AKP បន្ទាយមានជ័យ ថ្ងៃទី២៦ ខែឧសភា ឆ្នាំ២០២៦--សុខភាពរបស់ស្ត្រីក្នុងពេលមានផ្ទៃពោះ មិនត្រឹមតែជាសុខុមាលភាពផ្ទាល់ខ្លួនប៉ុណ្ណោះទេ ប៉ុន្តែគឺជាកត្តាកំណត់យ៉ាងសំខាន់នៃភាពរឹងមាំ និងបញ្ញាស្មារតីរបស់ទារកនៅពេលប្រសូតមក។ ក្នុងន័យនេះ អាជ្ញាធរក្រុងសិរីសោភ័ណ បានបង្កើនការយកចិត្តទុកដាក់ខ្ពស់តាមរយៈការចុះអប់រំផ្សព្វផ្សាយផ្ទាល់ដល់សហគមន៍។

កាលពីវេលាម៉ោង ០២៖០០ នាទីរសៀល ថ្ងៃទី២៥ ខែឧសភា ឆ្នាំ២០២៦ លោកស្រី ហ៊ាង គឹមស៊ាងអភិបាលរងក្រុងសិរីសោភ័ណ បានអញ្ជើញចូលរួមក្នុងវេទិកាសហគមន៍ស្តីពី «ការថែទាំសុខភាពស្ត្រី និងអាហារូបត្ថម្ភនៅអំឡុងពេលមានផ្ទៃពោះ»ដែលប្រារព្ធឡើងនៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។

ក្នុងវេទិកាដ៏មានសារៈសំខាន់នេះ លោកស្រីអភិបាលរងក្រុង បានថ្លែងទៅកាន់ស្ត្រីមានផ្ទៃពោះ និងប្រជាពលរដ្ឋដែលបានចូលរួមថា ការថែទាំសុខភាពចាប់តាំងពីដំណាក់កាលចាប់ផ្ដើមមានផ្ទៃពោះ គឺជាមូលដ្ឋានគ្រឹះនៃកំណើនទារកដែលមានសុខភាពល្អ។ លោកស្រីបានជំរុញយ៉ាងទទូចដល់ស្ត្រីមានផ្ទៃពោះទាំងអស់ត្រូវយកចិត្តទុកដាក់ខ្ពស់ លើការថែទាំសុខភាពរាងកាយ និងផ្លូវចិត្តឱ្យបានល្អប្រសើរ។

គោរពតាមការណែនាំ ត្រូវទៅពិនិត្យសុខភាពនៅតាមមណ្ឌលសុខភាព ឬមន្ទីរពេទ្យឱ្យបានទៀងទាត់តាមកាលកំណត់របស់គ្រូពេទ្យ។

ប្រតិបត្តិតាមការណែនាំវិជ្ជាជីវៈត្រូវស្តាប់ និងអនុវត្តតាមដំបូន្មានរបស់គ្រូពេទ្យជំនាញទាំងស្រុង ដើម្បីរក្សាបាននូវសុវត្ថិភាពសម្រាប់ទាំងទារកក្នុងផ្ទៃ និងសុខភាពផ្ទាល់ខ្លួនរបស់មាតា។

ក្រៅពីការពិនិត្យសុខភាព លោកស្រី ហ៊ាង គឹមស៊ាង ក៏បានសង្កត់ធ្ងន់ផងដែរទៅលើសារៈសំខាន់នៃ ការទទួលទានអាហារូបត្ថម្ភគ្រប់គ្រាន់ ដែលជាឥន្ធនៈដ៏សំខាន់សម្រាប់ទ្រទ្រង់ការលូតលាស់របស់ទារក។

វេទិកានេះមិនត្រឹមតែជាការផ្តល់ចំណេះដឹងប៉ុណ្ណោះទេ ប៉ុន្តែជាការបញ្ជាក់ពីការប្តេជ្ញាចិត្តរបស់រដ្ឋបាលក្រុងសិរីសោភ័ណ ក្នុងការកាត់បន្ថយអត្រាប្រឈមនានាដែលកើតឡើងក្នុងពេលមានផ្ទៃពោះ និងការជំរុញឱ្យសហគមន៍មានទម្លាប់រស់នៅប្រកបដោយសុខភាពល្អ ដើម្បីគុណភាពជីវិតដ៏ល្អប្រសើរសម្រាប់ពលរដ្ឋក្នុងមូលដ្ឋាន៕

ដោយ ឈុន សារ៉ាត