AKP បន្ទាយមានជ័យ ថ្ងៃទី១៤ ខែតុលា ឆ្នាំ២០២៦--ដោយយកចិត្តទុកដាក់លើសុខភាព និងអនាម័យរបស់ប្រជាពលរដ្ឋក្នុងសហគមន៍ ក្នុងរដូវវស្សាដែលមានភ្លៀងធ្លាក់ និងអាចបង្កហានិភ័យដល់សុខភាព ក្រុមអ្នកស្ម័គ្រចិត្តកាកបាទក្រហមភូមិរង់ចាំទី៦ ដឹកនាំដោយលោកស្រី ទ្រី ឈីន បានចុះអប់រំផ្សព្វផ្សាយដោយផ្ទាល់តាមខ្នងផ្ទះ ស្តីពីវិធីការពារខ្លួននៅពេលមានការកើនឡើងកម្ដៅ និងផ្លូវចម្លងរោគ ជូនប្រជាពលរដ្ឋភៀសសឹកសរុបចំនួន ៩៦នាក់ ក្នុងនោះស្ត្រី ៧២នាក់ នៅភូមិរង់ចាំទី៦ ឃុំស្លក្រាម ស្រុកស្វាយចេក ខេត្តបន្ទាយមានជ័យ។

សកម្មភាពអប់រំសុខភាពនេះ ធ្វើឡើងក្នុងគោលបំណងលើកកម្ពស់ការយល់ដឹងរបស់ប្រជាពលរដ្ឋអំពីការថែទាំសុខភាព ការរក្សាអនាម័យ និងការបង្ការជំងឺឆ្លង ព្រមទាំងជំរុញឱ្យសមាជិកសហគមន៍ចេះការពារខ្លួន និងក្រុមគ្រួសារពីហានិភ័យសុខភាពដែលអាចកើតមានដោយសារការប្រែប្រួលអាកាសធាតុ។

លោកស្រី ទ្រី ឈីន ប្រធានក្រុមអ្នកស្ម័គ្រចិត្តការងារកាកបាទក្រហមភូមិរង់ចាំទី៦ បានដឹកនាំក្រុមការងារចុះជួបប្រជាពលរដ្ឋតាមខ្នងផ្ទះ ដើម្បីចែករំលែកចំណេះដឹង និងណែនាំពីវិធានការការពារសុខភាពដែលអាចអនុវត្តន៍បានក្នុងជីវភាពរស់នៅប្រចាំថ្ងៃ។ ការផ្សព្វផ្សាយនេះក៏ជាឱកាសមួយឱ្យប្រជាពលរដ្ឋបានឈ្វេងយល់កាន់តែច្បាស់អំពីហានិភ័យនៃការឆ្លងជំងឺ និងសារៈសំខាន់នៃការបង្ការទុកជាមុន ជាជាងរង់ចាំរហូតដល់មានបញ្ហាសុខភាពកើតឡើង។

តាមរយៈការចុះអប់រំដោយផ្ទាល់នេះ ក្រុមអ្នកស្ម័គ្រចិត្តបានដើរតួនាទីយ៉ាងសំខាន់ជាស្ពានភ្ជាប់រវាងចំណេះដឹងសុខភាព និងប្រជាពលរដ្ឋនៅមូលដ្ឋាន ជាពិសេសការនាំយកព័ត៌មានស្តីពីការការពារខ្លួនពីកត្តាប្រឈមនានា ទៅដល់គ្រួសារដែលត្រូវការការយកចិត្តទុកដាក់ និងការណែនាំជាបន្តបន្ទាប់។

លោកស្រី ទ្រី ឈីន បានបញ្ជាក់ថា ក្នុងរដូវវស្សា ការយកចិត្តទុកដាក់លើអនាម័យបរិស្ថាន និងសុខភាពផ្ទាល់ខ្លួនមានសារៈសំខាន់ជាពិសេស ដោយប្រជាពលរដ្ឋគួររក្សាទឹកស្អាតសម្រាប់ប្រើប្រាស់ លាងសម្អាតដៃឱ្យបានត្រឹមត្រូវ រក្សាបរិស្ថានជុំវិញផ្ទះឱ្យស្អាត កាត់បន្ថយប្រភពដែលអាចបង្កហានិភ័យដល់សុខភាព និងស្វែងរកការពិគ្រោះជាមួយមន្ត្រីសុខាភិបាលនៅពេលមានរោគសញ្ញាមិនប្រក្រតី។

សកម្មភាពនេះ ក៏បានបង្ហាញពីសារៈសំខាន់នៃការចូលរួមរបស់ប្រជាពលរដ្ឋក្នុងការកសាងសហគមន៍ដែលមានភាពធន់នឹងការប្រែប្រួលអាកាសធាតុ និងបញ្ហាសុខភាពសាធារណៈ។ ការយល់ដឹង និងការអនុវត្តវិធានការបង្ការពីសមាជិកម្នាក់ៗ អាចជួយកាត់បន្ថយហានិភ័យ និងរួមចំណែកការពារសុខុមាលភាពរបស់គ្រួសារ និងសហគមន៍ទាំងមូល។
គួរបញ្ជាក់ថា ការអប់រំផ្សព្វផ្សាយនេះត្រូវបានអនុវត្តន៍ដោយមានការគាំទ្រថវិកាពីគណៈកម្មាធិការអន្តរជាតិនៃកាកបាទក្រហម និងអឌ្ឍចន្ទក្រហម (ICRC) ដើម្បីរួមចំណែកពង្រឹងសមត្ថភាពសហគមន៍ក្នុងការការពារសុខភាព កាត់បន្ថយហានិភ័យនៃជំងឺឆ្លង និងលើកកម្ពស់ការត្រៀមខ្លួនឆ្លើយតបនឹងបញ្ហាប្រឈមនានាដែលបណ្តាលមកពីការប្រែប្រួលអាកាសធាតុ។ ការការពារជំងឺចាប់ផ្តើមពីខ្លួនយើង និងការចូលរួមរបស់យើងទាំងអស់គ្នា ដើម្បីកសាងសហគមន៍មានសុខភាពល្អ សុវត្ថិភាព និងភាពធន់យូរអង្វែង៕

ដោយ ឈុន សារ៉ាត