AKP ភ្នំពេញ ថ្ងៃទី១៤ ខែតុលា ឆ្នាំ២០២៦-- ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នាព្រឹកថ្ងៃពុធទី១៤ ខែតុលា ឆ្នាំ២០២៦នេះ បានអញ្ជើញ ដឹកនាំកិច្ចប្រជុំផ្ទៃក្នុងជាមួយក្រុមការងារត្រួតពិនិត្យ ដើម្បីពិភាក្សាអំពីវឌ្ឍនភាពគម្រោងប្រព័ន្ធរំដោះទឹក និងបង្វែរទឹកចេញពីភូមិសាស្ត្ររាជធានីភ្នំពេញ និងតំបន់រណប។

ឯកឧត្តមរដ្ឋមន្ត្រីបានណែនាំដល់ក្រុមការងារត្រូវបន្តយកចិត្តទុកដាក់ខ្ពស់លើការពង្រឹងគុណភាព និងសោភ័ណភាពសំណង់ឱ្យបានកាន់តែល្អប្រសើរ ដើម្បីជាយុទ្ធសាស្ត្រក្នុងការរំដោះទឹកឱ្យបានឆាប់ចេញពីស្ទឹងព្រែកត្នោតធ្លាក់ចូលទៅក្នុងទន្លេសាប ទន្លេមេគង្គ និងទន្លេបាសាក់ ធានាបាននូវសន្តិសុខទឹកប្រកបដោយប្រសិទ្ធភាព និងស័ក្តិសិទ្ធិភាពដល់ភូមិសាស្ត្ររាជធានីភ្នំពេញ និងតំបន់រណប ព្រមទាំងជួយជំរុញកំណើនវិស័យអេកូទេសចរណ៍ ជាផ្លូវគមនាគមន៍ដ៏សំខាន់ និងជួយដោះស្រាយបញ្ហាកង្វះខាតទឹកក្នុងរដូវប្រាំងសម្រាប់គ្រប់វិស័យក្នុងខេត្តកំពង់ស្ពឺ ខេត្តតាកែវ ខេត្តកណ្តាល និងរាជធានីភ្នំពេញ៕

ដោយ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)