AKP ភ្នំពេញ ថ្ងៃទី១៧ ខែកុម្ភៈ ឆ្នាំ២០២៦ -- អ្នកការទូតកំពូលរបស់អ៊ីរ៉ង់ បានជួបជាមួយប្រធានទីភ្នាក់ងារឃ្លាំមើលនុយក្លេអ៊ែររបស់អង្គការសហប្រជាជាតិកាលពីថ្ងៃចន្ទ នៅមុនពេលកិច្ចចរចាជុំទីពីរជាមួយសហរដ្ឋអាមេរិក ស្តីពីកម្មវិធីនុយក្លេអ៊ែររបស់ទីក្រុងតេអេរ៉ង់។

រដ្ឋមន្ត្រីការបរទេសអ៊ីរ៉ង់ លោក អាបាស អារ៉ាកឈី (Abbas Araghchi) បានជួបជាមួយលោក រ៉ាហ្វាអ៊ែល ហ្រ្កូសស៊ី (Rafael Grossi)អគ្គនាយកទីភ្នាក់ងារថាមពលអាតូមិកអន្តរជាតិ ហើយបាននិយាយថា លោកក៏នឹងជួបជាមួយរដ្ឋមន្ត្រីការបរទេសនៃប្រទេសអូម៉ង់ លោក បាដ អាល់-ប៊ូសៃឌី (Badr al-Busaidi) ដែលកំពុងធ្វើជាម្ចាស់ផ្ទះនៃកិច្ចចរចារវាងសហរដ្ឋអាមេរិក និងអ៊ីរ៉ង់នៅទីក្រុងហ្សឺណែវនៅថ្ងៃអង្គារនេះ។

លោក អារ៉ាកឈី បានសរសេរនៅលើបណ្តាញសង្គមអ៊ិចថា «ខ្ញុំនៅទីក្រុងហ្សឺណែវជាមួយនឹងគំនិតពិតប្រាកដ ដើម្បីសម្រេចបាននូវកិច្ចព្រមព្រៀងដ៏យុត្តិធម៌ និងសមធម៌»។

នៅពេលដែលប្រធានាធិបតីសហរដ្ឋអាមេរិក លោក ដូណាល់ ត្រាំ(Donald Trump) បានបញ្ជាឱ្យបញ្ជូននាវាផ្ទុកយន្តហោះបន្ថែមមួយគ្រឿងទៀតទៅកាន់តំបន់នោះ ហើយកាលពីថ្ងៃចន្ទ អ៊ីរ៉ង់បានធ្វើសមយុទ្ធកងទ័ពជើងទឹកមួយផ្សេងទៀត។ នេះបើយោងតាមការចុះផ្សាយរបស់ទូរទស្សន៍រដ្ឋ។ ខ្លួនបាននិយាយថា សមយុទ្ធនេះនឹងសាកល្បងសមត្ថភាពស៊ើបការណ៍សម្ងាត់ និងប្រតិបត្តិការរបស់អ៊ីរ៉ង់នៅក្នុងច្រកសមុទ្រហ័រមូសឈូងសមុទ្រពែរ្ស និងឈូងសមុទ្រអូម៉ង់។

នៅមុនពេលកិច្ចចរចា អ៊ីរ៉ង់បានប្រកាសថា កងកម្លាំងឆ្មាំបដិវត្តន៍ប៉ារ៉ាយោធារបស់ខ្លួន បានចាប់ផ្តើមសមយុទ្ធនៅព្រឹកព្រលឹមថ្ងៃចន្ទ នៅក្នុងផ្លូវទឹកដែលជាផ្លូវពាណិជ្ជកម្មអន្តរជាតិដ៏សំខាន់ ដែលប្រេង ២០% របស់ពិភពលោកឆ្លងកាត់៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)