AKP ភ្នំពេញ ថ្ងៃទី១៧ ខែកុម្ភៈ ឆ្នាំ២០២៦ -- ក្រសួងការបរទេសប៉ាឡេស្ទីនបានស្វាគមន៍ការសម្រេចចិត្តរបស់កិច្ចប្រជុំកំពូលសហភាពអាហ្វ្រិក (AU) លើកទី៣៩ ដើម្បីគាំទ្រសមាជិកភាពពេញលេញរបស់អង្គការសហប្រជាជាតិសម្រាប់ប៉ាឡេស្ទីន និងបដិសេធផែនការសម្រាប់ការផ្លាស់ទីលំនៅដោយបង្ខំរបស់ប្រជាជនប៉ាឡេស្ទីន។

នៅក្នុងសេចក្តីថ្លែងការណ៍មួយ ក្រសួងបានពិពណ៌នាអំពីគោលជំហរច្បាស់លាស់ និងរឹងមាំ ដែលបានបង្ហាញនៅក្នុងកិច្ចប្រជុំកំពូលថាជាការលើកទឹកចិត្ត ដែលឆ្លុះបញ្ចាំងពីការគាំទ្ររបស់ទ្វីបអាហ្វ្រិកចំពោះសិទ្ធិដែលមិនអាចកាត់ផ្តាច់បានរបស់ប្រជាជនប៉ាឡេស្ទីន។

ប៉ាឡេស្ទីនក៏បានសម្តែងការកោតសរសើរចំពោះការអំពាវនាវរបស់កិច្ចប្រជុំកំពូល ដើម្បីបញ្ចប់ការកាន់កាប់របស់អ៊ីស្រាអែល និងពន្លឿនការទទួលស្គាល់សមាជិកភាពពេញលេញរបស់អង្គការសហប្រជាជាតិស​ម្រាប់រដ្ឋប៉ាឡេស្ទីនផងដែរ ដោយបានសង្កត់ធ្ងន់ថា ការទាមទារនេះ គឺជាសិទ្ធិនយោបាយ និងជាសិទ្ធិស្របច្បាប់។

AU បានបញ្ចប់សម័យប្រជុំលើកទី៣៩ របស់ខ្លួននៅក្នុងរដ្ឋធានីអាឌីសអាបាបារបស់ប្រទេសអេត្យូពីកាលពីថ្ងៃអាទិត្យ ជាមួយនឹងសេចក្តីថ្លែងការណ៍ចុងក្រោយដ៏ទូលំទូលាយមួយដែលអំពាវនាវឱ្យផ្តល់សមាជិកភាពពេញលេញដល់រដ្ឋប៉ាឡេស្ទីននៅក្នុងអង្គការសហប្រជាជាតិដោយបញ្ជាក់ថា ជំហាននេះតំណាងឱ្យសិទ្ធិស្របច្បាប់របស់ប្រជាជនប៉ាឡេស្ទីនក្នុងការសម្រេចចិត្តដោយខ្លួនឯង។

សេចក្តីថ្លែងការណ៍នៃកិច្ចប្រជុំកំពូលនោះ ក៏បានថ្កោលទោសយ៉ាងខ្លាំងចំពោះការប៉ុនប៉ងណាមួយដើម្បីផ្លាស់ទីលំនៅប្រជាជនប៉ាឡេស្ទីនដោយបង្ខំផងដែរ ដោយពណ៌នាអំពីសកម្មភាពបែបនេះថា ជាការរំលោភបំពានយ៉ាងធ្ងន់ធ្ងរលើច្បាប់អន្តរជាតិ។

ប៉ាឡេស្ទីន​ទទួល​បាន​ឋានៈ​ជារដ្ឋ​សង្កេតការណ៍​មិនមែន​ជា​សមាជិកនៅ​អង្គការ​សហប្រជាជាតិ ដែល​ត្រូវ​បាន​ផ្តល់​ដោយ​មហាសន្និបាត​អង្គការ​សហប្រជាជាតិ​នៅ​ថ្ងៃ​ទី២៩ ខែ​វិច្ឆិកា ឆ្នាំ២០១២។

នៅក្នុង​ខែ​ឧសភា ឆ្នាំ២០២៤ មហាសន្និបាត​បាន​អនុម័ត​សេចក្តី​សម្រេច​មួយ ​ដែល​គាំទ្រ​ការ​ដាក់​ពាក្យស្នើ​សុំ​ចូល​ជា​សមាជិក​ពេញ​លេញ​របស់​ប៉ាឡេស្ទីន​នៅ​ក្នុងអង្គការ​សហប្រជាជាតិ៕

ដោយ៖ យា ចិន្ដាខន្ដី (ប្រភព៖ AA-AKP)