AKP ភ្នំពេញ ថ្ងៃទី១៨ ខែមីនា ឆ្នាំ២០២៦ -- ប្រធានាធិបតីតួកគី លោក រេសិប តាយយីប អឺដូហ្គេន (Recep Tayyip Erdogan) កាលពីថ្ងៃអង្គារបានសង្កត់ធ្ងន់លើគោលដៅរបស់ប្រទេសលោកក្នុងការបញ្ចប់ «សង្គ្រាមដែលគ្មានន័យ ខុសច្បាប់ និងខុសឆ្គងខ្លាំងនៅក្នុងប្រទេសអ៊ីរ៉ង់ឱ្យបានឆាប់តាមដែលអាចធ្វើទៅបាន»។

ថ្លែងនៅក្នុងព្រឹត្តិការណ៍ iftar នៅឯវិមានប្រធានាធិបតីក្នុងទីក្រុងអង់ការ៉ា លោក អឺដូហ្គេនបាននិយាយថា ប្រទេសតួកគី «បានថ្កោលទោសយ៉ាងខ្លាំងចំពោះការវាយប្រហារដែលរំលោភលើច្បាប់អន្តរជាតិដោយមិនគិតពីអ្នកណាដែលអនុវត្តវានោះទេ ខណៈពេលដែលយើងខិតខំទប់ស្កាត់សង្គ្រាមមិនឱ្យរីករាលដាល»។

លោកក៏បានសង្កត់ធ្ងន់ផងដែរថា ប្រទេសតួកគីកំពុងគ្រប់គ្រងស្ថានភាពដ៏សំខាន់ដោយការអត់ធ្មត់ ការប្រុងប្រយ័ត្ន និងវិធីសាស្រ្តចំពោះការញុះញង់ ហើយលោកកំពុងចាត់វិធានការចាំបាច់ដើម្បីកំណត់ផលប៉ះពាល់អវិជ្ជមាននៃសង្គ្រាមទៅលើសេដ្ឋកិច្ច និងប្រជាពលរដ្ឋ។

សហរដ្ឋអាមេរិក និងអ៊ីស្រាអែលបានបន្តការវាយលុករួមគ្នាលើប្រទេសអ៊ីរ៉ង់ចាប់តាំងពីថ្ងៃទី២៨ ខែកុម្ភៈ ដោយបានសម្លាប់មនុស្សជាង១.២០០នាក់រហូតមកដល់ពេលនេះ រួមទាំងមេដឹកនាំកំពូល លោក អាលី ខាមីណី (Ali Khamenei) និងឥស្សរជនជាន់ខ្ពស់អ៊ីរ៉ង់ផ្សេងទៀត។

ទីក្រុងតេអេរ៉ង់បានសងសឹកដោយការវាយប្រហារដោយយន្តហោះគ្មានមនុស្សបើក និងមីស៊ីលដែលកំណត់គោលដៅលើអ៊ីស្រាអែល ក៏ដូចជាប្រទេសហ្ស៊កដានី អ៊ីរ៉ាក់ និងប្រទេសជាប់ឈូងសមុទ្រ ដោយអះអាងពីការវាយប្រហារលើ «ទ្រព្យសម្បត្តិយោធាអាម៉េរិក» ដែលបណ្តាលឱ្យមានអ្នកស្លាប់ ការខូចខាតហេដ្ឋារចនាសម្ព័ន្ធ និងការរំខានដល់ទីផ្សារសកលនិងអាកាសចរណ៍។

យោងតាមកងទ័ពលីបង់ និងប្រព័ន្ធផ្សព្វផ្សាយរដ្ឋ បានឱ្យដឹងថា កងកម្លាំងអ៊ីស្រាអែលក៏បានបង្កើនការវាយប្រហារតាមអាកាស និងការបាញ់ផ្លោងកាំភ្លើងធំនៅទូទាំងភាគខាងត្បូងប្រទេសលីបង់ចាប់តាំងពីព្រឹកថ្ងៃអង្គាររួមជាមួយនឹងការឈ្លានពានតាមផ្លូវគោក៕

ដោយ៖ មូល មិនា (ប្រភព៖ AA-AKP)