AKP ភ្នំពេញ ថ្ងៃទី១៤ ខែតុលា ឆ្នាំ២០២៦-- ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទបានអញ្ជើញដឹកនាំក្រុមការងារ និងអាជ្ញាធរមូលដ្ឋាន ចុះពិនិត្យជាក់ស្ដែងហេដ្ឋារចនាសម្ព័ន្ធផ្លូវជនបទចំនួន៣ខ្សែ ដែលបានរងផលប៉ះពាល់ដោយសារជំនន់ទឹកភ្លៀង ធ្វើឱ្យហូរច្រោះខ្សែផ្លូវ ស្ថិតនៅក្នុងស្រុកសាមគ្គីមានជ័យ ខេត្តកំពង់ឆ្នាំង នាព្រឹកថ្ងៃពុធ ថ្ងៃ១៤ ខែតុលា ឆ្នាំ២០២៦ នេះ ។

ផ្លូវដែលរងផលប៉ះពាល់រួមមាន ៖
ខ្សែទី១៖ ឈ្មោះផ្លូវ ផ្សារត្រាច - វត្តព្រះធាតុ ជាផ្លូវក្រាលកៅស៊ូពីរជាន់ មានប្រវែងសរុប ៣៥គ.ម. ទទឹង ៦ម៉ែត្រ តភ្ជាប់ពីផ្លូវជាតិលេខ៥ ត្រង់ចំណុចផ្សារត្រាច ឃុំស្វាយ ដោយឆ្លងកាត់ ឃុំត្បែងខ្ពស់ ឃុំស្វាយជុក ទៅដល់ភូមិច្រកូវ ឃុំពាម ស្រុកសាមគ្គីមានជ័យ។ ផ្លូវនេះ ត្រូវបានកសាងដោយក្រសួងអភិវឌ្ឍន៍ជនបទ ក្នុងឆ្នាំ២០១៥ ក្រោមក្របខ័ណ្ឌគម្រោងកែលម្អផ្លូវជនបទជំហានទី១ (RRIP-I) ដោយប្រើប្រាស់ហិរញ្ញប្បទានពីធនាគារអភិវឌ្ឍន៍អាស៊ី (ADB)។ នៅលើខ្សែផ្លូវនេះ ត្រូវបានទឹកទឹកហូរច្រោះជើងទេរលូប្រអប់ ០១កន្លែង ។

ខ្សែទី២៖ ឈ្មោះផ្លូវ ជំទាវជ្រែង-ទ្រម៉ូងជ្រុំ ជាផ្លូវកម្រាលល្បាយក្រួសក្រហម មានប្រវែង ៩,២០គ.ម. ទទឹង ៦ម៉ែត្រ តភ្ជាប់ពីភូមិជំទាវជ្រែង ទៅដល់ភូមិទ្រម៉ុងជ្រុំ ឃុំក្រាំងល្វា ស្រុកសាមគ្គីមានជ័យ ។ ផ្លូវនេះ ត្រូវបានកសាងដោយនាយកដ្ឋានអភិវឌ្ឍន៍ហេដ្ឋារចនាសម្ព័ន្ធផ្លូវជនបទ នៃក្រសួងអភិវឌ្ឍន៍ជនបទ ក្នុងឆ្នាំ២០១៨ ដោយប្រើប្រាស់ថវិការបស់រាជរដ្ឋាភិបាល។ នៅលើខ្សែផ្លូវនេះ ត្រូវបានទឹកទឹកហូរច្រោះជើងទេរ និងចិញ្ចើមផ្លូវម្ខាង ប្រវែងប្រហែល ១០០ម៉ែត្រ ប៉ុន្ដែនៅអាចធ្វើចរាចរណ៍លើផ្លូវមួយចំហៀងបានជាធម្មតា។ គួរជម្រាបជូនដែរ ផ្លូវ ០១ខ្សែនេះ ត្រូវបានក្រសួងដាក់ទៅក្នុងគម្រោងស្ថាបនាផ្លូវធន់នឹងការប្រែប្រួលអាកាសធាតុ ក្រោមហិរញ្ញប្បទានដៃគូអភិវឌ្ឍន៍ នាពេលខាងមុខនេះ។

ខ្សែទី៣៖ ឈ្មោះផ្លូវ ស្ពានពោធិ-រ៉ាមានក ជាប្រភេទផ្លូវកម្រាលកៅស៊ូពីរជាន់ (DBST) មានប្រវែង ១២,៥០គ.ម. តភ្ជាប់ពីផ្លូវជាតិលេខ៥ ភូមិស្ពានពោធិ ឃុំសេដ្ឋី ទៅដល់ភូមិមា នកកើត ឃុំត្បែងខ្ពស់ ស្រុកសាមគ្គីមានជ័យ។ ផ្លូវនេះ ត្រូវបានកសាងដោយក្រសួងអភិវឌ្ឍន៍ជនបទ ក្នុងឆ្នាំ២០១៥ ក្រោមក្របខ័ណ្ឌគម្រោងកែលម្អផ្លូវជនបទជំហានទី១ (RRIP-I) ដោយប្រើប្រាស់ហិរញ្ញប្បទានពីធនាគារអភិវឌ្ឍន៍អាស៊ី (ADB)។ នៅលើខ្សែផ្លូវនេះ ត្រូវបានទឹកភ្លៀងជន់លិច និងហូរកាត់ផ្លូវ ប៉ុន្ដែនៅអាចបន្ដធ្វើចរាចរណ៍ទូទៅបានជាធម្មតា។

ឯកឧត្តមរដ្ឋមន្ត្រី បានណែនាំដល់អគ្គនាយកដ្ឋានបច្ចេកទេសរបស់ក្រសួង និងមន្ទីរអភិវឌ្ឍន៍ជនបទខេត្តកំពង់ឆ្នាំង សហការជាមួយអាជ្ញាធរមូលដ្ឋានស្រុក និងឃុំ ធ្វើការជួសជុលបន្ទាន់ត្រង់ចំនុចដែលរងការខូចខាត ដើម្បីឱ្យប្រជាជនប្រើប្រាស់បានដូចដើមវិញ៕

ដោយ ពេជ្រ សំអឿន(ប្រភព៖ក្រសួងអភិវឌ្ឍន៍ជនបទ)