AKP ភ្នំពេញ ថ្ងៃទី២១ ខែមេសា ឆ្នាំ២០២៦ -- អ៊ីរ៉ាក់ និងស៊ីរី បានបើកច្រកព្រំដែនរ៉ាប៊ីយ៉ាឡើងវិញកាលពីថ្ងៃចន្ទ ដោយស្ដារនូវផ្លូវគោកដ៏សំខាន់មួយដែលត្រូវបានបិទអស់រយៈពេលជិត ១៣ឆ្នាំដោយសារតែជម្លោះ និងការកើនឡើងនៃក្រុមភេរវកររដ្ឋអ៊ីស្លាម (IS)។

ច្រកព្រំដែននេះដែលគេស្គាល់ថាជា ច្រក al-Yarubiyah នៅខាងប្រទេសស៊ីរី បានបន្តប្រតិបត្តិការឡើងវិញបន្ទាប់ពីពិធីមួយនៅក្នុងខេត្តហាសាការបស់ប្រទេសស៊ីរី ដែលមានការចូលរួមពីមន្ត្រីមកពីប្រទេសទាំងពីរ។

អាជ្ញាធរគយស៊ីរីបាននិយាយថា ច្រកព្រំដែននេះបើកចំហសម្រាប់ការឆ្លងកាត់ ធ្វើពាណិជ្ជកម្ម នាំចូល នាំចេញ និងចលនាអ្នកដំណើរ។ មន្ត្រីមកពីភាគីទាំងពីរបាននិយាយថា ពួកគេបានពិភាក្សាអំពីជំហាននានាដើម្បីធ្វើឱ្យនីតិវិធីព្រំដែនមានភាពប្រសើរឡើង កែលម្អការសម្របសម្រួល និងពង្រីកពាណិជ្ជកម្មទ្វេភាគី។

ច្រកព្រំដែនរ៉ាប៊ីយ៉ាដែលស្ថិតនៅក្នុងខេត្តនីនីវេភាគខាងជើងរបស់ប្រទេសអ៊ីរ៉ាក់ ជិតទីក្រុងមូស៊ុល បានបិទនៅប្រហែលឆ្នាំ២០១៣ ខណៈដែលសង្គ្រាមស៊ីវិលរបស់ស៊ីរីកាន់តែធ្ងន់ធ្ងរឡើង ហើយពួកសកម្មប្រយុទ្ធ IS បានដណ្តើមយកតំបន់ព្រំដែន។

មន្ត្រីបាននិយាយថា ជាមួយនឹងការបើកច្រកព្រំដែនសំខាន់ៗទាំងបីរវាងប្រទេសអ៊ីរ៉ាក់ និងស៊ីរីឥឡូវនេះកំពុងដំណើរការហើយ ដោយមន្ត្រីរូបនេះបានបន្ថែមថា ការផ្លាស់ប្តូរនេះអាចជំរុញសកម្មភាពសេដ្ឋកិច្ចនៅតំបន់ព្រំដែន និងពង្រឹងទំនាក់ទំនង។

អាជ្ញាធរស៊ីរីបាននិយាយថា ការបើកឡើងវិញនេះត្រូវបានគេរំពឹងថានឹងបង្កើនពាណិជ្ជកម្ម សម្រួលដល់ការដឹកជញ្ជូន និងគាំទ្រដល់ការតភ្ជាប់តំបន់កាន់តែទូលំទូលាយ៕

ដោយ៖ មូល មិនា (ប្រភព៖ ស៊ីនហួ)