AKP ភ្នំពេញ ថ្ងៃទី១៨ ខែកុម្ភៈ ឆ្នាំ២០២៦ -- នៅក្នុងខួបលើកទី៣៦ នៃសហព័ន្ធសហជីពឯករាជ្យនៅប៊ុលហ្គារី (CITUB) ប្រធានសហជីព ប្លាមេន ឌីមីត្រូវ (Plamen Dimitrov) បានគូសបញ្ជាក់ថា ខណៈដែលប៊ុលហ្គារីបានបង្កើតកិច្ចគាំពារផ្នែកការងារដ៏រឹងមាំ តែវានៅតែជាសមាជិកសហភាពអឺរ៉ុបដ៏ក្រីក្របំផុត។ ទោះបីជាប្រាក់ចំណូលជាមធ្យម និងប្រាក់ឈ្នួលអប្បបរមាបានកើនឡើងទ្វេដងក្នុងរយៈពេលប្រាំមួយឆ្នាំចុងក្រោយនេះក៏ដោយ ក៏សហជីពបានព្រមានថា កំណើនបច្ចុប្បន្ននៅមិនទាន់គ្រប់គ្រាន់ទេ។ឥឡូវនេះ សហព័ន្ធសហជីព CITUB កំពុងជំរុញឱ្យមានការដំឡើងប្រាក់ឈ្នួលក្នុងវិស័យសាធារណៈឱ្យបាន ១០% នៅក្នុងថវិកាឆ្នាំ២០២៦ដើម្បីទប់ស្កាត់ការធ្លាក់ចុះនៃស្តង់ដារជីវភាព។

លោក ឌីមីត្រូវ បានសម្តែងការព្រួយបារម្ភអំពីភាពតានតឹងសង្គមដែលមានការកើនឡើងដែលបណ្តាលមកពីថ្លៃអគ្គិសនីខ្ពស់ និងអតិផរណាចំណីអាហារ។ លោកបានលើកឡើងជាពិសេសអំពីការផ្លាស់ប្តូររបស់ប្រទេសនេះទៅកាន់ប្រទេសចាយប្រាក់អឺរ៉ូ ដោយបានកត់សម្គាល់ថា ខណៈដែលសហជីពគាំទ្រចលនាដើម្បីបង្កើនប្រាក់ឈ្នួល និយតករត្រូវតែធ្វើបន្ថែមទៀតដើម្បីប្រយុទ្ធប្រឆាំងនឹងការដំឡើងថ្លៃមិនសមហេតុផលនៃទំនិញសំខាន់ៗ ដូចជាផលិតផលទឹកដោះគោជាដើម។ លោកក៏បានស្នើឡើងផងដែរថា ប្រាក់ឧបត្ថម្ភសោធននិវត្តន៍សម្រាប់អ្នកដែលស្ថិតនៅក្រោមបន្ទាត់នៃភាពក្រីក្រគួរតែត្រូវបានធានាស្របច្បាប់ និងផ្តល់មូលនិធិដោយផ្ទាល់ពីរដ្ឋ។

ទាក់ទងនឹងទីផ្សារការងារ សហព័ន្ធសហជីព CITUB បានព្រមានប្រឆាំងនឹងការនាំចូលសេរីនៃកម្មករបរទេសដោយគ្មានកិច្ចសន្យាការងារអចិន្ត្រៃយ៍ ដោយខ្លាចថាវាអាចនាំឱ្យមានការជះឥទ្ធិពលដល់ប្រាក់ឈ្នួល។លោក ឌីមីត្រូវ បានតស៊ូមតិសម្រាប់គោលនយោបាយដែលការពារកម្លាំងពលកម្មក្នុងស្រុក ខណៈដែលផ្តល់អាទិភាពដល់សហគមន៍ជនជាតិប៊ុលហ្គារីនៅអ៊ុយក្រែន និងម៉ុលដាវី ដើម្បីបំពេញចន្លោះប្រហោងផ្នែកកម្លាំងពលកម្ម។លោកបានសង្កត់ធ្ងន់ថា កំណែទម្រង់អន្តោប្រវេសន៍ណាមួយត្រូវតែធានាថាកម្មករបរទេសមានសិទ្ធិស្ថិរភាពក្នុងការរក្សាបរិយាកាសសេដ្ឋកិច្ចដែលយុត្តិធម៌ និងមានតុល្យភាព៕

ដោយ៖ យា ចិន្ដាខន្ដី (ប្រភព៖ BTA)