AKP កំពង់ធំ ថ្ងៃទី១៣ ខែតុលា ឆ្នាំ២០២៦-- លោក សាយ គឹមឡម អភិបាលស្រុកស្ទោង បានលើកឡើងថា ការឧបត្ថម្ភគាំទ្រលើកទឹកចិត្តវីរកងទ័ពជួរមុខជាស្មារតីសមរភូមិក្រោយដើម្បីបុព្វហេតុជាតិ សាសនា និងព្រះមហាក្សត្រ។ ការលើកឡើងបែបនេះធ្វើឡើងក្នុងជំនួបសំណេះសំណាលសួរសុខទុក្ខលើកទឹកចិត្តវីរកងទ័ពជួរមុខ ព្រមទាំងឧបត្ថម្ភគ្រឿងឧបភោគបរិភោគ និងថវិកាមួយចំនួនដល់វីរកងទ័ពជួរមុខទិសព្រះវិហារ និងឧត្តរមានជ័យ នាព្រឹកថ្ងៃទី១៣ ខែតុលា ឆ្នាំ២០២៦។

លោកអភិបាលស្រុកបានសង្កត់ធ្ងន់ថា ក្នុងនាមអាជ្ញាធរស្រុកស្ទោង ក្នុងនាមសមរភូមិក្រោយគឺនៅបន្តកៀកកើយជួយឧបត្ថម្ភគាំទ្រលើកទឹកចិត្តគ្រប់វិនាទីដល់វីរកងទ័ពយើង ដែលបានខិតខំពលី ដើម្បីសុខសន្តិភាព និងបូរណភាពទឹកដីដែលជាកេរ្តិ៍ដំណែលរបស់បុព្វបុរសយើងឱ្យបាននូវគង់វង្សស្ថិតសេ្ថរមិនឱ្យមានការរំលោភបំពានយាយីពីសត្រូវផ្សេងៗឡើយ។

លោក សាយ គឹមឡម បានថ្លែងអំណរគុណ និងអរព្រះគុណជាអនេកដល់សប្បុរសជន និងព្រះមន្ត្រីសង្ឃសាលាអនុគណស្រុកស្ទោង ព្រមទាំងព្រះគ្រូចៅអធិការគ្រប់បណ្ដាវត្តអារាមទាំងអស់ក្នុងស្រុកដែលបាន និងតែងតែសហការឧបត្ថម្ភគាំទ្រលើកទឹកចិត្តដល់រដ្ឋបាលស្រុកស្ទោង និងតែងតែចូលរួមរាល់សកម្មភាពដែលអាជ្ញាធរស្រុស្ទោងបានឧបត្ថម្ភគាំទ្រដល់វីរកងទ័ពជួរមុខដូចដែលព្រះមន្ត្រីសង្ឃ បាននិមន្តមកក្នុងឱកាសនេះជាតឹបតាងស្រាប់។

សូមបញ្ជាក់ថា រដ្ឋបាលស្រុកស្ទោងបានចូលរួមឧបត្ថម្ភគាំទ្រដល់វីរកងទ័ពជួរមុខជាលើកទី៣ហើយនៅតាមខ្សែបន្ទាត់ព្រំដែនទិសឧត្តមានជ័យ និងព្រះវិហារ ព្រមទាំងឧបត្ថម្ភម៉ូតូចំនួន៣គ្រឿង និងគាំទ្រជារឿយៗថែមទៀតដែលវីរកងទ័ពបានអញ្ជើញមកដឹកជញ្ជូនស្បៀង និងគ្រឿងឧបភោគបរិភោគសម្ភារបរិក្ខារ និងថវិកាដោយផ្ទាល់នៅសាលាស្រុកស្ទោង ជាពិសេសនៅក្នុងឱកាសនេះក៏មានការឧបត្ថម្ភគាំទ្រនូវសាច់ក្រក១០០គីឡូក្រាម គ្រឿងឧបភោគបរិភោគ១ចំនួន និងថវិកាសរុបចំនួន៧លានរៀល៕

ដោយ ស៊ុម វណ្ណា