AKP ភ្នំពេញ ថ្ងៃទី១៥ ខែតុលា ឆ្នាំ២០២៦--សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តែងតែយកចិត្តទុកដាក់ជាប្រចាំ និងមិនដែលភ្លេចគិតពីសុខទុក្ខ ព្រមទាំងជីវភាពរស់នៅរបស់គ្រួសារយោធិនពលី ដែលបានពលីជីវិតយ៉ាងអង់អាចក្លាហានក្នុងបេសកកម្មការពារបូរណភាពទឹកដី និងសុខសន្តិភាពរបស់មាតុភូមិឡើយ។

ឆ្លើយតបទៅនឹងស្មារតីដឹងគុណដ៏ជ្រាលជ្រៅនេះ ក្នុងឱកាសពិធីកាន់បិណ្ឌ និងបុណ្យភ្ជុំបិណ្ឌ កាលពីថ្ងៃទី១៣-១៤ ខែតុលា ឆ្នាំ២០២៦ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចាត់ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា អញ្ជើញចុះសួរសុខទុក្ខ នាំយកអំណោយមនុស្សធម៌ និងថវិកាទៅប្រគល់ជូនគ្រួសារយោធិនពលីចំនួន៦ គ្រួសារ ដែលក្នុងនោះមាន ៣គ្រួសារ ដែលបានពលីក្រោយពេលលើកទង់ជាតិប្រទេសកម្ពុជាលើភ្នំទ្រព្យ កាលពីថ្ងៃទី២៨ ខែកក្កដា ឆ្នាំ២០២៥ និង ៣គ្រួសារទៀត ពលីក្នុងសមរភូមិ ដែលក្រុមគ្រួសាររស់នៅតាមគេហដ្ឋាន និងបន្ទាយ ស្ថិតក្នុងខេត្តកំពត ខេត្តព្រៃវែង និងខណ្ឌកំបូល រាជធានីភ្នំពេញ។

សកម្មភាពនេះសបញ្ជាក់ឱ្យឃើញពីមនោសញ្ចេតនា ទឹកចិត្តមេត្តាករុណា និងការដឹងគុណយ៉ាងជ្រាលជ្រៅបំផុតរបស់ សម្តេចកិត្តិព្រឹទ្ធបណ្ឌិត ក្នុងការបន្តគាំទ្រ និងលើកទឹកចិត្តដល់ក្រុមគ្រួសារនៃវីរជនការពារជាតិ ដើម្បីធានាបាននូវការឧបត្ថម្ភគាំទ្រ និងភាពកក់ក្តៅក្នុងជីវភាពរស់នៅប្រចាំថ្ងៃ៕

ដោយ៖ ពេជ្រ សំអឿន(ប្រភព៖កាកបាទក្រហមកម្ពុជា)