AKP ភ្នំពេញ ថ្ងៃទី២០ ខែមីនា ឆ្នាំ២០២៦ -- ប្រទេសសិង្ហបុរី និងជប៉ុន បានធ្វើឱ្យប្រសើរឡើងនូវទំនាក់ទំនងទ្វេភាគីរបស់ពួកគេទៅជាភាពជាដៃគូយុទ្ធសាស្ត្រ ដោយមានកិច្ចសហប្រតិបត្តិការកាន់តែស៊ីជម្រៅដែលបានគ្រោងទុកនៅក្នុងវិស័យជាច្រើន រាប់ចាប់ពីបញ្ញាសិប្បនិម្មិត (AI) រហូតដល់ការផ្លាស់ប្តូរបៃតង។

នាយករដ្ឋមន្ត្រីសិង្ហបុរី លោក ឡរេនស៍ វ៉ុង (Lawrence Wong) និងនាយករដ្ឋមន្ត្រីជប៉ុន លោកស្រី សាណាអេ តាកាអ៊ីឈិ (Sanae Takaichi)បានប្រកាសពីការធ្វើឱ្យប្រសើរឡើងនេះកាលពីពេលថ្មីៗនេះ ជាមួយនឹងខួបលើកទី៦០ នៃទំនាក់ទំនងការទូតទ្វេភាគី។

សេចក្តីថ្លែងការណ៍រួមមួយដែលបានចេញផ្សាយបន្ទាប់ពីមេដឹកនាំទាំងពីរ និងគណៈប្រតិភូរបស់ពួកគេបានជួបគ្នានៅការិយាល័យនាយករដ្ឋមន្ត្រីក្នុងទីក្រុងតូក្យូ ដូចដែលបានរាយការណ៍ដោយសារព័ត៌មាន The Straits Times បាននិយាយថា ភាពជាដៃគូយុទ្ធសាស្ត្រនឹងធ្វើឱ្យគ្រឹះនៃទំនាក់ទំនងដ៏សំខាន់ និងពហុវិស័យរវាងប្រទេសទាំងពីរកាន់តែស៊ីជម្រៅ និងពង្រីកកិច្ចសហប្រតិបត្តិការនៅក្នុងវិស័យចំនួនប្រាំ។

វិស័យទាំងនោះរួមមាន ការលើកកម្ពស់ពាណិជ្ជកម្មសេរី និងកិច្ចសហប្រតិបត្តិការសេដ្ឋកិច្ច ឌីជីថលូបនីយកម្ម និងបច្ចេកវិទ្យា សន្តិសុខ និងការពារជាតិ ការផ្លាស់ប្តូរបៃតង និងកិច្ចសហប្រតិបត្តិការថាមពល និងភាពជាដៃគូ និងការផ្លាស់ប្តូរ។

ក្នុងចំណោមកិច្ចព្រមព្រៀងថ្មីៗទាំងនោះ គឺការបង្កើតកិច្ចសន្ទនាគោលនយោបាយបច្ចេកវិទ្យាព័ត៌មាន និងទំនាក់ទំនងរវាងក្រសួងអភិវឌ្ឍន៍ឌីជីថល និងព័ត៌មានរបស់ប្រទេសសិង្ហបុរី និងសមភាគីជប៉ុនរបស់ខ្លួន។សេចក្តីថ្លែងការណ៍នេះបាននិយាយថា កិច្ចការនេះនឹងអនុញ្ញាតឱ្យភាគីទាំងពីរស្វែងយល់ពីកិច្ចសហប្រតិបត្តិការក្នុងវិស័យឌីជីថល រួមទាំងការអភិវឌ្ឍហេដ្ឋារចនាសម្ព័ន្ធឌីជីថលផងដែរ។

ភាគីទាំងពីរក៏បានព្រមព្រៀងគ្នាក្នុងការពង្រឹងភាពជាដៃគូរបស់ពួកគេក្នុងវិស័យ AI ដើម្បីកសាងប្រព័ន្ធអេកូឡូស៊ី AI ដ៏មានសុវត្ថិភាព រឹងមាំ និងគួរឱ្យទុកចិត្ត ដែលរួមបញ្ចូលទាំងវិស័យមួយចំនួន ដូចជាសុវត្ថិភាព និងអភិបាលកិច្ច AI ក៏ដូចជាគំរូ AI ដែលគោរពភាសា និងវប្បធម៌ក្នុងស្រុកជាដើម៕
ដោយ៖ យា ចិន្ដាខន្ដី (ប្រភព៖ VNA)