AKP បន្ទាយមានជ័យ ថ្ងៃទី៨ ខែតុលា ឆ្នាំ២០២៦– លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តបន្ទាយមានជ័យ បានជំរុញឱ្យមន្ត្រីអប់រំ អ្នកគ្រប់គ្រងគ្រឹះស្ថានមត្តេយ្យសិក្សា លោកគ្រូ អ្នកគ្រូ និងអ្នកពាក់ព័ន្ធ បន្តយកចិត្តទុកដាក់លើការរៀបចំ និងអនុវត្តការងារឱ្យបានច្បាស់លាស់ តាមទិសដៅ និងផែនការដែលបានកំណត់ ដើម្បីធានាឱ្យការអប់រំកុមារតូចនៅឆ្នាំសិក្សា ២០២៦-២០២៧ ប្រព្រឹត្តទៅប្រកបដោយគុណភាព ប្រសិទ្ធភាព និងសុវត្ថិភាព។

ការជំរុញនេះធ្វើឡើងនៅព្រឹកថ្ងៃទី៨ ខែតុលា ឆ្នាំ២០២៦ ក្នុងឱកាសដែលលោក ឈូ ប៊ុនរឿង អញ្ជើញជាគណៈអធិបតីក្នុងកិច្ចប្រជុំតម្រង់ទិសការងារដើមឆ្នាំសិក្សា ២០២៦-២០២៧ សម្រាប់គ្រឹះស្ថានមត្តេយ្យសិក្សាសាធារណៈ (មត្តេយ្យដាច់ដោយឡែក) និងមត្តេយ្យសិក្សាសហគមន៍ ដែលរៀបចំឡើងនៅសាលប្រជុំធំនៃមន្ទីរអប់រំ យុវជន និងកីឡាខេត្តបន្ទាយមានជ័យ។

ក្នុងឱកាសនោះ លោក ឈូ ប៊ុនរឿង បានសង្កត់ធ្ងន់លើសារៈសំខាន់នៃការអប់រំកុមារតូច ដោយចាត់ទុកថា ការរៀបចំមូលដ្ឋានអប់រំឱ្យបានល្អនៅដំណាក់កាលដំបូង គឺជាផ្នែកមួយដ៏សំខាន់សម្រាប់ជួយឱ្យកុមារមានការអភិវឌ្ឍទាំងផ្នែករាងកាយ បញ្ញា ស្មារតី អារម្មណ៍ និងជំនាញសង្គម។ ដូច្នេះ ការគ្រប់គ្រងថ្នាក់រៀន ការរៀបចំបរិយាកាសសិក្សា និងការផ្តល់សេវាអប់រំដែលសមស្របនឹងវ័យកុមារ ត្រូវបានយកចិត្តទុកដាក់ជាប្រចាំ។

លោកប្រធានមន្ទីរ បានណែនាំឱ្យគ្រឹះស្ថានមត្តេយ្យសិក្សាទាំងអស់ ត្រូវពិនិត្យ និងរៀបចំផែនការសកម្មភាពសម្រាប់ឆ្នាំសិក្សាថ្មីឱ្យបានច្បាស់លាស់ ស្របតាមស្ថានភាពជាក់ស្តែង និងតម្រូវការរបស់កុមារ ព្រមទាំងត្រូវពង្រឹងការគ្រប់គ្រង និងការទទួលខុសត្រូវរបស់អ្នកពាក់ព័ន្ធគ្រប់កម្រិត។

លោកក៏បានលើកឡើងថា ការលើកកម្ពស់គុណភាពអប់រំកុមារតូច មិនអាចពឹងផ្អែកតែលើសាលា ឬលោកគ្រូ អ្នកគ្រូតែម្នាក់ឯងបានឡើយ ប៉ុន្តែត្រូវការការចូលរួមពីមន្ត្រីអប់រំ អាជ្ញាធរមូលដ្ឋាន មាតាបិតា អាណាព្យាបាល និងសហគមន៍។ កិច្ចសហការរវាងភាគីពាក់ព័ន្ធទាំងនេះ នឹងជួយបង្កើតបរិយាកាសអប់រំមួយដែលមានសុវត្ថិភាព អនាម័យ និងអំណោយផលដល់ការលូតលាស់ និងការរៀនសូត្ររបស់កុមារ។

លោក ឈូ ប៊ុនរឿង បានជំរុញបន្ថែមឱ្យអ្នកគ្រប់គ្រង និងគ្រូបង្រៀន បន្តពង្រឹងស្មារតីទទួលខុសត្រូវលើការងាររបស់ខ្លួន ព្រមទាំងយកចិត្តទុកដាក់លើការបង្រៀន និងការថែទាំកុមារឱ្យស្របតាមលក្ខណៈអាយុ និងតម្រូវការរបស់ពួកគេ។ ជាពិសេស ត្រូវបន្តសហការជាមួយមាតាបិតា និងសហគមន៍ ដើម្បីលើកកម្ពស់ការចូលរួមរបស់កុមារក្នុងការសិក្សា និងការអភិវឌ្ឍសមត្ថភាពតាំងពីវ័យកុមារតូច។

ជាមួយគ្នានេះ កិច្ចប្រជុំបានផ្តោតលើការពង្រឹងការគ្រប់គ្រងគ្រឹះស្ថានមត្តេយ្យសិក្សា ការរៀបចំផែនការសកម្មភាពសម្រាប់ឆ្នាំសិក្សា ២០២៦-២០២៧ ការលើកកម្ពស់គុណភាពអប់រំកុមារតូច និងការពង្រឹងកិច្ចសហការរវាងមន្ត្រីអប់រំ លោកគ្រូ អ្នកគ្រូ និងសហគមន៍។

ការតម្រង់ទិសការងារនាដើមឆ្នាំសិក្សានេះ ត្រូវបានចាត់ទុកថា ជាឱកាសសំខាន់សម្រាប់អ្នកពាក់ព័ន្ធធ្វើការពិនិត្យឡើងវិញលើការងារដែលត្រូវអនុវត្ត បំពេញចន្លោះខ្វះខាត និងកំណត់ទិសដៅការងារឱ្យបានច្បាស់លាស់ ដើម្បីធានាថា ការផ្តល់សេវាអប់រំកុមារតូចនៅតាមមត្តេយ្យសិក្សាសាធារណៈ និងមត្តេយ្យសិក្សាសហគមន៍ អាចឆ្លើយតបបានកាន់តែល្អប្រសើរទៅនឹងតម្រូវការរបស់កុមារ និងសហគមន៍។

 ជាមួយនោះ លោកប្រធានមន្ទីរ បានអំពាវនាវដល់អ្នកពាក់ព័ន្ធទាំងអស់ បន្តសហការគ្នាឱ្យបានជិតស្និទ្ធ និងអនុវត្តតួនាទីរបស់ខ្លួនដោយការទទួលខុសត្រូវ ដើម្បីរួមចំណែកធានាឱ្យឆ្នាំសិក្សា ២០២៦-២០២៧ ប្រព្រឹត្តទៅដោយរលូន និងមានប្រសិទ្ធភាព ជាពិសេសការពង្រឹងគ្រឹះអប់រំកុមារតូច ដែលជាមូលដ្ឋានសម្រាប់ការរៀនសូត្រ និងការអភិវឌ្ឍធនធានមនុស្សនាពេលអនាគត៕

ដោយ៖ ឈុន សារ៉ាត