AKP ភ្នំពេញ ថ្ងៃទី១៩ ខែកញ្ញា ឆ្នាំ២០២៦--
ក្រុមហ៊ុនផលិតរថយន្ត Dongfeng Motor បានបង្ហាញនូវការអភិវឌ្ឍចុងក្រោយបំផុតរបស់ខ្លួនលើផ្នែកបច្ចេកវិទ្យាយានយន្តឆ្លាតវៃ សុវត្ថិភាពយានយន្ត ថាមពលថ្មី និងសេវាកម្មតម្រង់ទិសឆ្ពោះទៅរកអ្នកប្រើប្រាស់ នៅក្នុងព្រឹត្តិការណ៍ «សប្តាហ៍នវានុវត្តន៍វិទ្យាសាស្ត្រ និងបច្ចេកវិទ្យា លើកទី១០» (Smart Automotive Technologies at 10th Science and Technology Innovation Week) និង «មហោស្រពរបៀបរស់នៅរបស់អ្នកប្រើប្រាស់លើកទី១» ដែលបានប្រារព្ធឡើងនៅទីក្រុងវូហាន (Wuhan) ភាគកណ្តាលនៃប្រទេសចិន។
ការបង្ហាញនូវបច្ចេកវិទ្យាចុងក្រោយរបស់ក្រុមហ៊ុននេះ ស្របពេលដែលក្រុមហ៊ុនកំពុងតែចាប់អារម្មណ៍ និងបានពង្រីកទីផ្សារលក់រថយន្ដឱ្យកាន់តែទូលំទូលាយថែមទៀត នៅលើទីផ្សារកម្ពុជា ខណៈការប្រើប្រាស់រថយន្ដម៉ាក Dongfeng នេះ កំពុងតែមានការកើនឡើងគួរឱ្យកត់សម្គាល់ផងដែរ។

ព្រឹត្តិការណ៍នេះត្រូវបានរៀបចំឡើងកាលពីពេលថ្មីៗនេះ ក្រោមប្រធានបទ «ខ្យល់បក់ពីទិសបូព៌ា បង្កើតជីវិតឆ្លាតវៃ» (Wind from the East, Creating a Smart Life) ដោយរួមបញ្ចូលគ្នានូវការតាំងបង្ហាញ   បច្ចេកវិទ្យា ការបង្ហាញសមត្ថភាពយានយន្ត និងសកម្មភាពផ្តោតលើអ្នកប្រើប្រាស់ ដែលឆ្លុះបញ្ចាំងពីកិច្ចខិតខំប្រឹងប្រែងរបស់ក្រុមហ៊ុន Dongfeng ក្នុងការប្រែក្លាយនវានុវត្តន៍បច្ចេកវិទ្យាឱ្យទៅជាបទពិសោធន៍ថ្មីនៃការធ្វើដំណើរ។
ក្នុងពិធីបើកសម្ពោធ ក្រុមហ៊ុន Dongfeng Motor បានប្រកាសនូវគំនិតផ្តួចផ្តើមសំខាន់ៗចំនួន ៣ ដែលគ្របដណ្តប់លើវិស័យថាមពលស្អាត សុវត្ថិភាពយានយន្ត និងការអភិវឌ្ឍជាសកល។ ក្រុមហ៊ុនបានដាក់ចេញនូវផែនការ «មេឃស្រឡះ កាបូនសូន្យ» (Sky-Clean Zero-Carbon), ផែនការការពារគ្រប់ជ្រុងជ្រោយសម្រាប់យានយន្តឆ្លាតវៃ (Embodied Intelligent Vehicle All-Domain Protection Plan) និងផែនការ «ដំណើរឆ្ពោះទៅកាន់ជើងមេឃ» (Sky Horizon Voyage) ដែលគូសបញ្ជាក់ពីអាទិភាពនៃការអភិវឌ្ឍរបស់ខ្លួនលើបច្ចេកវិទ្យាថាមពលថ្មី សុវត្ថិភាពយានយន្តគ្រប់ជ្រុងជ្រោយ និងការពង្រីកទីផ្សារអន្តរជាតិ។

ជាមួយគ្នានេះ ក្រុមហ៊ុន Dongfeng ក៏បានសម្ពោធម៉ាកសេវាកម្មថ្មីផ្តោតលើអ្នកប្រើប្រាស់មានឈ្មោះថា «Dongfeng Youxin» ក្នុងគោលបំណងពង្រឹងទំនាក់ទំនងរវាងក្រុមហ៊ុន និងអតិថិជន ព្រមទាំងផ្តល់សេវាកម្មគ្រប់ដំណាក់កាលនៃវដ្តជីវិតរបស់យានយន្ត។

ថ្លែងនៅក្នុងពិធីនោះ លោក Yang Qing ប្រធានក្រុមហ៊ុន Dongfeng Motor បានមានប្រសាសន៍ថា ក្រុមហ៊ុននឹងបន្តផ្តោតលើការធ្វើដំណើរប្រកបដោយសុវត្ថិភាព ភាពឆ្លាតវៃ និងការដឹកជញ្ជូនមនុស្ស និងទំនិញ តាមមធ្យោបាយសន្សំសំចៃថាមពល កាបូនទាប និងមេត្រីបរិស្ថាន ព្រមទាំងលើកកម្ពស់បទពិសោធន៍នៃការប្រើប្រាស់ជូនអតិថិជនជាង ៦៤ លាននាក់របស់ខ្លួន។ លោកបានបញ្ជាក់ទៀតថា ក្នុងអំឡុងពេលនៃការអនុវត្តផែនការ ៥ ឆ្នាំ លើកទី១៥ ខាងមុខនេះ ក្រុមហ៊ុន Dongfeng នឹងបន្តឆ្លើយតបចំពោះការវិវត្តនៃបញ្ញាសិប្បនិម្មិត (AI) ពង្រឹងការអភិវឌ្ឍឧស្សាហកម្មកាបូនទាប និងបង្កើនសមត្ថភាពប្រកួតប្រជែងនៃផលិត​ផលរបស់ខ្លួន។

សម្រាប់បច្ចេកវិទ្យាដែលបានដាក់បង្ហាញក្នុងព្រឹត្តិការណ៍នេះ ក៏ត្រូវបានបង្ហាញតាមរយៈការបើកបរជាក់ស្តែងផងដែរ ហើយភ្ញៀវកិត្តិយសដែលបានអញ្ជើញចូលរួម ទទួលបានឱកាសសាកល្បងបើកបររថយន្តម៉ាក M-HERO នៅលើទីលានសាកល្បងផ្លូវលំបាក (off-road) ផ្ទាល់ខ្លួនរបស់ក្រុមហ៊ុន Dongfeng ជាទីដែលរថយន្តត្រូវបានបើកបរកាត់តាមឧបសគ្គស្មុគស្មាញជាច្រើន ដើម្បីបង្ហាញពីសមត្ថភាព ។
កម្មវិធីបើកបរសាកល្បងនេះ បានបង្ហាញជាក់ស្តែងពីរបៀបដែលវិស្វកម្មយានយន្ត និងបច្ចេកវិទ្យាឆ្លាតវៃ អាចជួយគាំទ្រដល់ការបើកបរក្នុងស្ថានភាពលំបាកៗ។ បទពិសោធន៍នេះរួមមានការបើកបរលើផ្លូវចោទ ផ្លូវមិនរាបស្មើ និងឧបសគ្គផ្លូវលំបាកដទៃទៀត ដែលអនុញ្ញាតឱ្យអ្នកចូលរួមសង្កេតមើលសមត្ថភាពរបស់រថយន្តក្រៅពីស្ថានភាពផ្លូវធម្មតា។

សូមជម្រាបជូនថា ព្រឹត្តិការណ៍ខាងលើក៏បានបង្ហាញវត្តមានរថយន្តម៉ាក VOYAH ដែលជាម៉ាកយានយន្តលំដាប់ខ្ពស់ (Premium) របស់ក្រុមហ៊ុន Dongfeng ផងដែរ។ ម៉ូដែល VOYAH បានបង្ហាញពីទិដ្ឋភាពមួយទៀតនៃការអភិវឌ្ឍយានយន្តរបស់ក្រុមហ៊ុន ដោយផ្តោតសំខាន់លើភាពប្រណីត ផាសុកភាព និងមុខងារឆ្លាតវៃនៃរថយន្ត៕

ដោយ៖ រិទ្ធី