AKP ភ្នំពេញ ថ្ងៃទី២១ ខែមេសា ឆ្នាំ២០២៦ -- ប្រធានាធិបតីអ៊ីរ៉ង់ លោក ម៉ាសូដ ប៉េហ្សេសគីអាន់ (Masoud Pezeshkian) កាលពីថ្ងៃចន្ទ បានអំពាវនាវឱ្យប្រើប្រាស់គ្រប់មធ្យោបាយសមហេតុផល និងការទូតដើម្បីបន្ធូរបន្ថយភាពតានតឹង ដោយលោកបាននិយាយថា សង្គ្រាមមិនមានផលប្រយោជន៍សម្រាប់នរណាម្នាក់ឡើយ។

ទីភ្នាក់ងារសារព័ត៌មានរដ្ឋអ៊ីរ៉ង់ IRNA បានដកស្រង់សម្តីរបស់លោកដែលបាននិយាយថា «ខណៈដែលកំពុងទប់ទល់នឹងការគំរាមកំហែង គ្រប់មធ្យោបាយសមហេតុផល និងការទូតត្រូវតែប្រើដើម្បីកាត់បន្ថយភាពតានតឹង»។

លោកបានបន្ថែមថា «ក្នុងពេលជាមួយគ្នានេះ ការមិនទុកចិត្តសត្រូវ និងការប្រុងប្រយ័ត្នក្នុងអន្តរកម្ម គឺជាតម្រូវការដែលមិនអាចប្រកែកបាន»។

ដោយឡែកពីគ្នា អ្នកនាំពាក្យក្រសួងការបរទេសអ៊ីរ៉ង់ លោក អេស្មែល បាកាអ៊ី (Esmaeil Baqaei) បាននិយាយថា អ៊ីរ៉ង់មិនមានគម្រោងសម្រាប់កិច្ចចរចាជុំមួយទៀតជាមួយសហរដ្ឋអាមេរិកទេ។

លោក បាកាអ៊ី បាននិយាយនៅក្នុងសេចក្តីថ្លែងការណ៍មួយ ដែលធ្វើឡើងដោយទីភ្នាក់ងារសារព័ត៌មានពាក់កណ្តាលផ្លូវការរបស់ប្រទេសនេះថា «សាធារណរដ្ឋអ៊ីស្លាមអ៊ីរ៉ង់មិនទទួលយកកាលកំណត់ ឬឱសានវាទណាមួយក្នុងការបន្តផលប្រយោជន៍ជាតិរបស់ខ្លួនទេ»។

លោកបានបន្ថែមថា «ការការពារផលប្រយោជន៍ជាតិនឹងបន្តដរាបណាចាំបាច់ ហើយក្នុងករណីមានការផ្សងព្រេងថ្មីណាមួយដោយសហរដ្ឋអាមេរិក ឬរបបអ៊ីស្រាអែល កងកម្លាំងប្រដាប់អាវុធនឹងឆ្លើយតបដោយកម្លាំងពេញលេញ និងអំណាចសម្រេចចិត្ត»។

ការកត់សម្គាល់នេះបានធ្វើឡើង ខណៈដែលប្រភពប៉ាគីស្ថានពីរដែលដឹងពីដំណើរការសម្របសម្រួលបានប្រាប់សារព័ត៌មានអាណាដូលូ(Anadolu) ថា គណៈប្រតិភូអ៊ីរ៉ង់នឹងចូលរួមកិច្ចចរចាជុំទីពីរជាមួយសហរដ្ឋអាមេរិក។

ទីក្រុងតេអេរ៉ង់ និងទីក្រុងវ៉ាស៊ីនតោន បានធ្វើកិច្ចចរចាជុំទីមួយនៅរដ្ឋធានីអ៊ីស្លាម៉ាបាដរបស់ប្រទេសប៉ាគីស្ថាន ដែលបានបញ្ចប់ដោយគ្មានកិច្ចព្រមព្រៀងណាមួយកាលពីថ្ងៃទី១២ ខែមេសា ឆ្នាំ២០២៦។

ពួកគេក៏បានប្រកាសពីបទឈប់បាញ់រយៈពេលពីរសប្តាហ៍នៅថ្ងៃទី០៨ខែមេសា ឆ្នាំ២០២៦ ដែលសម្របសម្រួលដោយប្រទេសប៉ាគីស្ថាន។ បទឈប់បាញ់នេះបានធ្វើឡើងបន្ទាប់ពីមានអរិភាពអស់រយៈពេលជាច្រើនសប្តាហ៍ ដែលបានចាប់ផ្តើមជាមួយនឹងការវាយប្រហាររបស់សហរដ្ឋអាមេរិកនិងអ៊ីស្រាអែលទៅលើប្រទេសអ៊ីរ៉ង់កាលពីចុងខែកុម្ភៈ៕

ដោយ៖ យា ចិន្ដាខន្ដី (ប្រភព៖ AA-AKP)