AKP ភ្នំពេញ ថ្ងៃទី០៥ ខែកុម្ភៈ ឆ្នាំ២០២៦ -- អ្នកនាំពាក្យអគ្គលេខាធិការអង្គការសហប្រជាជាតិ បាននិយាយកាលពីថ្ងៃពុធថា លោក អានតូញ៉ូ ហ្គូធឺរែស (Antonio Guterres) មានការព្រួយបារម្ភអំពីផលប៉ះពាល់នៃការដាក់ទណ្ឌកម្មប្រេងថ្មីរបស់សហរដ្ឋអាមេរិកប្រឆាំងនឹងប្រទេសគុយបា។

អ្នកនាំពាក្យ លោក ស្តេហ្វេន ឌូចាររីក (Stephane Dujarric) បាននិយាយថា «អគ្គលេខាធិការមានការព្រួយបារម្ភយ៉ាងខ្លាំងអំពីស្ថានភាពមនុស្សធម៌នៅក្នុងប្រទេសគុយបា ដែលនឹងកាន់តែអាក្រក់ទៅៗប្រសិនបើតម្រូវការប្រេងរបស់ខ្លួនមិនត្រូវបានបំពេញ»។

អ្នកនាំពាក្យរូបនេះបានប្រាប់សន្និសីទសារព័ត៌មានប្រចាំថ្ងៃថា លោកហ្គូធឺរែស បានកត់សម្គាល់ថា អស់រយៈពេលជាងបីទសវត្សរ៍មកហើយមហាសន្និបាតអង្គការសហប្រជាជាតិបានអំពាវនាវឱ្យបញ្ចប់ការហាមឃាត់ដែលដាក់ដោយសហរដ្ឋអាមេរិកលើប្រទេសគុយបា ហើយជំរុញឱ្យគ្រប់ភាគីទាំងអស់បន្តការសន្ទនា និងគោរពច្បាប់អន្តរជាតិ។

លោក ឌូចាររីក បានបន្ថែមថា អង្គការសហប្រជាជាតិកំពុងធ្វើការជាមួយរដ្ឋាភិបាលគុយបា ដើម្បីមើលពីស្ថានភាពដែលអាចត្រូវបានបន្ធូរបន្ថយ។

ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កាលពីថ្ងៃព្រហស្បតិ៍បានចុះហត្ថលេខាលើបទបញ្ជាប្រតិបត្តិមួយដែលគំរាមកំហែងដាក់ពន្ធលើប្រទេសដែលលក់ ឬផ្គត់ផ្គង់ប្រេងដល់ប្រទេសគុយបា៕

ដោយ៖ មូល មិនា (ប្រភព៖ ភីបផលដេលី)