AKP ឧត្តរមានជ័យ ថ្ងៃទី០៧ ខែមករា ឆ្នាំ២០២៥-- ឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ និងឯកឧត្តម អនុផុង ស៊ុកសំនិត (Anupong Suksomnit) អភិបាលខេត្តស៊ីសាកេត ថៃ បានអញ្ជើញជាអធិបតីភាពក្នុងពិធីសម្ពោធការបន្ថែមម៉ោងបើក និងបិទច្រកទ្វារព្រំដែនអន្ដរជាតិជាំ-សាងាំ និងពិធីសូត្រមន្តរាប់បាត្រព្រះសង្ឃរួមគ្នាឆ្លងឆ្នាំចាស់២០២៤ ផ្លាស់ចូលឆ្នាំថ្មី២០២៥ កាលពីថ្ងៃទី០៦ ខែមករា ឆ្នាំ២០២៥ ស្ថិតក្នុងឃុំត្រពាំងប្រិយ ស្រុកអន្លង់វែង ខេត្តឧត្តរមានជ័យ ដោយកំណត់ចាប់ពីម៉ោង៧ព្រឹក ដល់ម៉ោង១០យប់ជារៀងរាល់ថ្ងៃ ចាប់ពីថ្ងៃទី០៦ ខែមករា ឆ្នាំ២០២៥នេះតទៅ។

ឯកឧត្តម មាន ចាន់យ៉ាដា និងឯកឧត្តម អនុផុង ស៊ុកសំនិត បានមានប្រសាសន៍ថា ដើម្បីសម្រួលដល់ការធ្វើដំណើររបស់ប្រជាពលរដ្ឋនៃប្រទេសទាំង២ ក៏ដូចការដឹកជញ្ជូនទំនិញ ការចេញចូលពិនិត្យសុខភាពនោះ ច្រកអន្តរជាតិជាំ-សាងាំ នឹងត្រូវបន្ថែមម៉ោងចេញចូលឆ្លងកាត់រហូតដល់ម៉ោង១០យប់ជារៀងរាល់ថ្ងៃចាប់ពីថ្ងៃនេះតទៅ។ ការជំរុញការអនុវត្តតាមសេចក្តីប្រកាសរបស់ក្រសួងមហាផ្ទៃ ស្តីពីការបន្ថែមម៉ោងបិទបើកច្រកទ្វារព្រំដែនអន្តរជាតិជាំ-សាងាំ រវាងខេត្តឧត្តរមានជ័យ និងខេត្តស៊ីសាកេត ប្រទេសថៃ ក្នុងគោលបំណងសម្រួលដល់ការធ្វើដំណើរឆ្លងកាត់រវាងប្រជាពលរដ្ឋនៃប្រទេសទាំង២ ធ្វើឱ្យមានពេលវេលាកាន់តែវែង ការដឹកជញ្ជូនទំនិញ ឆ្លងកាត់ក៏មានច្រើនក៏ដូចជាការពិនិត្យសុខភាពជាដើម។

ឯកឧត្តមបានបញ្ជាក់ទៀតថា ច្រកទ្វារព្រំដែនអន្តរជាតិជាំ-សាងាំ គឺបើកឱ្យធ្វើដំណើរការឱ្យប្រជាពលរដ្ឋចេញចូលឆ្លងកាត់ជារៀងរាល់ថ្ងៃ គឺបិទមិនឱ្យប្រជាពលរដ្ឋនៃប្រទេសទាំង២ ឆ្លងកាត់ត្រឹមម៉ោង៨យប់ ប៉ុន្តែចាប់ពីថ្ងៃនេះតទៅ គឺបិទមិនឱ្យឆ្លងកាត់រហូតដល់ម៉ោង១០យប់វិញ ដូច្នេះការចេញចូលឆ្លងកាត់មានពេលវេលាបានច្រើនជាងពេលមុន៕

ដោយ ទិត ស្រ៊