AKP កណ្តាល ថ្ងៃទី១៤ ខែតុលា ឆ្នាំ២០២៦--ទូកមួង «ឥសីស្រឹង្គារ៍» ដែលបានចូលរួមប្រកួតជាលើកដំបូង ប៉ុន្តែដណ្តើមបានចំណាត់ថ្នាក់លេខ១ នៅក្នុងពិធីប្រណាំងទូកកម្សាន្តលក្ខណៈមិត្តភាព ស្ថិតនៅមាត់ទន្លេជាប់ប៉ុស្តិ៍នគរបាលរដ្ឋបាលឃុំព្រែកដំបង ស្រុកមុខកំពូល ខេត្តកណ្តាល ក្រោមការរៀបចំរបស់ព្រះចៅអធិការវត្តមហានិគ្រោធ (វត្តចាស់) នៅដើមសប្តាហ៍នេះ។

លោក ហាន សីហា ស្ថាបនិក និងជាអគ្គនាយកក្រុមហ៊ុន ញូ-ធី-រីច ឯ.ក បានគូសបញ្ជាក់ថា ព្រះតេជគុណ ជា សំអឿន ព្រះចៅអធិការវត្តមហានិគ្រោធ (វត្តចាស់) បានរៀបចំពិធីប្រណាំងទូកចែវទូកមហាសាមគ្គី ដោយប្រមែលប្រមូលទូកមួងនានា ដែលជាអ្នកថែរក្សាអភិរក្សវិស័យទូកមួង ដែលជាប្រពៃណីវប្បធម៌ដូនតាខ្មែរបានចូលរួមប្រណាំងនេះ។ ទូកមួង «ឥសីស្រឹង្គារ៍» ដែលកសាងឡើងក្រោមកិច្ចសហការរវាងក្រុមហ៊ុន ញូ-ធី-រីច ឯ.ក ជាមួយចំណុះជើងវត្ត និងបងប្អូនប្រជាពលរដ្ឋជុំវិញភូមិប្រសូត្រ-ក ភូមិប្រសូត្រ-ខ ភូមិព្រៃកោ បានរួបរួមគ្នាកសាងទូកនេះឡើង។

តាមពិតទៅ ទូកមួង ឥសីស្រឹង្គារ៍ នេះបានខកខានអស់រយៈពេល១៩ឆ្នាំមកហើយៗនៅពេលនេះ ជាពេលវេលាដែលទូក ឥសីស្រឹង្គារ៍បានជួសជុលកែលម្អជាថ្មីពីទូកង មកជាទូកមួង ដែលមានចំណុះកីឡាករចំនួន ៦០នាក់ ដោយចាប់ផ្តើមចេញដំណើរឡើងវិញក្នុងការចូលរួមប្រកួតប្រជែង។

គោលបំណងនៃការចាប់ផ្តើមកែសម្រួលថ្មី និងចូលរួមប្រណាំងឡើងវិញនេះ គឺដើម្បីរួមចំណែកលើកកម្ពស់ ថែរក្សាប្រពៃណី ទំនៀមទម្លាប់វិស័យទូកមួងខ្មែររបស់យើង។ លោក ហាន សីហា បានគូសបញ្ជាក់ទៀតថា ឆ្នាំនេះ រាជរដ្ឋាភិបាលមិនបានរៀបចំព្រះរាជពិធីបុណ្យអុំទូក នៅមុខព្រះបរមរាជវាំងនោះទេ ប៉ុន្តែមានការអនុញ្ញាតឱ្យការប្រណាំងទូកង-ទួកមួង នៅតាមខេត្តក្រុងនានា ហើយសម្រាប់ទូកមួង ឥសីស្រឹង្គារ៍នឹងចូលរួមការប្រណាំងទូក នៅខេត្តកណ្តាល នាពេលខាងមុខ។ លោកអគ្គនាយកបន្ថែមថា ជោគជ័យនេះ គឺជាមោទនភាពដ៏ធំធេង ដែលកើតចេញពីសាមគ្គីភាព ការខិតខំប្រឹងប្រែង និងស្មារតីរួបរួមរបស់ក្រុមកីឡាករទូកចែក និងការគាំទ្ររបស់បងប្អូនទាំងអស់គ្នា។

ជាមួយគ្នានេះ លោក ឡាយ រតនា គណៈកម្មការរៀបចំបានបញ្ជាក់ថា ការប្រណាំងទូកកម្សាន្តលក្ខណៈមិត្តភាពនេះមានទូកចូលរួមសរុបចំនួន ២៨ទូក ដោយប្រណាំងចំនួន២ជុំ ទូក ឥសីស្រឹង្គារ៍បានបង្ហាញពីភាពខ្លាំងក្លាលើគូប្រជែង រហូតដល់ដណ្តើមបានជ័យលាភីលេខ១ ទទួលបានពានរង្វាន់ក្នុងព្រឹត្តិការណ៍នេះតែម្តង៕

ដោយ ហេង ណាលីន