AKP បន្ទាយមានជ័យ ថ្ងៃទី១៩ខែកញ្ញាឆ្នាំ២០២៦--‘លោក យឹម សំណាង អភិបាលរងខេត្ត និងជាសមាជិកអចិន្ត្រៃយ៍គណៈកម្មាធិការ ស.ស.យ.ក. ខេត្តបន្ទាយមានជ័យ បានមានប្រសាសន៍ថា ការយល់ដឹងអំពីផលប៉ះពាល់នៃគ្រឿងញៀន និងការគោរពច្បាប់ចរាចរណ៍ផ្លូវគោក ជាកត្តាសំខាន់សម្រាប់ការពារអនាគតយុវជន និងរក្សាសុវត្ថិភាពសង្គម ខណៈយុវជនត្រូវបានចាត់ទុកជាកម្លាំងដ៏សំខាន់ក្នុងការផ្សព្វផ្សាយចំណេះដឹង និងបង្កើតឥរិយាបថវិជ្ជមាននៅក្នុងសហគមន៍។ ការលើកឡើងបែបនេះរបស់លោក យឹម សំណាង ធ្វើឡើងនាព្រឹកថ្ងៃទី១៩ ខែកញ្ញា ឆ្នាំ២០២៦ ក្នុងពិធីផ្សព្វផ្សាយស្ដីពី ការទប់ស្កាត់ការប្រើប្រាស់គ្រឿងញៀន និងច្បាប់ចរាចរណ៍ផ្លូវគោក ជូនដល់សមាជិក សមាជិកា សហភាពសហព័ន្ធយុវជនកម្ពុជា ស្រុកព្រះនេត្រព្រះ និងសិស្សានុសិស្ស ដែលរៀបចំឡើងនៅក្នុងបរិវេណអគារបច្ចេកទេសនៃវិទ្យាល័យជប់វារី ស្រុកព្រះនេត្រព្រះ ខេត្តបបន្ទាយមានជ័យដោយមានការអញ្ជើញចូលរួមពីសមាជិកក្រុមប្រឹក្សាស្រុក អភិបាលរងស្រុក អធិការរងស្រុក លោក លោកស្រីមេឃុំ តំណាងការិយាល័យអប់រំ ការិយាល័យប្រតិបត្តិស្រុក នាយកវិទ្យាល័យជប់វារី ព្រមទាំងសិស្សានុសិស្ស សរុបប្រមាណជាង ៣០០នាក់។

ថ្លែងក្នុងឱកាសនោះ លោក យឹម សំណាង បានគូសបញ្ជាក់ពីសារៈសំខាន់នៃការផ្សព្វផ្សាយចំណេះដឹង និងការអប់រំអំពីបញ្ហាគ្រឿងញៀន និងច្បាប់ចរាចរណ៍ ដោយចាត់ទុកថា ការទប់ស្កាត់បញ្ហាទាំងនេះមិនអាចពឹងផ្អែកតែលើស្ថាប័នមានសមត្ថកិច្ច ឬអាជ្ញាធរមូលដ្ឋានតែប៉ុណ្ណោះទេ ប៉ុន្តែត្រូវការការចូលរួមពីគ្រប់ភាគី ជាពិសេសយុវជន និងសិស្សានុសិស្ស។ យុវជនជាធនធានមនុស្សដ៏សំខាន់សម្រាប់ការអភិវឌ្ឍប្រទេស ហើយការរក្សាយុវជនឱ្យចៀសផុតពីគ្រឿងញៀន គឺជាការរួមចំណែកដ៏មានអត្ថន័យក្នុងការកសាងធនធានមនុស្សប្រកបដោយសុខភាពល្អ សីលធម៌ និងសមត្ថភាព ដើម្បីបន្តចូលរួមក្នុងការអភិវឌ្ឍសហគមន៍ និងប្រទេសជាតិ។

ក្នុងន័យនេះ លោកបានជំរុញឱ្យយុវជន និងសិស្សានុសិស្សយល់ឱ្យបានច្បាស់ថា គ្រឿងញៀនមិនមែនជាបញ្ហារបស់បុគ្គលម្នាក់ប៉ុណ្ណោះទេ ប៉ុន្តែអាចបង្កផលប៉ះពាល់ដល់គ្រួសារ សាលារៀន សហគមន៍ និងសង្គមទាំងមូល។ ដូច្នេះ ការបង្ការទប់ស្កាត់ត្រូវចាប់ផ្តើមពីការយល់ដឹង ការប្រុងប្រយ័ត្ន និងការចេះសម្រេចចិត្តឱ្យបានត្រឹមត្រូវនៅពេលប្រឈមនឹងការអូសទាញ ឬឥទ្ធិពលអវិជ្ជមាននានា។

លោកក៏បានសង្កត់ធ្ងន់លើតួនាទីរបស់ ស.ស.យ.ក. ក្នុងការក្លាយជាស្ពានភ្ជាប់រវាងយុវជន អាជ្ញាធរ សាលារៀន និងសហគមន៍ ដើម្បីបន្តផ្សព្វផ្សាយចំណេះដឹង និងលើកកម្ពស់ការចូលរួមរបស់យុវជនក្នុងការដោះស្រាយបញ្ហាសង្គម។ ក្រៅពីបញ្ហាគ្រឿងញៀន លោក យឹម សំណាង ក៏បានផ្តោតលើសារៈសំខាន់នៃការគោរពច្បាប់ចរាចរណ៍ផ្លូវគោក ជាពិសេសសម្រាប់យុវជន និងសិស្សានុសិស្សដែលជាអ្នកប្រើប្រាស់ផ្លូវក្នុងជីវិតប្រចាំថ្ងៃ។

លោកបានជំរុញឱ្យអ្នកប្រើប្រាស់ផ្លូវគ្រប់រូបមានស្មារតីគោរពច្បាប់ មានការប្រុងប្រយ័ត្ន និងយល់ដឹងអំពីហានិភ័យដែលអាចកើតមាន ប្រសិនបើមានការបំពានច្បាប់ ឬប្រើប្រាស់ផ្លូវដោយខ្វះការប្រុងប្រយ័ត្ន។ សម្រាប់យុវជន ការគោរពច្បាប់ចរាចរណ៍មិនត្រឹមតែជាកាតព្វកិច្ចរបស់អ្នកបើកបរប៉ុណ្ណោះទេ ប៉ុន្តែជាឥរិយាបថសង្គមដែលត្រូវចាប់ផ្តើមពីបុគ្គលម្នាក់ៗ។ ការពាក់មួកសុវត្ថិភាព ការគោរពសិទ្ធិអ្នកដំណើររួមគ្នា ការមិនបើកបរដោយប្រថុយប្រថាន និងការយល់ដឹងពីសញ្ញាចរាចរណ៍ គឺជាចំណុចដែលគួរត្រូវបានអនុវត្តជាប្រចាំ។

ការរៀបចំកម្មវិធីនេះត្រូវបានមើលឃើញថា ជាវេទិកាមួយសម្រាប់ផ្តល់ចំណេះដឹងដោយផ្ទាល់ដល់យុវជន និងសិស្សានុសិស្ស ព្រមទាំងជំរុញឱ្យពួកគេក្លាយជាអ្នកផ្សព្វផ្សាយបន្តទៅកាន់មិត្តភក្តិ គ្រួសារ និងសហគមន៍។ ជាមួយគ្នានេះ ការចូលរួមរបស់អាជ្ញាធរមូលដ្ឋាន និងកងកម្លាំងទាំងបី ក៏បានបង្ហាញពីការសហការរវាងភាគីពាក់ព័ន្ធក្នុងការបង្ការ និងដោះស្រាយបញ្ហាដែលអាចប៉ះពាល់ដល់សន្តិសុខ សុវត្ថិភាព និងសុខុមាលភាពរបស់ប្រជាពលរដ្ឋ។

ទន្ទឹមនឹងនោះ លោក យឹម សំណាង បានអំពាវនាវឱ្យយុវជនប្រើប្រាស់ពេលវេលាឱ្យមានប្រយោជន៍ ខិតខំរៀនសូត្រ ចូលរួមសកម្មភាពសង្គម និងចៀសឱ្យឆ្ងាយពីអំពើដែលអាចបំផ្លាញអនាគតរបស់ខ្លួន។ លោកក៏បានលើកទឹកចិត្តឱ្យសិស្សានុសិស្សចែករំលែកចំណេះដឹងដែលទទួលបានពីកម្មវិធីនេះទៅកាន់មិត្តភក្តិ និងសមាជិកគ្រួសារ ដើម្បីឱ្យការអប់រំមិនបញ្ចប់ត្រឹមក្នុងសាលារៀន ប៉ុន្តែបន្តទៅដល់សហគមន៍៕

ដោយ ឈុន សារ៉ាត