AKP ភ្នំពេញ ថ្ងៃទី១៧ ខែកុម្ភៈ ឆ្នាំ២០២៦ -- ឧត្តមសេនីយ៍ឯក លោក អាប់ដុលរ៉ាហ៊ីម មូសាវី (Abdolrahim Mousavi) មេបញ្ជាការយោធាកំពូលរបស់អ៊ីរ៉ង់ បានចេញការព្រមានយ៉ាងមុតមាំមួយទៅកាន់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កាលពីថ្ងៃអាទិត្យដោយបញ្ជាក់ថា សង្គ្រាមណាមួយដែលអាចកើតមាន នឹងក្លាយជាសមរភូមិផ្តល់មេរៀនសម្រាប់សហរដ្ឋអាមេរិក។ ការកត់សម្គាល់នេះធ្វើឡើងបន្ទាប់ពីមានមតិយោបល់ថ្មីៗនេះរបស់លោក ត្រាំ ដែលបង្ហាញថា ការផ្លាស់ប្តូររបបនៅអ៊ីរ៉ង់នឹងក្លាយជាលទ្ធផលវិជ្ជមាន។ ភាពតានតឹងបានកើនឡើងបន្ថែមទៀត ជាមួយនឹងការប្រកាសដាក់ពង្រាយនាវាចម្បាំង USS Gerald R. Ford ទៅកាន់មជ្ឈិមបូព៌ា ដោយចូលរួមជាមួយនាវាចម្បាំង USS Abraham Lincoln ដែលឈរជើងរួចហើយនៅក្នុងឈូងសមុទ្រពែរ្ស។

ថ្នាក់ដឹកនាំអ៊ីរ៉ង់ បានពិពណ៌នាអំពីការគំរាមកំហែងផ្នែកយោធារបស់លោក ត្រាំ ថា ផ្ទុយពីការលើកឡើងរបស់លោកអំពីកិច្ចចរចាដែលអាចកើតមាន។ លោក មូសាវី បានអះអាងថា ប្រសិនបើសហរដ្ឋអាមេរិកមានបំណងធ្វើសង្គ្រាម សហរដ្ឋអាមេរិកមិនគួរនិយាយអំពីការទូតក្នុងពេលដំណាលគ្នានោះទេ ដោយភាពតានតឹងនេះមានការចូលរួមសម្របសម្រួលជាអន្តរជាតិពីបណ្តាប្រទេសមួយចំនួន រួមទាំងប្រទេសតួកគីផងនោះ បានធ្វើអន្តរាគមន៍កាលពីពេលថ្មីៗនេះ ដើម្បីជួយស្តារបណ្តាញការទូតឡើងវិញនិងបន្ថយហានិភ័យនៃការប្រឈមមុខដាក់គ្នាខាងយោធាដោយផ្ទាល់នៅក្នុងតំបន់។

ទោះបីជាមានវោហាសាស្ត្រអរិភាពក៏ដោយ កិច្ចចរចានុយក្លេអ៊ែរជុំថ្មីមួយត្រូវបានគ្រោងធ្វើនៅថ្ងៃអង្គារនេះ នៅទីក្រុងហ្សឺណែវ។ លោក ម៉ាជីដ តាក-រ៉ាវ៉ាន់ជី (Majid Takht-Ravanchi) អនុរដ្ឋមន្ត្រីការបរទេសអ៊ីរ៉ង់ បានបញ្ជាក់ពីកិច្ចប្រជុំនេះ ដោយបានសង្កត់ធ្ងន់ថា «កិច្ចការរបស់សហរដ្ឋអាមេរិកគឺស្ថិតនៅក្នុងដៃរបស់អាម៉េរិក» ដើម្បីបង្ហាញពីភាពស្មោះត្រង់។កិច្ចពិភាក្សាទាំងនេះតំណាងឱ្យការជំរុញការទូតដ៏សំខាន់លើកដំបូងចាប់តាំងពីជម្លោះអ៊ីរ៉ង់-អ៊ីស្រាអែលពីមុនបានជាប់គាំងក្នុងកិច្ចចរចា ដោយអ៊ីរ៉ង់បានអះអាងថា កិច្ចព្រមព្រៀងមួយអាចធ្វើទៅបាន ប្រសិនបើទីក្រុងវ៉ាស៊ីនតោនបង្ហាញការប្តេជ្ញាចិត្តពិតប្រាកដ៕

ដោយ៖ យា ចិន្ដាខន្ដី (ប្រភព៖ AA-AKP)