AKP ភ្នំពេញ ថ្ងៃទី២៦ ខែវិច្ឆិកា ឆ្នាំ២០២៥ -- ប្រធានាធិបតីចិន លោក ស៊ី ជីនពីង (Xi Jinping) បានគូសបញ្ជាក់អំពីតម្រូវការសម្រាប់ទីក្រុងប៉េកាំង និងទីក្រុងវ៉ាស៊ីនតោន ដើម្បីរក្សាសន្ទុះនៃការអភិវឌ្ឍដ៏រឹងមាំនៃទំនាក់ទំនងទ្វេភាគី ដើម្បីខិតខំឆ្ពោះទៅរកវឌ្ឍនភាពវិជ្ជមានបន្ថែមទៀត ដោយលោកបានសង្កត់ធ្ងន់ថា វាជារឿងដ៏សំខាន់សម្រាប់ប្រទេសចិន និងសហរដ្ឋអាមេរិក ក្នុងការរួមគ្នាការពារលទ្ធផលនៃជ័យជម្នះក្នុងសង្គ្រាមលោកលើកទីពីរ។

លោក ស៊ី បានធ្វើការកត់សម្គាល់នេះក្នុងអំឡុងពេលនៃកិច្ចសន្ទនាតាមទូរស័ព្ទជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កាលពីល្ងាចថ្ងៃចន្ទ។

លោក ស៊ី បាននិយាយអំពីកិច្ចប្រជុំរបស់លោកជាមួយលោក ត្រាំ នៅទីក្រុងប៊ូសាន សាធារណរដ្ឋកូរ៉េកាលពីខែមុន ក៏ដូចជាការឯកភាពគ្នាដែលពួកគេសម្រេចបានក្នុងអំឡុងពេលនៃកិច្ចប្រជុំនោះ ដោយលោកបាននិយាយថា ពួកគេបានកែសម្រួលឡើងវិញនូវដំណើរការនៃទំនាក់ទំនងដ៏ធំរវាងចិន និងសហរដ្ឋអាមេរិក និងបានផ្តល់សន្ទុះបន្ថែមទៀតសម្រាប់វាឱ្យបន្តទៅមុខដោយស្ថិរភាព ដោយបង្ហាញសញ្ញាវិជ្ជមានដល់ពិភពលោក។

លោកបាននិយាយថា ចាប់តាំងពីកិច្ចប្រជុំនៅទីក្រុងប៊ូសានមក ទំនាក់ទំនងចិន-សហរដ្ឋអាមេរិក ជាទូទៅបានរក្សាគន្លងដ៏រឹងមាំ និងវិជ្ជមាន ដែលត្រូវបានស្វាគមន៍ដោយប្រទេសទាំងពីរ ក៏ដូចជាសហគមន៍អន្តរជាតិ។

លោក ស៊ី បាននិយាយថា អ្វីដែលបានកើតឡើងបានបង្ហាញម្តងទៀតថា ការពិពណ៌នាអំពីកិច្ចសហប្រតិបត្តិការចិន-សហរដ្ឋអាមេរិក ដែលផ្តល់ផលប្រយោជន៍ដល់ភាគីទាំងពីរ និងការប្រឈមមុខដាក់គ្នា ដែលធ្វើឱ្យភាគីទាំងពីរឈឺចាប់ ឆ្លុះបញ្ចាំងពីសុភវិនិច្ឆ័យទូទៅ ដែលត្រូវបានបង្ហាញម្តងហើយម្តងទៀតដោយបទពិសោធន៍ ហើយចក្ខុវិស័យរបស់ចិន និងសហរដ្ឋអាមេរិក ដែលជួយគ្នាទៅវិញទៅមកឱ្យទទួលបានជោគជ័យ និងរីកចម្រើនជាមួយគ្នា គឺជាទស្សនវិស័យជាក់ស្តែងមួយ ដែលស្ថិតនៅក្នុងដៃរបស់លោក។

លោកបានអំពាវនាវឱ្យប្រទេសទាំងពីររក្សាសន្ទុះនេះប្រកាន់ខ្ជាប់នូវទិសដៅត្រឹមត្រូវ និងប្រកាន់ខ្ជាប់នូវអាកប្បកិរិយាសមភាព ការគោរព និងផលប្រយោជន៍ទៅវិញទៅមក។

លោកបានបន្ថែមថា ភាគីទាំងពីរគួរតែពង្រីកនូវបញ្ជីនៃកិច្ចសហប្រតិបត្តិការ និងការកាត់បន្ថយបញ្ជីបញ្ហា ដោយខិតខំដើម្បីវឌ្ឍនភាពវិជ្ជមានបន្ថែមទៀត និងបង្កើតកន្លែងថ្មីសម្រាប់កិច្ចសហប្រតិបត្តិការសម្រាប់ទំនាក់ទំនងចិន-សហរដ្ឋអាមេរិក ដើម្បីផ្តល់ផលប្រយោជន៍ដល់ប្រជាជននៃប្រទេសទាំងពីរ និងពិភពលោក។

លោក​បាននិយាយ​ថា ប្រទេសចិន និង​សហរដ្ឋអាមេរិក​ធ្លាប់​បាន​ឈរ​រួមគ្នា​ប្រឆាំង​នឹង​លទ្ធិ​ហ្វាស៊ីសនិយម និង​យោធានិយម ហើយ​ដោយសារ​អ្វី​ដែល​កំពុង​កើតឡើង វា​កាន់តែ​សំខាន់​សម្រាប់​ពួកគេ​ក្នុង​ការ​រួមគ្នា​ការពារ​លទ្ធផល​នៃ​ជ័យជម្នះ​ក្នុង​សង្គ្រាមលោក​លើកទីពីរ។

លោក ដូណាល់ ត្រាំ បាន​និយាយ​ថា លោកប្រធានាធិបតី ស៊ី គឺជា​មេដឹកនាំមួយរូប​ដ៏​អស្ចារ្យ។ លោក​បាន​កត់សម្គាល់​ថា លោក​រីករាយ​នឹង​កិច្ចប្រជុំ​ជាមួយ​លោក ស៊ី នៅ​ទីក្រុងប៊ូសាន ហើយ​លោក​យល់ស្រប​ទាំងស្រុង​ជាមួយ​លោក ស៊ី ចំពោះ​ការអត្ថាធិប្បាយ​របស់​លោក​អំពី​ទំនាក់ទំនង​ទ្វេភាគី។

លោក​បាន​និយាយ​ថា ភាគី​ទាំងពីរ​កំពុង​អនុវត្ត​យ៉ាង​ទូលំទូលាយ​នូវ​ការឯកភាពគ្នានៃ​ចំណុចសំខាន់ៗ​ដែល​ពួកគេ​​សម្រេច​បាន​នៅ​ក្នុងកិច្ចប្រជុំទីក្រុងប៊ូសាន។

លោក ត្រាំ បាន​និយាយ​ថា សហរដ្ឋអាមេរិក​ទទួលស្គាល់អំពី​តួនាទីដ៏​សំខាន់​របស់ប្រទេស​ចិននៅ​ក្នុង​ជ័យជម្នះ​ក្នុង​សង្គ្រាមលោក​លើកទីពីរ និង​យល់អំ​ពី​សារៈសំខាន់​នៃ​បញ្ហា​កោះតៃវ៉ាន់​ចំពោះ​ប្រទេស​ចិន៕

ដោយ៖ យា ចិន្តាខន្តី (ប្រភព៖ ឆាយណាដេលី)