កិច្ចប្រជុំនេះ ធ្វើឡើងដើម្បីតម្រង់ទិស និងណែនាំការអនុវត្តន៍ជាក់ស្តែងនូវប្រកាសអន្តរក្រសួងថ្មីចំនួន២ របស់ក្រសួងសេដ្ឋកិច្ច និងហិរញ្ញវត្ថុ និងក្រសួងមហាផ្ទៃ ចុះថ្ងៃទី២៨ ខែមេសា ឆ្នាំ២០២៦ កន្លងមកនេះ ។ លោកបានបន្តថា ការដាក់ឱ្យប្រើប្រាស់កម្មវិធីព័ត៌មានវិទ្យាថ្មី (ប្រកាស ៣៤៣) អគ្គនាយកដ្ឋានរដ្ឋបាល នឹងដាក់ឱ្យដំណើរការលេខកូដសេវាថ្មី នៅក្នុងប្រព័ន្ធព័ត៌មានវិទ្យាសម្រាប់គ្រប់គ្រង និងផ្តល់សេវានៅការិយាល័យច្រកចេញចូលតែមួយ ចាប់ពីថ្ងៃទី២៦ ខែឧសភា ឆ្នាំ២០២៦ នេះតទៅ ដែលជាការកំណត់ច្បាស់លាស់នូវ "តម្លៃសេវាអតិបរមា (ជារៀល)" និង "រយៈពេលអតិបរមា (ថ្ងៃធ្វើការ)"។ ដូចជាការបញ្ជាក់ភាពត្រឹមត្រូវលើសញ្ញាបត្រ ត្រូវមានតម្លៃ ១,០០០រៀលក្នុងមួយសន្លឹក និងត្រូវធ្វើឱ្យរួចរាល់ក្នុងរយៈពេល ៣ថ្ងៃធ្វើការ។ 

លោកបានបន្ថែមថា យន្តការបែងចែកចំណូល និងការលើកទឹកចិត្ត (ប្រកាស ៣៤៤) ប្រព័ន្ធថ្មីនេះ បានធ្វើការកែសម្រួលរចនាសម្ព័ន្ធបែងចែកចំណូលប្រកបដោយតម្លាភាព ដោយផ្ទេរអំណាច និងកញ្ចប់ថវិកាកាន់តែច្រើនមកមូលដ្ឋាន ជាក់ស្តែងសម្រាប់រដ្ឋបាលក្រុង សេវានីត្យានុកូលកម្ម បង់ចូលថវិកាក្រុង ១៩ភាគរយ ប្រាក់រង្វាន់ក្រុង ៧៩ភាគរយ មន្ទីរខេត្ត ១ភាគរយ  ក្រសួងមហាផ្ទៃ ១ភាគរយ ។ សេវាការងាររដ្ឋបាល បង់ចូលថវិកាក្រុង ១៩ភាគរយ  រង្វាន់ក្រុង ៧៤ភាគរយ  រង្វាន់ឃុំ/សង្កាត់ ៥ភាគរយ មន្ទីរខេត្ត ១ភាគរយ  ក្រសួងមហាផ្ទៃ ១ភាគរយ ។ សេវារដ្ឋបាលផ្សេងៗ (សំណង់, សុខាភិបាលជាដើម…) បង់ចូលថវិកាក្រុង ៣៩ភាគរយ  រង្វាន់ក្រុង ៥៤ភាគរយ  រង្វាន់ឃុំ/សង្កាត់ ៥ភាគរយ  មន្ទីរខេត្ត ១ភាគរយ  ក្រសួងមហាផ្ទៃ ១ភាគរយ ។ ក្នុងន័យនេះ ការបើកប្រាក់រង្វាន់ អនុញ្ញាតឱ្យរដ្ឋបាលក្រុង អាចធ្វើបុរេប្រទានប្រាក់រង្វាន់ (បើកមុន) ហើយទូទាត់ទម្រទន់ជាដាច់ខាតរៀងរាល់ខែ ដើម្បីជាការលើកទឹកចិត្តដល់មន្ត្រីដែលខិតខំបំពេញការងារជូនប្រជាពលរដ្ឋដោយផ្ទាល់។

លោកបានបន្តទៀតថា រដ្ឋបាលក្រុងសំរោង បានត្រៀមខ្លួនរួចជាស្រេចក្នុងការអនុវត្តន៍ប្រព័ន្ធកូដសេវាថ្មីនេះ ដើម្បីផ្តល់សេវារដ្ឋបាលតាមរយៈការិយាល័យច្រកចេញចូលតែមួយ ជូនប្រជាពលរដ្ឋឱ្យកាន់តែមានភាពរហ័ស ងាយស្រួល និងមានតម្លាភាពខ្ពស់បំផុត ស្របតាមគោលនយោបាយវិមជ្ឈការរបស់រាជរដ្ឋាភិបាល៕ 

ដោយ ទិត ស្រ៊