AKP ភ្នំពេញ ថ្ងៃទី១៦ ខែកុម្ភៈ ឆ្នាំ២០២៦ -- ទីក្រុងម៉ូស្គូ និងទីក្រុងអាស្តាណា កំពុងពិភាក្សាគ្នាអំពីកាលបរិច្ឆេទសម្រាប់ដំណើរទស្សនកិច្ចរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ទៅកាន់ប្រទេសកាហ្សាក់ស្ថាននៅក្នុងឆ្នាំ២០២៦ នេះ តាមការអញ្ជើញរបស់មេដឹកនាំកាហ្សាក់ស្ថាន លោក កាស់ស៊ីម-ចូម៉ាត តូកាយ៉េវ (Kassym-Jomart Tokayev) ក៏ដូចជារបៀបវារៈសម្រាប់កិច្ចពិភាក្សា។ នេះបើយោងតាមឯកអគ្គរដ្ឋទូតរុស្ស៊ីប្រចាំទីក្រុងអាស្តាណា លោក អាឡិចសី បូរ៉ូដាវគីន (Alexey Borodavkin) បានប្រាប់ទីភ្នាក់ងារសារព័ត៌មានតាសស៍ (TASS)។

លោកបាននិយាយថា «ចំពោះដំណើរទស្សនកិច្ចរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន ទៅកាន់ប្រទេសកាហ្សាក់ស្ថាន ដែលការផ្លាស់ប្តូរដំណើរទស្សនកិច្ចប្រចាំឆ្នាំបែបនេះបានក្លាយជាការអនុវត្តដែលបានបង្កើតឡើងរួចហើយ។ បច្ចុប្បន្ននេះ កាលបរិច្ឆេទកំពុងត្រូវបានសម្របសម្រួល ហើយការងារកំពុងដំណើរការលើរបៀបវារៈសំខាន់ៗនៃកិច្ចពិភាក្សា» ដោយលោកបានបន្ថែមថា «ដំណើរទស្សនកិច្ចរបស់លោកប្រធានាធិបតីរុស្ស៊ីទៅកាន់ប្រទេសកាហ្សាក់ស្ថាន នឹងក្លាយជាទំព័រដ៏រស់រវើកបំផុតមួយនៅក្នុងប្រវត្តិសាស្ត្រនៃទំនាក់ទំនងអន្តររដ្ឋរវាងរុស្ស៊ី-កាហ្សាក់ស្ថាន ហើយនឹងផ្តល់នូវកម្លាំងចលករបន្ថែមដល់ការអភិវឌ្ឍថាមវន្តនៃកិច្ចសហប្រតិបត្តិការប្រកបដោយផ្លែផ្កា»។

នៅពេលមុននេះ ប្រធានាធិបតីកាហ្សាក់ស្ថាន លោក កាស់ស៊ីម-ចូម៉ាត តូកាយ៉េវ បានធ្វើទស្សនកិច្ចផ្លូវរដ្ឋទៅកាន់ប្រទេសរុស្ស៊ីនៅថ្ងៃទី១១-១២ ខែវិច្ឆិកា ឆ្នាំ២០២៥។ ក្នុងអំឡុងពេលនៃដំណើរទស្សនកិច្ចនោះ លោកបានជួបពិភាក្សាជាមួយលោកប្រធានាធិបតី វ្ល៉ាឌីមៀរ ពូទីន ហើយសេចក្តីប្រកាសមួយត្រូវបានចុះហត្ថលេខា ស្តីពីការលើកកម្ពស់ទំនាក់ទំនងអន្តររដ្ឋទ្វេភាគីដល់កម្រិតនៃភាពជាដៃគូយុទ្ធសាស្ត្រ និងសម្ព័ន្ធភាពគ្រប់ជ្រុងជ្រោយ៕

ដោយ៖ យា ចិន្ដាខន្ដី (ប្រភព៖ តាសស៍)