AKP សៀមរាប ថ្ងៃទី១៥ ខែតុលា ឆ្នាំ២០២៦--ឯកឧត្តម ប្រាក់ សោភ័ណ អភិបាលខេត្តសៀមរាប និងឯកឧត្តម តោ គឹមស៊ាន សមាជិកក្រុមប្រឹក្សាខេត្ត នៅព្រឹកថ្ងៃទី១៥ ខែតុលា ឆ្នាំ២០២៦ បានដឹកនាំថ្នាក់ដឹកនាំខេត្ត សមាជិកក្រុមប្រឹក្សាខេត្ត អភិបាល រងខេត្ត ថ្នាក់ដឹកនាំមន្ទីរ-អង្គភាព មន្ត្រីរាជការ និងកងកម្លាំងប្រដាប់អាវុធ អញ្ជើញថ្វាយកម្រងផ្កាគោរពព្រះវិញ្ញាណក្ខន្ធ ព្រះករុណា ព្រះបាទសម្តេចព្រះនរោត្តមសីហនុ «ព្រះបរមរតនកោដ្ឋ» នៅសួនព្រះរាជដំណាក់ ក្រុងសៀមរាប ក្នុងឱកាសគម្រប់ខួប ១៤ឆ្នាំ នៃការយាងសោយព្រះទិវង្គតរបស់ព្រះអង្គ។

ថ្ងៃទី១៥ ខែតុលា ឆ្នាំ២០២៦នេះ គឺជាថ្ងៃគម្រប់ខួប ១៤ឆ្នាំ នៃការយាងសោយព្រះទិវង្គតរបស់ព្រះករុណា ព្រះបាទសម្តេចព្រះ នរោត្តមសីហនុ «ព្រះបរមរតនកោដ្ឋ» ដែលព្រះអង្គបានយាងសោយព្រះទិវង្គតនៅទីក្រុងប៉េកាំង សាធារណរដ្ឋប្រជាមានិតចិន កាលពីថ្ងៃទី១៥ ខែតុលា ឆ្នាំ២០១២។ ការប្រារព្ធពិធីថ្វាយកម្រងផ្កានាពេលនេះ គឺជាការបង្ហាញនូវមនោសញ្ចេតនានឹករលឹក និងការគោរពដឹងគុណចំពោះព្រះមហាករុណាទិគុណរបស់ព្រះអង្គ ដែលបានបន្សល់ទុកនូវព្រះរាជគំរូដ៏ថ្លៃថ្លាសម្រាប់ប្រជារាស្ត្រខ្មែរជំនាន់ក្រោយ។

ក្នុងឱកាសដ៏មានអត្ថន័យនេះ ប្រជារាស្ត្រទូទាំងប្រទេស រួមទាំងថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធគ្រប់ជាន់ថ្នាក់ បានសម្តែងនូវការគោរពដឹងគុណដ៏ជ្រាលជ្រៅចំពោះព្រះបរមរតនកោដ្ឋ ដែលព្រះអង្គបានលះបង់ព្រះកាយពលដើម្បីឯករាជ្យ បូរណភាពទឹកដី និងឯកភាពជាតិខ្មែរ។ ជាមួយគ្នានេះ ក៏បានថ្វាយព្រះរាជកុសលព្រះវិញ្ញាណក្ខន្ធព្រះអង្គ សូមព្រះវិញ្ញាណក្ខន្ធព្រះអង្គបានយាងទៅកាន់ព្រះបរមសុគតិភព កុំបីឃ្លៀងឃ្លាតឡើយ។

ជាមួយនឹងការរំលឹកដល់ព្រះរាជគុណូបការៈរបស់ព្រះអង្គ ប្រជាពលរដ្ឋក្នុងខេត្តសៀមរាបក៏បានបង្ហាញនូវមនោសញ្ចេតនានឹករលឹក និងសោកស្តាយចំពោះការបាត់បង់ព្រះមហាក្សត្រដ៏មានព្រះរាជបារមី និងព្រះរាជសកម្មភាពដ៏សកម្មក្នុងបុព្វហេតុជាតិ។ ទោះបីជាព្រះអង្គបានយាងសោយព្រះទិវង្គតអស់រយៈពេល ១៤ឆ្នាំកន្លងមកហើយក្តី ក៏ព្រះរាជសកម្មភាព ព្រះរាជស្នាព្រះហស្ត និងព្រះរាជគំរូនៃការស្រឡាញ់ជាតិ នៅតែដក់ជាប់ក្នុងដួងចិត្តរបស់ប្រជារាស្ត្រខ្មែរជានិច្ច។

ស្មារតីស្នេហាជាតិ និងព្រះរាជបណ្តាំរបស់ព្រះបរមរតនកោដ្ឋ នៅតែជាមេរៀនដ៏មានតម្លៃសម្រាប់កូនចៅខ្មែរគ្រប់ជំនាន់ ក្នុងការរួបរួមសាមគ្គីគ្នា ថែរក្សាសន្តិភាព ឯកភាពជាតិ និងបូរណភាពទឹកដី ព្រមទាំងចូលរួមអភិវឌ្ឍប្រទេសជាតិឱ្យកាន់តែរីកចម្រើន និងរុងរឿងជានិរន្តរ៍៕

ដោយ ឃុត សៅ